Read Batak Karo HOSEA 12 Bible Online

HOSEA 12 - Batak Karo bible

HOSEA 12

¹Bangsa Israel bali kap ras permakan si mpermakani rarasen angin. Ntah pe bagi perburu ngayak-ngayak angin seh ben. Penipun ras perbahanen si rawa-rawa ertambah-tambah i tengah-tengahna. Erbahan perpadanen ia ras Assur, dingen ras Mesir erteman ia i bas perbinagan.”

²Lit pengadun TUHAN kerna kalak Juda; Israel pe iukum nge erkiteken lagu langkah rayatna. Ibalasna me man bana sue ras perbahanenna.

³Jakup silawanen ras seninana Esau tupung i bas bertin denga; kenca Jakup enggo mbelin, erbebe ia ras Dibata. [15†] [16†]

⁴Erbebe ia ras malekat, janah menang ia. Tangis ia dingen mindo pasu-pasu. I Betel reh Dibata njumpai nini-nininta Jakup janah ngerana ia man bana. [17†]

⁵Ia me kap TUHAN Dibata si Mada Kuasa, TUHAN e me kap gelarNa.

⁶Dage, o kesusuren Jakup, mulihkenlah kam kempak Dibatandu. Tetaplah kam i bas kekelengen si nteguh dingen adillah kam. Timai alu saber perbahanen Dibatandu.

⁷Nina TUHAN, “Kalak Israel bali la bujurna ras kalak Kanaan; ngena kal atena nipu kalak alu timbangen palsu.

⁸Nina Israel, ‘Aku enggo bayak,’ enggo melala dat aku ertangku. Janah ise pe la banci ngaduken aku maka aku bayak arah dalan si la bujur.”

⁹Tapi Aku, TUHAN Dibatandu si mabai kam ndarat i Mesir nari, Aku mahanca maka kam ringan ka pagi mulihi i bas kemah-kemah, bali ras tupung Aku reh ndahi kam i gurun pasir. [18†]

¹⁰“Ngerana Aku man nabi-nabi janah Kubereken man bana melala pengenehen, janah arah nabi-nabi e Kubereken persinget man bangsangKu.

¹¹Amin bage pe berhala-berhala isembahna ka nge i Gileat; e maka kalak si nembahsa la banci la mate. Jenggi lembu ipersembahken i Gilgal; e maka batar-batar si i je jadi gun-gunen batu me pagi i bas juma-juma si enggo itenggalai.”

¹²Nini-nininta Jakup nai arus lompat ku Mesopotami. I jah arus ia erdahin ras kalak mpermakani biri-biri lako ndatken sekalak ndehara. [19†]

¹³TUHAN nuruh sekalak nabi mulahi bangsa Israel i bas perbudaken nari i Mesir, janah nabi e me si mpermakanisa. [20†]

¹⁴Bangsa Israel enggo erbahanca maka ngilas kal iakap TUHAN; e maka patut nge ia mate erkiteken kejahatenna. Iukum TUHAN me bangsa e, sabap erkiteken ia maka megombang kalak man TUHAN.