Read Batak Karo JOEL 2 Bible Online

JOEL 2 - Batak Karo bible

JOEL 2

¹Embus terompet, embus tanduk i datas Deleng Sion, deleng si Badia nu Dibata. Gentarlah, o kalak Juda! Wari TUHAN enggo ndeher.

²Wari kegelapen dingen gelap mesangat, wari si geltem dingen meremang. Sada bala labang enggo reh huyak ras megegeh, desken kegelapen nutupi deleng-deleng. Ndiganai pe langa pernah lit bage, janah ndigan pe lanai pernah jadi bage.

³Desken api ipanganina sinuan-sinuan. Idapetina negeri desken Peken Pardis tapi itadingkenna bali ras gurun pasir. La lit si pulah ibahanna.

⁴Tempasna bali ras kuda; perkiamna bali ras kuda perang. [3†]

⁵Lompat-lompat i datas deleng-deleng erderik-derik desken gereta perang; erderak sorana desken dukut kerah ipan api. Erbaris ia desken tentera si nterem si ersikap lawes erperang.

⁶Adi reh deherna ia, nggirgir kalak kerina; kerina ayo sambar jadi mbulan.

⁷Ia nerang desken serdadu si mbisa, inangkihina tembok desken tentera. Pinter perdalanna ku lebe, la ia nilah i bas dalanna nari,

⁸la ia si jemba-jemban, iderpana kerina kasa kai si ngolangi, janah ise pe la ngasup pengadisa.

⁹Radu ras ia kerina nerang kuta e, kiam ia arah babo tembok. Inangkihina rumah, jenari bengket ia arah jendela desken pinangko.

¹⁰Doni enda mundu-undu langit nggirgir tupung reh ia erdalan. Matawari ras bulan jadi gelap, janah bintang-bintang pe lanai ersinalsal. [4†]

¹¹ TUHAN erlenggur merentahken tenteraNa. Serdadu si ngikutken pedahNa nterem dingen seh kal gegehna. Andiko mejinna wari TUHAN e! Ise kin ngasup nahankenca? [5†]

¹²Nina TUHAN, “Genduari jeralah kam dahilah Aku alu erpuasa dingen tangis janah erceda ate.

¹³Bahan maka pusuhndu si getem encidahken atendu ceda. Adi uisndu saja nge icaingkenndu la kap bias.” Jeralah kempak TUHAN Dibatandu. Ia melias dingen dem perkuah ate. Ia persabar janah tetap icikepNa PadanNa. Tetap Ia nggit ngalemi dosandu, jenari la kam iukumNa.

¹⁴Mbera-mbera erkusur ukur TUHAN Dibatandu, jenari ipasu-pasuNa kam alu pangan riba-iba. Kenca bage banci ipersembahkenndu, pangan ras inemen man baNa.

¹⁵Embuslah terompet i datas Deleng Sion; suruh kalak erpuasa lebuhlah perpulungen!

¹⁶Pepulung jelma si nterem kerina; sikapken ia guna perjumpan si badia, baba kalak si enggo metua, pepulunglah danak-danak ras anak gara-gara pe. Kalak si mbaru erjabu pe arus ikut reh nadingken bilikna.

¹⁷Imam-imam si ngelai TUHAN, kelang-kelang batar-batar ras dalan bengket ku Rumah Pertoton, arus maka tangis janah ertoto nina, “O TUHAN cidahken min perkuah ateNdu man bangsaNdu.” Ola pelepas bangsa si deban megombang dingen nguru-nguru kami alu ngataken, “I ja kin Dibatandu?”

¹⁸E maka iperdiateken TUHAN ka negeriNa, enggo mekuah ateNa kempak bangsaNa.

¹⁹Nina ngaloi bangsa e, “Genduari Kubereken ateKu man bandu gandum, anggur ras minak saitun, e maka besur me kam. Bangsa-bangsa si deban lanai nggombangi kam.

²⁰Kupelawes bala labang si rehna i Utara nari. Kupelawes ia deba ku bas gurun pasir, barisenna si arah lebe Kugera ku Lawit Merah, barisenna si arah pudi ku Lawit Tengah. Bangkena jadi mbau. Kukernepken ia kerina erkiteken si enggo ibahanna man bandu.

²¹O juma-juma, ola mbiar, tapi ersurak janah meriahlah erkiteken kerina si ibahan TUHAN man bandu,

²²O rubia-rubia, ola mbiar. Mbalmbal inganndu nggagat meratah, batang kayu erbuah ka, batang ara ras batang anggur meramis buahna.

²³O kalak Sion ersuraklah meriahlah atendu i bas TUHAN Dibatandu, sabap iberekenNa man bandu paksa perudan rikutken payona enggo ikusekenNa man bandu paksa udan, iberekenNa man bandu sumbul udan bagi si nggona.

²⁴Ingan pengeriken dem alu gandum; lubang-lubang deher ingan mereh sampur lau anggur ras minak saitun.

²⁵Kuulihken man bandu kai si enggo bene, i bas tahun-tahun tupung labang mangani gandumndu. Aku kap si nuruh bala labang e ngelawan kam.

²⁶E maka enggo melala me si man panganndu, seh maka riba-iba kam. Ipujindu me TUHAN Dibatandu, si ngelakoken perkara si mejin man bandu. BangsangKu ndigan pe lanai igombangi kalak.

²⁷Kenca bage o Israel, ietehNdu maka Aku kap i tengah-tengahndu. Aku kap ngenca TUHAN Dibatandu, janah la lit sideban. BangsangKu ndigan pe lanai igombangi kalak.

²⁸Kenca si e Kubereken me kesahKu man kerina kalak; anak-anakndu si dilaki ras si diberu ernubuat; pertua-pertuandu ernipi, anak-anakndu si nguda dengan ngidah pengenehenen. [6†]

²⁹I bas paksa e Kukuseken KesahKu subuk man suruh-suruhen si dilaki ntah si diberu.”

³⁰I bas wari e Kubahan tanda-tanda i langit ras i doni e me: dareh, api, ras cimber bagi embun.

³¹Matawari jadi gelap bulan salih jadi megara bagi dareh, ope denga -- reh wari TUHAN si mbelin dingen mejin e. [7†]

³²Tapi kerina kalak si mindo penampat man TUHAN terkelin kap. Bagi si ikataken TUHAN, “Kalak si i Jerusalem terkelin kap deba. Kasa kai kalak si Kupilih tetap nggeluh.” [8†]