Read Batak Karo HOSEA 8 Bible Online

HOSEA 8 - Batak Karo bible

HOSEA 8

¹Nina TUHAN, “Embuslah terompet! Musuh enggo reh desken rajawali muatna nangkis. BangsangKu enggo ngelanggar perpadanen si Kubahan ras ia, dingen enggo ilawanna pengajarenKu.

²Aminna gia ikatakenna Aku Dibatana, dingen iakukenna maka ia bangsangKu, ras itandaina Aku,

³tapi situhuna itulakna kai si mehuli. Erkiteken si e iayak-ayak musuhna me ia.

⁴Ipilihna rajana, tapi la Aku isungkunna. Iangkatna peminpin-peminpinna la arah senang ateKu. Ibuatna pirakna ras emasna, ijadikenna gana-gana, e maka kernep me ia.

⁵Ciga ateKu lembu emas si isembah penduduk kuta Samaria. Nembeh kal ateKu man bana kerina. Asa kai nari dekahna maka ia ngadi nembah man berhala-berhala?

⁶Sekalak tukang Israel kap si mahan gana-gana e, janah si e la kap dibata. Gana-gana lembu emas si i Samaria, kuga pe iripukken.

⁷Erkiteken ierdangkenna angin, e maka iperanina me angin kalinsungsung! Juma page si la lit ruhina, labo banci dat cimpa arah e. Tapi bicara lit pe, bangsa si deban nge ngkerikenca.

⁸Israel enggo bali kap ras bangsa si deban, janah lanai erguna desken pecah-pecah kudin taneh.

⁹Bangsa Israel bali kengna ras kelede si meliar, si ndalani dalanna jine. Lawes ia mindo penampat man Assur, janah iupahina bangsa-bangsa si deban jadi sekawalna.

¹⁰Tapi genduari Kupepulung me ia lako ngukumsa. E maka minter me itindih baban si mberat i bas raja Assur nari.

¹¹Reh buena batar-batar si ipajekken Israel lako nangtangi dosana, reh buena kap inganna ngelakoken dosa!

¹²Aminna Kusuratken pe man bana pengajaren si lanai lang-lang buena, itulakna kerina desken barang si la itandaina.

¹³Ipersembahkenna persembahen gelehen man bangKu, jenari ipanna daging persembahen e. Tapi Aku, TUHAN, la erngena ate man bana; janah genduari Kuinget me dosana e, e maka Kuukum me ia erkite-kiteken si e. Kuulihken me ia ku Mesir.

¹⁴Kalak Israel enggo majekken istana-istana, tapi enggo ilupakenna Si Nepa ia. Kalak Juda enggo majekken kuta-kuta si erbenteng. Tapi Kupesusur me api lako engkeriken istana-istana ras kuta-kutana e.”