Read Batak Karo JUNA 1 Bible Online

JUNA 1 - Batak Karo bible

JUNA 1

¹Sekali, seh me kata TUHAN man Nabi Juna anak Amittai. [1†]

²Nina, “To, laweslah ku Niniwe, kuta si mbelin e, jenari kataken maka kuta e enggo ersalah, sabap kerina kejahatenna tangkas man bangKu.”

³Tapi Juna lawes ku ingan si deban, atena lompat i bas TUHAN nari. Lawes ia ku Jope, janah idapetina i je sada kapal si nandangi erlayar ku Sepanyol. Igalarina ongkosna, kenca bage inangkihina kapal ndai, guna erlayar ku Sepanyol ras anak kapal e, sabap lompat atena i bas TUHAN nari.

⁴Tapi ibahan TUHAN angin si meter rembus ku lawit, janah angin ras galumbang si merawa e menam pe pecah atena ibahanna kapal e.

⁵Seh kal biarna anak kapal e, e maka nderkuh ia kerina mindo penampat man dibatana sekalak-sekalak. Guna engkurangi berat kapal e, iambekken kalak ndai ku lawit barang-barang si lit i bas kapal. Sanga si e badeh kal pertunduh Nabi Juna; enggo kepeken ia lawes medem ku ruangan si lit i bas kapal e.

⁶Rembang reh ku je kapten kapal, e maka nina man Juna, “Kuga maka kam tunduh saja? Kekeken, ertotolah man dibatandu, mbera-mbera iperdiatekenna kita, maka ola kita bene.”

⁷Kenca bage nina kalak ndai sapih-sapih ia, “Ertikam-tanduklah kita, gelah sieteh erkiteken salah ise maka kita kena cilaka enda.” Jenari ertikam tanduk ia, kena gelar Juna.

⁸E maka nina anak kapal e kempak Juna, “Kataken man kami, erkiteken salahndu kin maka kita kena cilaka enda? Kai dahinndu? I ja nari kam? Kalak kai kam?”

⁹“Aku kalak Heber,” nina Juna njabapsa. “Aku nembah man TUHAN, Dibata nu langit, si njadiken lawit ras daraten.”

¹⁰Kenca bage iturikenna pe tole maka lompat atena i bas TUHAN nari. E maka mbiar kal anak-anak kapal e, janah nina man Juna, “Uga maka bage perbahanndu!”

¹¹Sanga si e angin ras galumbang lawit tetap reh rawana. E maka isungkun anak-anak kapal e Nabi Juna nina, “Kuga arus perbahan kami man bandu gelah lawit enda olanai merawa man kami?”

¹²Ngaloi Juna nina, “Ambekkenlah aku ku lawit maka tenang ka ia mulihi. Kueteh maka erkiteken salahku nge maka angin kaba-kaba enda reh engkenai kam.”

¹³Tapi la akapna mehuli ngikutken kata Juna. E maka asa gegehna icubakenna engkayuhken kapal e ku tepi, tapi la ngasup ia perban angin tetap reh gegehna nungsangsa.

¹⁴Erkiteken si e ertoto kalak ndai man TUHAN nina, “O TUHAN, mekuahlah ateNdu, ola min ibuatNdu kesah kami erkiteken ibunuh kami kalak si la ersalah. Sabap Kam jine kap si enggo erbahan sue ras peratenNdu.”

¹⁵Kenca bage iangkat kalak ndai Juna, jenari ibenterkenna ku lawit, janah minter teneng lau lawit e.

¹⁶Ngidah si e seh kal biarna anak kapal e man TUHAN. E maka igelehna asuh-asuhen jadi persembahen man TUHAN, jenari erpadan ia nembah TUHAN.

¹⁷Kenca Juna ibenterken ku bas lawit, isuruh TUHAN sada nurung si seh kal galangna nelen Juna. Telu wari telu berngi dekahna ia i bas beltek nurung e. [2†]