Read Batak Karo HOSEA 5 Bible Online

HOSEA 5 - Batak Karo bible

HOSEA 5

¹Begikenlah, o imam-imam! Perdiatekenlah, o bangsa Israel! Begikenlah, o kam kerina kesusuren raja-raja. Idabuhken me ukumen man bandu. Kam enggo jadi siding i Mispa, jadi banto i Deleng Tabor,

²jadi lubang perangkap si mbages i Sitim, e maka Kuukum me kam kerina.

³Kueteh nge kuga Israel; labo ia banci cebuni i bas Aku nari. Israel lanai erkemalangen man bangKu, janah rayatna enggo ngeliami dirina.”

⁴Kejahaten si ilakoken bangsa e ngambati maka ia la mulih man Dibata. Perukuren kerna erlua-lua, e me nembah man berhala-berhala megegeh i bas ia, e maka la iakuina TUHAN.

⁵Ukur meganjang si lit i bas bangsa Israel ngaduken ia. Dosa-dosana mahanca ia tertuktuk janah jongkang, janah kalak Juda radu jongkang ras ia.

⁶Ibuatna biri-biri ras lembu jadi persembahen gelehen man TUHAN, tapi si e la erguna. La banci jumpa ia ras TUHAN, sabap enggo itadingken TUHAN ia.

⁷Sabap la ia setia man TUHAN, e maka anak-anakna pe labo sikerajangen TUHAN. Dage ia ras tanehna lampas me ikernepken.

⁸Embuslah tanduk i Gibea! Embuslah terompet i Rama! Surakkenlah surak-surak perang i Betel! Berkatlah ku peperangen, o kalak Benyamin!

⁹Wari ukumen reh me, e maka bene me Israel. O kalak Israel si enda la banci lang jadi.

¹⁰Nina TUHAN, “Nembeh ateKu perban peminpin-peminpin Juda enggo merangi Israel janah ipiserkenna batu perbalengen. E maka Kucurcurken me ukumen man bana desken banjir.

¹¹Israel enggo itindih, remuk kena ukumen, sabap itetapkenna ukurna ngayak-ngayak si sia-sia.

¹²Perban si e Kukernepken me Israel ras Juda bali ras ngetnget encedaken barang-barang.

¹³Kenca Israel ras Yuda ngidah uga kelekna penakit ras luka-lukana, e maka lawes me Israel ku Assur mindo penampat man raja si mbelin e, tapi labo ia ngasup pepalem penakit ras lukana.

¹⁴Kujerngem me Israel ras Juda desken singa, jenari Kucaing-caing seh getem, janah kenca bage Kutadingken. Adi Kusarenken ia, la ise pe ngasup mulahisa.

¹⁵Kutadingken bangsangKu seh cukup kiniseranna erkiteken dosa-dosana maka reh ia ndarami Aku. Banci jadi i bas kiniseranna icubakenna njumpai Aku.”