Read Batak Karo HOSEA 11 Bible Online

HOSEA 11 - Batak Karo bible

HOSEA 11

¹Nina TUHAN, Tupung Israel danak-danak denga ngena kal ateKu ia. E maka Kudilo ia i Mesir nari, bali ras anakKu si dilaki. [13†]

²Tapi reh katepna ia Kulebuhi, reh dauhna ia nilah i bas Aku nari. BangsangKu nembah man Baal selaku dibatana itutungna kumenen man berhala-berhala

³Situhuna si ngajari Israel erdalan, e me Aku, dingen Aku ka nge si ngangkip-ngangkip bangsangKu. Tapi la kepeken iakuina maka Aku nge si ngarak-ngarak ia.

⁴Salu lias ate dingen kekelengen ia Kutegu-tegu, Kuangkip, jenari Kupedeher ia ku pipingKu Tungkuk Aku, jenari Kusulangi ia.

⁵La ia nggit mulih ku Aku, e maka la banci lang mulih me ia ku Mesir, dingen Assur ngkuasai ia.

⁶Perang pecah i bas kerina kuta-kutana, ngerontasken pintu-pintu gerbang kuta. Perang e engkeriken bangsangKu, perban ilakokenna kai akapna si mehuli.

⁷Megekgek kal ia nilah i bas Aku nari. E maka nderkuh me ia erkiteken pasangen si man babanna, tapi la lit ise pe si ngangkatca i bas ia nari.

⁸Kuga banci Aku nirangken kam, o Israel? Kuga banci Aku nadingken kam? Banci kin kam Kukernepken bagi si Kubahan man Adma, tah pe bagi si Kulakoken man Seboim? PusuhKu erkusur maka ola ngelakoken si e sabap kekelengenKu man bandu seh kal belinna. [14†]

⁹Pernembeh ateKu la Kusehken, Israel lanai pernah Kukernepken. Sabap Aku Dibata, labo manusia. Aku itengah-tengahndu, Aku si Badia. Labo i bas pernembeh ateKu Aku reh man bandu.

¹⁰“Iikutken bangsangKu me pagi Aku kenca Aku erdengum bagi singa kempak musuh-musuhna. Pedas-pedas me ia reh i Barat nari.

¹¹Reh ia i Mesir nari bali pedasna ras perkabang perik, bage pe i Assur nari desken nderpati. Kubaba ia mulih ku rumahna. Aku, TUHAN, enggo melasken katangKu.”

¹²Nina TUHAN, “Kalak Israel enggo engkeleweti Aku alu guak ras tipu, dingen kalak Juda tetap denga ngelawan Aku, Dibata si setia dingen Badia.