Read Batak Karo HOSEA 2 Bible Online

HOSEA 2 - Batak Karo bible

HOSEA 2

¹E maka gelarilah seninandu bangsa Israel e “Bangsa Dibata” dingen “Kekelengen Tuhan”.

²O anak-anakKu, mengisngislah pemindonndu man nandendu, aminna pe ia lanai ndeharangKu, janah Aku lanai perbulangenna. Pindo man bana alu mengisngis maka olanai ia erlagu la mehuli dingen ingadikenna jadi diberu perlua-lua.

³Adi lang, Kutangtangi me uisna maka ia manjang-anjang bali ras tangtangna ia tubuh nai. Kubahan ia bagi taneh kerah-kerah si la turah kai pe i je, e maka mate ia perban muasna.

⁴[4-5] Man bandu, anak-anakna pe, la Kucidahken perkuah ateKu, sabap kam kap anak-anak diberu perlua-lua si la meteh mela. Ikataken nandendu kap nina, “Kudahi dilaki si erngena ate man bangku, sabap iberekenna bangku pangan ras lau inemen, mbulu biri-biri ras linen, minak saitun ras anggur.”

⁶Erkiteken si e Kubide me ia salu rambah duri, janah Kupajekken tembok i bas dalanna, maka la ia banci mentas.

⁷Iayak-ayakna me dilaki atena ngena, tapi lalap la idatca. Idaram-daramina, tapi la ia jumpa. Kenca bage nina i bas ukurna, “Mulihlah aku ku perbulangenku ndube, sabap senangen kuakap sanga si e asangken genduari.”

⁸Lalap kap la iangkana maka Aku nge si merekenca man bana gandum, anggur, minak saitun, bage pe pirak ras emas si ipakena i bas nembah man Baal.

⁹E maka tupung paksa peranin pagi Kubuat me mulihi gandum ras anggurKu e, janah Kulegi mbulu biri-biri ras linen si enggo Kubereken man bana jadi uisna.

¹⁰Kutangtangi uisna seh manjang-anjang ia i lebe-lebe dilaki si erngena ate man bana e, janah ise pe la ngasup mulahisa i bas kuasangKu nari.

¹¹Kupengadi me kerina pesta-pestana, subuk kerja-kerja tahunna ras kerja-kerja bulan si mbaru, bage pe perayan wari Sabat -- kerina wari raya agamana.

¹²Kukernepken kerina batang anggur ras batang arana, sabap ikatakenna maka si e kerina pemere dilaki si erngena ate man bana erkiteken itami-tamina dilaki e. Kusalihken kebun-kebunna e jadi kerangen, janah rubia-rubia si meliar reh encedaisa.

¹³Kuukum ia erkiteken wari-wari i ja Aku ilupakenna, tupung itutungna kumenen man Baal janah ipakena perhiasen-perhiasen si meherga lako ngayak-ngayak dilaki si ngena atena. Bagenda me nina TUHAN.

¹⁴Erkiteken si e Kuendik-endik ia, jenari Kubaba ka ku gurun pasir, janah i je ngerana Aku man bana alu cakap si medate.

¹⁵Peken anggurna mbarenda Kuulihken ka man bana janah Baluren Kesusahen Kusalihken jadi pintun pengarapen. I bas gurun pasir e ialoina me Aku bali ras si ibahanna mbarenda tupung ia nguda denga, sanga ia reh i Mesir nari. [4†]

¹⁶Kenca bage igelarina ka Aku, “Perbulangenku” janah lanai ikatakenna Aku, “Baalku”.

¹⁷Ndigan pe lanai Kubere ia melasken kata Baal.

¹⁸Tupung e, Kubahan perpadanen ras kerina perik-perik ras rubia-rubia si meliar si debanna, maka ola igangguna bangsangKu. Kerina perkakas perang pe Kuagui i bas negeri e nari, kerina pedang ras panah, janah Kubere bangsangKu nggeluh alu dame ras teneng.

¹⁹O Israel, Kubahan kam jadi ndeharangKu; Aku tetap setia man bandu; Kucidahken bandu kekelengen ras perkuah ateKu rasa lalap kam sikerajangenKu.

²⁰I bas perjabunta, padanKu tetap Kucikep e maka iakuindu maka Aku kap TUHAN.

²¹ [21-22] Tupung e Kualoi pertoton Israel, bangsangKu. Kubahan udan ndabuh ku taneh, e maka taneh mereken gandum, anggur ras minak saitun

²³Kupetetap bangsangKu ringan i bas negeri e; man si “La-ikelengi” kucidahken keleng ateKu, man bangsa si gelarna “La-bangsangKu”, Kukataken: “Kam kap bangsangKu.” E maka ialoina Aku, “Kam kap Dibatangku.” [5†]