Read Batak Karo HOSEA 6 Bible Online

HOSEA 6 - Batak Karo bible

HOSEA 6

¹Nina bangsa e, “Mulihlah kita ku TUHAN! Enggo isakitiNa kita, tapi ugapa pe ipepalemNa ka nge kita; enggo ilukaiNa kita, tapi la banci lang ibalutiNa ka nge lukanta e.

²Dua tah telu wari nari ipekekeNa ka nge kita, maka kita nggeluh i adep-adepenNa.

³Marilah sicubaken nandai TUHAN. Bagi matawari la banci la pultak arah kenjulu, dingen udan si pemena la banci la ndabuh ngelitapi taneh, bage me pe TUHAN, la banci la reh ndahi kita.”

⁴Tapi nina TUHAN, “O Israel ras Juda, kai nari si banci Kubahan man bandu? Kekelengenndu man bangKu pedas kap lesap bali ras remang erpagi-pagi; seri ras namur si lampas lesap.

⁵Em sabapna maka Kusuruh nabi-nabingKu ndahi kam maba berita kerna ukumen ras kecedan man bandu. Kai si Kuarapken i bas kam nari tangkas dingen terang kap, e me:

⁶Kekelengenndu si tetap, labo persembahenndu. Madin Kuakap itandai bangsangKu Aku, asangken itutungna persembahen bangKu. [6†]

⁷Kenca ia seh i Adam, minter ilanggarna padan si Kubahan ras ia.

⁸Gileat e me kuta si dem alu kalak jahat dingen pemunuh.

⁹Imam-imam bali ras gerombolen pengerampok nggempangi kalak. Subuk i bas dalan ku ingan si badia i Sikem pe, munuh ia. Kerina kejahaten enda ilakokenna alu sengaja!

¹⁰Enggo Kuidah sada barang si mejin i Israel: bangsangKu erlua-lua dingen ngeliami dirina alu nembah man berhala-berhala.

¹¹Janah kam, o kalak Juda, enggo Kutetapken sada paksa guna ngukum kam pe erkiteken kai si ilakokenndu genduari.