Read Batak Karo JUNA 2 Bible Online

JUNA 2 - Batak Karo bible

JUNA 2

¹I bas beltek nurung e nari ertoto Juna man TUHAN Dibatana nina,

²I bas kiniseranku nari kulebuh Kam o TUHAN janah ialoiNdu aku. I bas doni kematen si mbagesna nari nderkuh aku mindo penampat, e maka ibegikenNdu aku.

³IsampetkenNdu aku ku tengah lawit si mbagesna i je ikeleweti lau aku, galumbang si ergalun isuruhNdu namburi aku.

⁴Kuakap enggo ibuangkenNdu aku i bas adep-adepenNdu nari, janah lanai ndigan pe kuidah RumahNdu si badia.

⁵Lau si ergalun reh namburi aku, narus mate ibahanna aku. Aku gedap i bas lawit si mbages, janah lumut-lumut ngelilet takalku.

⁶Enggo nusur aku ku palas deleng-deleng, ku negeri i ja kerabangenna ieruk seh rasa lalap. Tapi, o TUHAN DibatangKu, irintakNdu kepe aku i bas ingan si mbages nari maka aku nggeluh ka mulihi.

⁷Tupung nandangi keri atena kesahku, i je ertoto aku man baNdu; e maka ibegikenNdu aku i bas RumahNdu si badia nari.

⁸Kalak si nembah man berhala si la erkuasa, itadingkenna kap kecionna si tuhu-tuhu.

⁹Tapi aku, kuendeken kap puji-pujinku man baNdu; kubahan me persembahenku man baNdu, janah kusehken ateku kai si enggo kupadanken. Sabap i bas Kam nari kap rehna keselamaten TUHAN.

¹⁰Kenca bage isuruh TUHAN me nurung ndai ngutahken Juna ku daraten, e maka iutahkenna.