Read Batak Karo HOSEA 13 Bible Online

HOSEA 13 - Batak Karo bible

HOSEA 13

¹I bas paksa si enggo lepas, adi ngerana kenca suku Eperaim, mbiar kerina suku-suku Israel si debanna. Kerina kalak pehagaken Eperaim. Tapi erdosa ia erkiteken nembah man Baal, e maka arus mate ia.

²Tetap denga ia erbahan dosa alu nepa gana-gana pirak jadi sembah-sembahenna. Gana-gana e ibahanna rikutken perukuren manusia, janah si erbahanca pe tan manusia. Janah kenca bage, nina, “Persembahkenlah persembahen man bana!” Kuga banci manusia ngema gana-gana e, gana-gana si tempasna bagi lembu?

³Erkiteken si e masap me bangsa enda desken remang erpagi-pagi, bagi namur si enggo kerah erpagi-pagi. Bali kap ia ras nggala si iembusken angin i bas ingan pengeriken, bagi cimber i bas dapur nari.

⁴Nina TUHAN, “Aku kap TUHAN Dibatandu, si mabai kam ndarat i Mesir nari. La lit Dibatandu si deban seakatan Aku. Aku ngenca si ngkelini kam.

⁵Kupekena-kena kam i bas gurun pasir, taneh si kerah e. [21†]

⁶Tapi kenca kam seh i bas taneh si mehuli e, enggo kam besur dingen puas, janah kenca bage meganjang ukurndu dingen ilupakenndu Aku.

⁷E maka Kujerngem me kam desken singa. Desken arimo, Kugempangi kam i bas dalanndu.

⁸Desken beruang kebenen anak, Kurigep me kam, jenari Kucaing-caing tentenndu seh talang. Desken sada singa, Kutelen me kam i je; desken rubia-rubia si merawa Kucaing-caing kam seh melumat.

⁹Kukernepken me kam, o Israel! Ise nari ngasup nampati kam?

¹⁰Ipindondu raja ras peminpin-peminpin, tapi kuga banci ia nampati bangsa e? [22†]

¹¹Perban rawangKu enggo Kubereken bana raja-raja, janah perban gara ateKu enggo ka ia Kubuat. [23†]

¹²Dosa ras kesalahen Israel enggo isuratken, janah suratna e enggo sikap kal ibuniken.

¹³Situhuna lit nge kesempaten man bana lako nggeluh, tapi si e la ibuatna perban motuna, bali ras sekalak anak si nandangi tubuh tapi la nggit luar i bas bertin nari.

¹⁴La Aku nggit engkelini bangsa enda i bas doni kematen nari, la Aku nggit mulahisa i bas kuasa kematen nari. O kematen, marilah baba penakit laya-laya; o doni kematen, marilah baba bisa kecedanndu! Lanai ateKu mekuah nandangi bangsa enda. [24†]

¹⁵Aminna pe Israel mehuli perturahna bagi dukut-dukut, Kusuruh angin Timur si melas i gurun pasir nari, maka kerah ibahanna sumbul-sumbul ras sumurna. Ibuatna kerina si meherga.

¹⁶Samaria arus iukum erkiteken ilawanna Aku. Pendudukna la banci la mate i bas perang; danak-danak idampesken ku taneh, diberu-diberu si mehuli kulana irikrak.”