Read Batak Karo AMOS 6 Bible Online

AMOS 6 - Batak Karo bible

AMOS 6

¹Cilaka me kam, o kam si nggeluh alu senang i Sion. Bage ka pe kam si nggeluh alu teneng i Samaria, kam kalak si mbelin i bas bangsa Israel si mbelin, kam si jadi ingan pengadun jelma si nterem!

²To perdiateken kuta Kalne. Kenca bage terusken ku kuta Hamat si mbelin e, jenari ngincuah ku kuta Gat kuta kalak Pilisti. Ulin kin kuta-kuta e asangken kerajan Juda ras Israel? Belangen kin daerahna asa negerindu?

³La kam nggit ngakuisa maka wari kecedan nandangi reh; tapi arah perbahanenndu, wari kecedan e reh pedasna ibahanndu seh.

⁴Bene me kam, o kam si medem-medem alu senang i bas bale-bale gading si meherga janahndu mangani daging lembu ras anak biri-biri!

⁵Rende-rende kam janah ngkuit kulcapi bali ras Daud nai.

⁶Iinemndu anggur, dem piga-piga mangkuk, janah ipakendu minak wangi si merimna, tapi la ceda atendu kerna kecedan si jadi man Israel.

⁷Erkiteken si e kam me si pemenana ibaba ku pembuangen. Pesta-pesta ras kerja-kerjandu nandangi peltep me.

⁸ TUHAN si Erdolat si Mada Kuasa enggo ersumpah nina, “Segat ateKu keganjangen ukur bangsa Israel; rumahna si mbelin dingen mejile ciga ateku. Ibukotana ras kasa kai isina Kubereken me man musuh.”

⁹Adi lit denga si sepuluh kalak sada rumah, mate me ia.

¹⁰Kade-kade si mate e, e me kalak si ertugas ngkuburkenca, maba bangke e ndarat i rumah nari. Kenca bage erlebuh ia man kalak si tading i bas rumah e nina, “Lit denga kalak si nggeluh i jena?” Ngaloi ia nina, “Lang!” kenca bage nina kade-kadena ndai, “Sipken! Ola kari terbelasken kita gelar TUHAN.”

¹¹Tupung ibelasken TUHAN perentah e, subuk rumah mbelin tah kitik, kerina iripukken seh getem.

¹²Banci kin kuda irattuh arah batu-batu? Banci kin itenggalai kalak lawit alu lembu? Tapi kam enggo isalihkenndu kebujuren jadi racun, si benar jadi salah.

¹³Imegahkenndu kal kerna kuta Lodebar si enggo ikuasaindu. Nindu, “Kuta Karnaim idat kami perban megegeh kami.”

¹⁴ TUHAN, Dibata si Mada Kuasa ngatakenca nina, “O bangsa Israel, Kusuruh me bangsa si deban engkuasai negerindu. Itindihna me kam mulai i Hamat nari i Utara terus ku Baluren Araba i Selatan.”