Read Batak Karo AMOS 7 Bible Online

AMOS 7 - Batak Karo bible

AMOS 7

¹Lit kuidah pengenehenen i bas TUHAN si Erdolat nari. I bas pengenehenen e kuidah TUHAN njadiken sada bala labang si melala. Labang e ijadiken kenca gagaten bagin asuh-asuhen raja isabi janah dukut mulai ka turah mulihi.

²I bas pengenehenen e kuidah labang ndai mangani kasa kai si meratah-ratah si lit i bas negeri e. E maka ningku, “O TUHAN si Erdolat, alemilah bangsandu. Kutera banci ia pulah i bas kiniseran e nari adi ia sada bangsa si kitik dingen la ergegeh?”

³Erkusur ukur TUHAN, janah nina, “Kai si iidahndu e labo pagi jadi.”

⁴Kuidah ka pengenehenen si deban i bas TUHAN si Erdolat nari. I bas pengenehenen e kuidah TUHAN ersikap-sikap ngukum bangsaNa alu api. Lawit si i teruh doni enggo keri ipan api e, janah negeri e pe enggo mulai ipanna.

⁵Kenca bage, ningku, “Pengadi min o TUHAN Dibata! Kutera banci bangsaNdu pulah i bas kiniseran e nari adi ia sada bangsa si kitik dingen la ergegeh?”

⁶Erkusur ukur TUHAN, janah nina, “Kai si iidahndu e labo pagi jadi.”

⁷Kuidah ka pengenehenen si deban i bas TUHAN nari. I bas pengenehenen e kuidah Ia tedis deherken sada tembok si ipajekken rikutken sada benang arang. Ia sangana njemak sada benang arang.

⁸IsungkunNa aku nina, “O Amos, kai idahndu?” “Benang arang,” ningku ngaloisa. Kenca bage nina, “Benang arang e Kupake lako encidahken maka bangsangKu desken sada tembok si la ngikutken benang arang. Ukurku lanai erkusur lako ngukum bangsa e.

⁹Kerina ingan-ingan i ja kesusuren Isak ersembah arus ikernepken. Ingan-ingan si badia nu Israel iradasken me. Kerajan Raja Jerobeam Kupeltepken alu pedang.”

¹⁰Kenca bage, Amasia, e me imam i Betel, nenahken sada berita man Jerobeam, raja Israel nina, “Amos sangana erbahan pertakin ngelawan kam i tengah-tengah bangsa e. Kerina pengeranana encedai negeri enda.

¹¹Bagenda kap nina: Jerobeam la banci lang mate denggo i bas perang, janah bangsa Israel ibaba i bas negerina nari ku pembuangen?”

¹²E maka nina Amasia man Amos, “To lawes o nabi! Mulih kam ku Juda janah i jahlah kam ernubuat. I jahlah kam ndarami nakan arah nubuatndu.

¹³Olanai kam ernubuat i Betel enda. Ingan enda ingan sembah-sembahen raja kap, ingan ersembah guna kerina kerajan.”

¹⁴Ngaloi Amos nina, “Aku labo nabi biasa si ernubuat guna ndatken upah. Aku sekalak si ngasuhi lembu dingen erpeken batang ara.

¹⁵Tapi ibuat TUHAN aku i bas dahinku nari selaku permakan jenari iperentahkenNa aku lawes lako ernubuat man bangsaNa Israel.

¹⁶Dage genduari begikenlah kai si ikataken TUHAN. Isuruhndu aku ngadi ernubuat, janah ilarangndu aku ngerana man bangsa Israel.

¹⁷Erkiteken si e, o Amasia, ikataken TUHAN man bandu, Ndeharandu jadi perlua-lua me pagi i pasar-pasar, janah anak-anakndu mate i bas perang. Tanehndu ibagi-bagiken man kalak si deban, janah kam jine mate i bas taneh kalak perbegu. Janah kalak Israel la banci lang ibaba me i negerina nari ku taneh pembuangen.”