Read Batak Karo AMOS 5 Bible Online

AMOS 5 - Batak Karo bible

AMOS 5

¹O kalak Israel, begikenlah ende-enden tangis-tangis si kuendeken man bandu.

²Israel, singuda-nguda e enggo guling lanai nari ia keke-keke! Ampar-ampar ia i bas taneh, la lit si petedissa.

³Nina TUHAN si Erdolat, “Sada kuta i Israel, ipeberkatna seribu serdadu, tapi seratus nari ngenca mulih; kuta si deban, ipeberkatna seratus serdadu, tapi sepuluh ngenca selamat mulih.”

⁴Nina TUHAN man kalak Israel, “Marilah, dahi Aku, maka kam nggeluh.

⁵Ola kam lawes ku Berseba lako nembah. Ola darami Aku i Betel, sabap Betel masap pagi. Ola kam lawes ku Gilgal, sabap anak kuta e keri pagi ibuang.”

⁶Dahilah TUHAN maka kam nggeluh. Adi lang, desken api si gurlah me Ia, maka meseng ibahanNa bangsa Israel. Meseng me anak kuta Betel ipan api e, janah ise pe la ngasup nimpetisa.

⁷Cilaka me kam, o kam si nalihken kebujuren si pentar jadi nggeduk, dingen ndampesken kebenaren ku taneh.

⁸ TUHAN kap si njadiken bintang-bintang, bintang Kartika ras bintang Timur. IsalihkenNa kegelapen jadi suari, suari jadi berngi. IlebuhNa lau Lawit je nari iamburkenNa ku doni. GelarNa e me kap TUHAN. [13†]

⁹Kalak si mbisa ikernepkenNa, benteng-bentengna iradaskenNa.

¹⁰Segat atendu man kalak si pang alu terus terang mandang kam, dingen nembeh atendu man kalak si nuriken si tuhu-tuhuna i bas pengadilen.

¹¹Kalak si musil-musil itindihndu janah ipaksandu ia mereken pagena. E maka aminna enggo pe ipajekkenndu rumahndu gedung batu, labo pagi kam ngianisa; enggo pe isuanindu peken anggur si mejile, labo pagi inemndu lau anggur e.

¹²Kueteh nge uga belinna dosandu janah uga lalana kejahaten si ilakokenndu. Kalak bujur itindihndu, ngalo duit sisip kam, janah iolangi-olangindu kalak musil maka ola datca kebujuren i bas pengadilen.

¹³E maka i bas paksa si bage, sip saja kalak pantas sabap paksa jahat kap e.

¹⁴Daramilah si mehuli, ola si jahat, maka kam nggeluh. Adi bage TUHAN Dibata si Mada Kuasa tuhu-tuhu rembak ras kam, bagi si ikatakenndu rusur.

¹⁵Cigalah atendu man kejahaten, ngena atendu si benar, janah arus iperdiatekenndu gelah kebujuren menang i bas pengadilen. Mbera-mbera mekuah ate TUHAN man bangsa enda si lit denga tading nggeluh genduari.

¹⁶Erkiteken si e, enda kap si ikataken TUHAN Dibata si Mada Kuasa, “Lit sora tangis ras ngandung i tiga ras i pasar-pasar. Subuk perjuma pe idilo gelah nangisi kalak si mate radu ras kalak upahen si beluh ngandung.

¹⁷I bas peken-peken anggur pe tangis ngandung kalak kerina. Si enda kerina jadi erkiteken mentas Aku arah tengah-tengahndu.” Bagenda me nina TUHAN.

¹⁸Andiko, cilaka me kam si ertedeh ate nandangi kerehen wari TUHAN! Kai kin untungna man bandu kerna wari e? Wari e, wari kegelapen kap man bandu, labo terang.

¹⁹Tupung si e bali kap ras sekalak jelma si pulah i bas babah arimo nari tapi ndabuh ku babah buaya! Tah pe bagi sekalak jelma si mulih ku rumahna; tupung tertande ia ku dingding, itagut nipe tanna!

²⁰Wari TUHAN, tuhu-tuhu sada wari si gelap labo lit sitik pe terangna.

²¹Nina TUHAN, “Ciga ateKu perayan-perayan agamandu; mutah Aku ngidahsa! [14†]

²²Adi ibahanndu persembahen tutungen ras persembahen gandum, la Kualoken. Asuh-asuhen si enggo ipeburburndu janah ipersembahkenndu bangKu pe la Kualoken.

²³Ende-endenndu pe gejek Kuakap; pengadilah e. La ateKu bage megiken sora kulcapindu.

²⁴Tapi bahanlah maka kebujuren erburak-burak desken lau sumbul, dingen kebujuren desken lau belin si la pernah kerah.

²⁵O kalak Israel, kidekah kam Kubabai erdalan arah gurun pasir empat puluh tahun dekahna, la kap lit Kupindo persembahen gelehen ras persembahen si deban. [15†]

²⁶Tapi genduari, perban enggo isembahndu gana-gana Sakkut raja nu dibata-dibatandu, bage pe Kewan e me bintang si isembahndu jadi dibatandu, e maka arus pagi ibabandu gana-gana e

²⁷tupung Kubaba kam ku pembuangen ku sada negeri i lepar Damaskus,” bage nina TUHAN, si tergelar Dibata si Mada Kuasa.