Read Batak Karo AMOS 9 Bible Online

AMOS 9 - Batak Karo bible

AMOS 9

¹Kuidah TUHAN tedis deherken batar-batar. IperentahkenNa, nina, “Gudam takal binangun Rumah Pertoton e maka kumeger kerina berandana. Perperken maka pecah-pecahna ndabuh ku takal bangsa e kerina. Si debanna Aku munuhsa i bas perang. La lit sada pe si pulah, la lit si banci kiam.

²Aminna ikurukna pe lubangna kempak doni kematen. Kutangkap nge ia. Aminna nangkih pe ia ku langit, Kudabuhken ia ku teruh.

³Adi cebuni ia i datas Deleng Karmel, Kudarami seh dat Kutangkap. Adi cebuni ia i teruh lau lawit gelah ola Kuidah, Kuperentahken naga lawit engkaratca.

⁴Adi ibaba manusia ia tertaban ku pembuangen, Kuperentahken gelah ia ibunuh. Enggo Kutetapken lako engkernepken ia, labo nampatisa.”

⁵ TUHAN si Mada Kuasa, si Erdolat engkuit doni enda, e maka jadi me linur, kasa kai kalak si ringan i je erceda ate. Kerina doni enda nangkih, jenari surut bali ras Lau Nil i Mesir.

⁶ TUHAN erbahan rumahNa i Surga, janah ibahanna langit man penggelanggemen doni enda. Erlebuh Ia kempak lau lawit jenari iamburkenNa ku doni Gelarna e me kap TUHAN!

⁷Nina TUHAN, “O bangsa Israel, kam seri nge Kuidah ras bangsa Sudan. Bagi kam Kubaba i Mesir nari, bage ka nge pe kalak Pilisti Kubaba i Pulo Kreta nari, janah kalak Siria i Kir nari.

⁸Aku, TUHAN si Erdolat, Aku sangana mperdiateken kerajan Israel si perdosa e, e maka Kusasapken me i babo doni enda nari. Tapi labo kerina kesusuren Jakup Kusasapken.

⁹Kuperentahken me gelah kalak Israel isigi bagi page isigi tare ndiru. Kusigi ia i tengah-tengah bangsa-bangsa si deban gelah naktak kerina lapung-lapungna.

¹⁰Kalak perdosa si lit i tengah-tengah bangsangKu ibunuh me i bas perang, e me kerina kalak si ngataken, ‘Kami labo banci kena cilaka, labo seh mara man kami.’ ”

¹¹Nina TUHAN, “Reh me warina i ja kerajan Daud Kupajekken ka mulihi, si genduari bali ras sada rumah si enggo runtuh. Kupehuli tembok-tembokna janah Kupekena mulihi. Kupajekken ka mulihi janah Kubahan bali ras si nai-nai. [16†]

¹²Erkiteken si e italuken bangsa Israel me kasa kai negeri Edom si tading denga, bage pe kerina bangsa-bangsa si nai pernah igelari sikerajangenKu,” bage nina TUHAN si mahanca maka kerina si enda jadi.

¹³Nina TUHAN, “Reh me warina i ja gandum pedas perturahna seh maka lanai ngasup kalak peranisa. Buah anggur pedas tasak, lebih asa ngasup kalak merehsa jadi anggur. Anggur si ntebu sarintangtangen i deleng-deleng nari, maleren i bas uruk-uruk nari.

¹⁴Kubaba bangsangKu Israel mulih ku negerina. Ipantekina ka mulihi kuta-kutana, janah i je me ia ringan; isuanina peken anggur janah inemna lau anggurna; isuanina peken janah ipanna buah kelatihenna.

¹⁵Kupeturah bangsangKu i bas negeri si Kubereken man bana nai, janah ngayak ndigan pe lanai ia iruah i jenari.” Bagenda me nina TUHAN Dibatandu.