Read Batak Karo AMOS 4 Bible Online

AMOS 4 - Batak Karo bible

AMOS 4

¹Begikenlah kata enda, o diberu-diberu si ringan i Samaria, si bali burna ras lembu Basan, kam si merjaki dingen nindih kalak si la ergegeh janah musil, si la erngadi-ngadi mindo man perbulangenndu gelah tetap isikapkenna bandu inemen keras.

²Nginget kebadianNa, TUHAN si Erdolat enggo ersumpah, “Reh me warina i ja irintak-rintak kalak kam alu kawil; kerina kam la banci lang bali ras nurung i bas kawil.

³Kam isarenken ku lubang si ndeherna i bas tembok kuta, jenari ibenterken ndarat.”

⁴Nina TUHAN si Erdolat, “O kalak Israel, to sembahlah Dibata ku Betel, jenari erdosalah! To dahi ku Gilgal, janah reh buena bahan dosandu. Persembahkenlah i je asuh-asuhen tep-tep erpagi-pagi, janah telu wari sekali, bahanlah persembahen persepuluhenndu.

⁵Persembahkenlah roti tanda pengataken bujurndu man Dibata, janah momokenlah kerina pemerendu. Sabap e kap atendu ngena!

⁶Aku kap si mahanca maka lit kelihen si mesangat i bas kerina kuta-kutandu, tapi amin bage pe labo kam reh jera man bangKu.

⁷La Kubere udan nusur tupung sinuan-sinuanndu perlu kal kena udan. Kupesusur udan ku sada kuta, tapi ku kuta si deban lang. Sada juma kena udan, tapi juma si deban legon.

⁸Piga-piga kuta lawes erpala-pala ku kuta si deban ndarami lau inemen, tapi i je pe la lit idatca, janah muas ia lalap. Amin bage pe langa ka bo kam jera ku Aku.

⁹Kusuruh angin si melas mahanca sinuan-sinuanndu kerah. Labang engkeriken reba-reba ras peken anggurndu, bage pe batang ara ras batang saitunndu. Amin bage pe langa ka bo kam jera dingen mulih ku Aku.

¹⁰Kusuruh penakit laya-laya engkenai kam bali ras si Kubahan man Mesir nai. Kubunuh anak-anak peranandu i bas perang janah kudandu Kurampas kerina. Kubahan maka sedak akapndu nganggeh bau kalak mate si macik i bas ingan perkemahenndu. Amin bage pe langa ka bo kam mulih jera ku Aku.

¹¹Deba kam Kukernepken bali ras pengkernepkenKu Sodom ras Gomora nai. Kam si tading bali kap ras sengkeret ranting si isintapken i bas api nari. Tapi amin bage pe langa ka bo kam mulih jera ku Aku,” bage nina TUHAN. [12†]

¹²“Dage, o kalak Israel, Kuukum me kam. Janah erkiteken Kusehken me ukumen e man bandu, ersikap-sikaplah kam ngadap Aku, Dibatandu.”

¹³Dibata kap si nepa deleng-deleng, si njadiken kerina angin. IpebetehkenNa perukurenNa man manusia, isalihkenNa suari jadi berngi. Erdalan Ia arah angin si meganjang i doni GelarNa e me kap: TUHAN Dibata si Mada Kuasa!