Read Batak Karo HOSEA 9 Bible Online

HOSEA 9 - Batak Karo bible

HOSEA 9

¹Olanai kam ersurak-surak dingen ermeriah ukur, o kalak Israel, bali kam ras kalak perbegu. Kam enggo erlua-lua, e me nilah i bas Dibatandu nari. I belang-belang negeri e enggo idayakenndu dirindu desken diberu perlua-lua man dibata Baal, janah meriah kal akapndu ngaloken gandum si iakapndu jadi upahndu i bas ia nari.

²Tapi nandangi lanai bo cukup gandum ras minak saitunndu janah anggurndu pe lanai lit.

³Kalak Israel lanai pagi ringan i bas negeri TUHAN, tapi terpaksa mulih ku Mesir, dingen arus man pangan si pantang i Assur.

⁴I bas negeri-negeri e lanai bo pagi banci ipersembahkenna anggur man TUHAN, dingen lanai banci ibahanna persembahen. Panganna erbahanca keliamen kerina kalak si manca, bali ras pangan si ipan tupung paksa penguburen. Si e kerina mesuri beltekna ngenca lakonna, tapi la lit sitik pe si banci ibaba jadi persembahen ku Rumah Pertoton TUHAN.

⁵E maka adi enggo seh paksa wari raya si enggo itetapken guna kehamaten man TUHAN, lanai lit kai pe si banci ilakokenna.

⁶Adi paksa kecedan enggo reh, janah bangsa e ikerapken, ipepulung bangsa Mesir me ia, tapi ipepulung guna ikuburken i Mempis! Erta-ertana si meherga, e me pirak, bage pe pertapaken ingan rumahna pajek mbarenda, kerina pagi itamburi dukut ras rambah duri.

⁷Paksa ukumen seh me; tupung si e idat kalak me balasen perbahanenna. Tupung si e pagi ieteh Israel me! Nina, “Nabi enda motu kal. Kalak si iingani kesah enda adon kap.” Elem-elem kal atena kempak aku sabap bage kal belinna dosana. [7†]

⁸Dibata enggo nuruh aku jadi nabi lako mpersingeti bangsaNa Israel. Tapi ku ja pe aku lawes isidingi bangsa e atena aku desken perik. I bas negeri Dibata jine, bangsa e kap musuh nabi.

⁹Kejahatenna lanai tanggung i bas kerina perbahanenna, bali ras tupung ia i Gibea nai. Inget Dibata nge dosana e, janah la banci lang iukumNa me ia erkiteken si e. [8†]

¹⁰Nina TUHAN, “Tangtangna Kujumpai nai Israel, bali kap ia ras anggur si turah i bas gurun pasir. Tangtangna Kuidah nai nini-ninina, bali kap ras ngidah buah ara si pemenana tasak i bas musimna. Tapi enggo kenca ia seh i Deleng Peor, mulai me ia nembah man Baal, janah minter kal ciga ateKu, bali ras cigana ateKu nandangi dibata-dibata si ikelengina e. [9†]

¹¹E maka kiniulin Israel kabang me desken perik-perik, janah lanai pagi lit anak si ipupusna, lanai lit diberu si mehuli kulana, lanai lit anak i bas bertin.

¹²Janah aminna ipebelin-belinna pe anakna, Kubuat nge kerina, sada pe la lit Kutadingken nggeluh. Kenca Kutadingken bangsa enda, kena cilaka me ia.”

¹³O TUHAN, banci kuidah anak-anakna ipeburui jenari ibunuh.

¹⁴Kai ndia si kupindo man baNdu guna bangsa enda? Bahanlah maka pernanden-pernandenna la banci mupus, dingen la ngasup ia pepinemken anakna.

¹⁵Nina TUHAN, “Kerina perbahanenna si jahat ibenaken i Gilgal. I je me bena-benana ateKu nembeh man bana. Janah erkiteken kejahaten si ibahanna, kupelawes me ia i bas tanehKu nari. Lanai ateKu keleng kempak ia, sabap kerina peminpin-peminpinna enggo berontak ngelawan Aku.

¹⁶Bangsa Israel igudam. Bangsa e bali kap ras sinuan-sinuan si enggo kerah urat-uratna, si lanai erbuah. Lanai lit tubuh anakna, janah aminna lit denga pe, Kubunuh me anak-anak kekelengenna e.”

¹⁷Dibata si kusembah, itulakna nge bangsaNa, sabap la idengkehken bangsa e Ia. E maka lajang-lajang me ia i tengah-tengah bangsa-bangsa.