Read Batak Karo HOSEA 1 Bible Online

HOSEA 1 - Batak Karo bible

HOSEA 1

¹Enda me kata TUHAN si seh man Hosea anak Beeri tupung Usia, Jotam, Ahas, ras Hiskia, raja-raja Juda, dingen Jerobeam anak Joas, raja Israel. [1†]

²Tupung TUHAN mula-mulana ngerana man Israel arah Hosea nina man Hosea, “To empoi sekalak diberu; ndeharandu e jadi diberu perlua-lua pagi, janah anakna pe bagi ia ka. Bage ka me bangsangKu pe; enggo itadingkenna Aku janah enggo erlua-lua ia.”

³E maka iempoi Hosea sekalak diberu anak Diblaim, Gomer gelarna. Kenca tubuh anakna sintua, dilaki,

⁴nina TUHAN man Hosea, “Bahan gelarna “Jesreel”, sabap lanai ndekah, Kuukum me raja Israel, erkiteken nai ninina Jehu munuh i Jesreel. E maka Kupengadi me kerajan Israel. [2†]

⁵Tupung si e pagi i bas Baluren Jesreel me Kukernepken gegeh tentera Israel.”

⁶Kenca bage mehuli ka kula Gomer; jenari ipupusna sekalak anak diberu. Nina TUHAN man Hosea, “Bahan gelarna ‘La-ikelengi’, sabap lanai ateKu keleng man rayat kerajan Israel, janah lanai Kualemi salahna.

⁷Tapi man rayat kerajan Juda Kucidahken kekelengenKu. Aku, TUHAN Dibatana si ngkelini ia, tapi ia Kukelini la salu perang, la salu pedang tah panah, la salu kuda ras kalak si ngersak kuda.”

⁸Kenca anakna si diberu e ngadi minem, mehuli ka kula Gomer, jenari ipupusna sekalak anak dilaki.

⁹Nina TUHAN man Hosea, “Bahan gelarna ‘La-bangsangKu’, sabap kalak Israel la bangsangKu, janah Aku la Dibatana.”

¹⁰Bangsa Israel bali pagi teremna ras kersik i lawit, la terkira dingen la tersukati. Genduari tuhu ikataken Dibata, “La kam bangsangKu,” tapi reh me pagi warina i ja ikatakenNa man bangsa e, “Kam kap anak-anak Dibata si Nggeluh!” [3†]

¹¹Kalak Juda ipersada pagi ras kalak Israel. Ipilihna pagi sekalak jadi rajana, e maka keke ia mulihi janah nggeluh senang i bas negerina. Tuhu, wari Jesreel e me sada wari si mbelin pagi!