Read Batak Karo AMOS 2 Bible Online

AMOS 2 - Batak Karo bible

AMOS 2

¹Nina TUHAN, “Kalak Moap la erngadi-ngadi erbahan dosa. Erkiteken si e la banci lang Kuukum ia sabap megombang kal ia; itutungna tulan-tulan raja Edom jadi kapur. [8†]

²Erkiteken si e Kupesusur api ku taneh Moap dingen Kuciluk benteng-benteng Keryot. Mate kalak Moap i tengah-tengah sora perang si gejek, tupung serdadu ersurak-surak dingen terompet erkata.

³Kubunuh si erkuasa i Moap rikut ras kerina peminpin-peminpin negeri e.”

⁴Nina TUHAN, “Kalak Juda la erngadi-ngadi erbahan dosa. Erkiteken si e la banci lang Kuukum ia. Sabap itulakna pengajarenKu dingen la ipakena perentahKu. Enggo papak ia ibahan dibata-dibata si la tuhu si isembah nini-ninina nai.

⁵Erkiteken si e Kupesusur api ku negeri Juda dingen Kuciluk benteng-benteng kuta Jerusalem.”

⁶Nina TUHAN, “Kalak Israel la erngadi-ngadi erbahan dosa. Erkiteken si e la banci lang Kuukum ia. Sabap idayakenna jadi budak kalak bujur si la ngasup nggalar utangna, janah kalak musil alu erga sepasang selop.

⁷Iperjakina kalak si enggo kote dingen la ergegeh, ijemjemkenna kalak musil i bas dalan nari. Anak dilaki ras bapana erlua-lua ras sada budak-diberu; erkiteken si e iliamina kap gelarKu si badia.

⁸I bas tep-tep ingan sembah-sembahen, nterem kalak medem encabinken uis si igadeken kalak musil man bana. I bas rumah Dibatana minem-minem anggur ia, anggur si ibuatna i bas kalak si rutang duit man bana.

⁹Amin bage pe, o bangsangKu, erkiteken kam nge maka keri kal Kukernepken kalak Amori, kalak si gedang-mbelin bagi batang kayu eru, dingen mersik bagi kayu jati. Kukernepken buahna i datas nari, uratna i teruh nari. [9†]

¹⁰Kubaba kam ndarat i Mesir nari. Kutaruhken kam arah gurun pasir empat puluh tahun dekahna, janah Kubereken negeri kalak Amori jadi sikerajangenndu jine.

¹¹Anakndu si dilaki deba Kupilih jadi nabi, deba jadi Nasir. Ma payo kin bage, o bangsa Israel? Aku, TUHANndu kap si ngerana enda. [10†]

¹²Tapi isuruhndu kalak Nasir e nginem anggur, janah ipaksandu nabi-nabi maka ola iberitakenna katangKu.

¹³Erkiteken si e, genduari Kudehken me kam ku taneh maka kam mengkik-engkik bagi gereta si dem isin page.

¹⁴E maka kalak si meter kiam pe labo banci pulah; kalak mbisa bene gegehna, serdadu pe la ngasup engkelini kesahna.

¹⁵Pemanah-manah la ngasup ertahan, si megegeh kiam la ngasup miser, dingen kalak si ngersak kuda la ngasup kiam engkelini kesahna.

¹⁶I bas wari si e subuk serdadu si mbisa pe mulahi senjatana, jenari ngerbul ia.” Bage nina TUHAN.