Read Batak Karo HOSEA 4 Bible Online

HOSEA 4 - Batak Karo bible

HOSEA 4

¹Lit pengadun TUHAN nandangi bangsa si ringan i negeri enda. Begiken o Israel, kai si ikatakenNa, “La lit kalak si tutus, la lit kalak si erkeleng ate i bas negeri e, janah bangsa e la ngakui Aku Dibatana.

²Erpadan ia, jenari ilanggarna padanna; erguak ia, munuh, nangko ras erlua-lua. Kejahaten ertambah-tambah, munuh la erngadi-ngadi.

³Erkiteken si e kerah me taneh e, janah kerina si ringan i je mate. Kerina perik-perik ras rubia-rubia si debanna, bage pe nurung, mate kerina.”

⁴Nina TUHAN, “Ola ise pe nalahken tah mandangi rayat, sabap si Kusalahken e me kam, o imam-imam.

⁵Subuk suari, bage pe berngi jongkang kam; janah nabi-nabi pe bage ka. E maka Kukernepken me Israel, nandendu e.

⁶Masap me bangsangKu erkiteken la Aku iakuina. Kam imam-imam la nggit ngakui Aku janah itulakndu pengajarenKu. Erkiteken si e Kutulak kam janah anak-anakndu la Kuakui jadi imam-imamKu.

⁷Reh teremna kam jadi imam, reh buena ka dosandu man bangKu, erkiteken si e Kusalihken me dolatndu jadi si man kemelanken.

⁸Kam jadi bayak arah dosa-dosa bangsangKu, e maka ulin akapndu ia tetap erbahan dosa.

⁹E maka bali nge ukumenndu ras jelma si nterem. Kuukum me kam selaku balasen nandangi kejahatenndu.

¹⁰Ipanndu me si jadi baginndu i bas persembahen e, tapi melihe denga kam lalap. Isembahndu dibata-dibata alu erlua-lua, tapi lalap kam la mupus, sabap enggo itadingkenndu Aku gelah erlua-lua ras dibata-dibata si deban.”

¹¹Nina TUHAN, “Anggur si ndekah ras si mbaru, mahanca bene ukur bangsangKu.

¹²Nungkun ia man sengkeret kayu! Ciken nuri-nuri man bana kerna kai si isungkunna. Enggo itadingkenna Aku. Bali ras sekalak diberu perlua-lua, bage me ia enggo ngendesken dirina man dibata-dibata si deban.

¹³I das deleng-deleng keramat ipersembahkenna persembahen, janah i das uruk-uruk itutungna kumenen i teruh kayu galang si merabun, sabap senang kal cilinggem i teruhna. Em sabapna maka anakndu si diberu pencarinna erlua-lua, janah permainndu erlagu la mehuli.

¹⁴Amin bage pe la ia Kuukum erkiteken si e, sabap kam jine pe lawes ras diberu-diberu perlua-lua si erdahin i bas rumah persembahen kalak perbegu, janah ras-ras kam mpersembahken persembahen. Bagi kata kuan-kuan: ‘Bangsa si la erpengertin bene me.’

¹⁵Aminna pe kam, o Israel, la setia man bangKu, mbera-mbera Juda ola ngelakoken kesalahen si bage. Ola kam ersembah i Gilgal tah pe i Bet-Awen, tah pe ersumpah i je i bas gelar TUHAN si nggeluh.

¹⁶Bangsa Israel bali kengna ras lembu si meliar. Kuga banci Kubere nakan ia bagi biri-biri i bas mbalmbal?

¹⁷Kalak Israel enggo teriket man gana-gana; e maka pelepaslah ia rate-ate.

¹⁸Kenca mbue minem anggur, meriah iakapna i bas dahinna erlua-lua; ngenan atena kemelan asangken kehagan.

¹⁹E maka mistak me ia desken ikabangken angin, janah mela akapna erkiteken nembah man dibata-dibata si deban.