Read Batak Karo JUNA 3 Bible Online

JUNA 3 - Batak Karo bible

JUNA 3

¹Reh ka kata TUHAN peduakaliken man Juna,

²Nina, “To laweslah ku Niniwe, kuta si mbelin e, janah momokenlah man anak kuta e kata si enggo Kupeseh man bandu.”

³E maka iikutken Juna kata TUHAN, lawes ia ku Niniwe. Kuta Niniwe seh kal belinna, e maka telu wari erdalan nahe maka terbentasi.

⁴Ibenaken Juna erdalan arah tengah kuta e, janah kenca erdalan gedang-gedang wari imomokenna nina, “Empat puluh wari nari ikernepken me kuta Niniwe!” [3†]

⁵Anak kuta Niniwe tek man kata Dibata. E maka itetapkenna maka kerina arus erpuasa dingen make uis guni, subuk kalak si meganjang pangkatna bage pe si meterukna, tandana ia enggo jera kerina.

⁶Kenca ibegi raja Niniwe kerna si e, nusur ia i bas kursi kinirajanna nari, itangtangina jubahna, jenari ipakena uis guni, e maka kundul ia i bas abu.

⁷Isuruhna gelah imomoken man kalak Niniwe bagenda, “Enda perentah i bas raja ras pegawai-pegawaina nari. La banci ise pe man kai pe; kerina jelma, bage pe asuh-asuhen si mbelin ras si kitik, la banci man, la banci minem.

⁸Kerina jelma arus make paken guni bage pe asuh-asuhen. Sekalak-sekalak arus tutus ertoto man Dibata, janah itadingkenna lagu langkahna si melket dingen ipengadina perbahanen-perbahanen si jahat.

⁹Mbera-mbera salih ukur Dibata; mbera-mbera olanai ateNa nembeh, maka ola kita mate!”

¹⁰Iidah Dibata kai si ilakoken kalak ndai; iidahNa pe maka lanai ia ngelakoken perbahanen si jahat. E maka salih ukur Dibata, janah la surung iukumNa kalak e aminna pe enggo ikatakenNa iukumNa ateNa.