Read Batak Karo HOSEA 7 Bible Online

HOSEA 7 - Batak Karo bible

HOSEA 7

¹Katawari ateKu Kupepalem bangsangKu Israel janah Kupesenang ka ia mulihi, i je ka minter Kuidah kejahaten ras dosa si ibahanna. Sitipu-tipun ia sapih-sapih ia; ibongkarna rumah kalak, nangko ia; irampokna kalak i bas pasar-pasar.

²La pernah tersinget i bas ukurna maka Kuinget nge kerina kejahaten enda; tapi dosa-dosana ngkeleweti ia, e maka terpaksa rusur Kuidah.”

³Nina TUHAN, “Rayat muat ukur raja ras pegawai-pegawaina alu pertakin ras guak.

⁴Kerina ia penipu dingen la patuh. I bas pusuhna dem elem-elem bali ras api i bas ginuhur si gara; tukang roti la perlu nggestungi rantingna, mulai roti ituang seh roti e enggo kembang .

⁵I bas pesta si ibahan raja, ibahanna raja ras pegawai-pegawaina mabuk alu anggur, seh maka ilakokenna perbahanen si man kemelanken.

⁶Tuhu, pusuhna bali ras ginuhur si gara, dem alu pertakin. Gedang-gedang berngi pernembeh atena merara, janah erpagi-pagi gurlah jadi api si gara.

⁷I bas pernembeh atena si gara, ibunuhna peminpin-peminpinna. Raja-rajana ibunuhna sada-sadai, tapi la lit sada pe si erlebuh man bangKu mindo penampat.”

⁸Nina TUHAN, “Bangsa Israel bali kap ras roti si meseng sembelah. Ernalem ia man bangsa-bangsa sekelewetna,

⁹janah la iangkana maka bangsa si deban e nge si engkeriken gegehna. Wari-warina enggo ibeligai, tapi la sitik pe igejapna.

¹⁰Kiniganjangen ukur bangsa Israel desken sada saksi si ngelawan Israel. Tapi aminna kai gia enggo jadi man bana, lalap ia la mulih man bangKu, TUHAN Dibatana.

¹¹Israel bali kap ras ndukur si motu; mula-mula erlebuh ia man Mesir mindo penampat, jenari lawes ka ia ku Assur!

¹²Tapi Kukimbangken me bantongKu maka Kutangkap ia bagi perik sangana kabang. Kuukum me ia erkiteken kejahaten si enggo ilakokenna.

¹³Cilaka me ia! Enggo itadingkenna dingen ilawanna Aku. E maka kernep me ia. Kukelini ateKu ia, tapi ilawanna Aku alu kata guak.

¹⁴Pertotonna la i bas pusuhna nari, tapi idampes-dampeskenna bana janahna ngandung i bas ingan medem bali ras kalak perbegu. Tupung ia ertoto mindo gandum ras anggur ilukaina bana bagi kalak perbegu. Tuhu-tuhu kal ia pemberontak!

¹⁵Aminna Aku nge si mpebelin-belinca ras si mpegegehi ia, tapi iukurkenna nge mahan si la mehuli man bangKu.

¹⁶La erngadi-ngadi itundalkenna Aku, jenari ngadap ia man dibata-dibata si la ergegeh. La sitik pe ia terteki, bali ras panah si enggo baling. Erkiteken peminpin-peminpinna meganjang ukurna, e maka mate me ia kena pedang, janah tawa-tawa kalak Mesir ngidahsa.”