Read Batak Karo BILANGEN 10 Bible Online

BILANGEN 10 - Batak Karo bible

BILANGEN 10

¹Nina TUHAN man Musa,

²“Bahan dua terompet. Terompet e itepa i bas pirak nari gelah ipake guna ndilo kalak Israel pulung ras nuruh berkat nadingken ingan erkemah.

³Adi duana terompet e iembus alu sora nggedang, kerina perpulungen e arus pulung njumpai kam i bas dalan bengket Kemah Perjumpan.

⁴Tapi adi sada terompet saja ngenca iembus, kepala-kepala terpuk saja ngenca pulung njumpai kam.

⁵Adi sora terompet gendek-gendek, suku-suku si erkemah arah Timur arus berkat ndarat.

⁶Adi terompet ersora gendek-gendek pedua kaliken, suku-suku si arah Selatan arus berkat. Sora terompet arus ibahan gendek-gendek tuhu-tuhu nandaken maka kemah arus itadingken.

⁷Tapi ndilo perpulungen pulung, sora terompet nggedang ibahan.

⁸Terompet-terompet e arus iembus anak-anak Harun, imam-imam e. Peraturen-peraturen si arah teruh enda pe arus ikutken i bas kerina paksa-paksa si reh enda.

⁹Adi kam sangana erperang i bas negerindu, mpertahanken dirindu i bas musuh si merang kam, embus lah terompet enda jadi sada tanda erperang. Aku, TUHAN Dibatandu, si nampati ras mulahi kam i bas musuh-musuhndu nari.

¹⁰Bage pe i bas paksa-paksa keriahen i bas Pesta-pesta Bulan si mbaru ras pesta-pesta agama si debanna arus iembusndu terompet e tupung ibahanndu persembahen tutungen ras persembahen-persadanndu. Adi bage Aku si nampati kam. Aku kap TUHAN Dibatandu.”

¹¹I bas wari pedua puluhken bulan si peduaken kenca bangsa Israel dua tahun dekahna nadingken Mesir, nangkih me embun si lit i babo Kemah Perjumpan e.

¹²E maka ibenaken bangsa Israel perdalanenna si ndauh ndarat i bas gurun pasir Sinai nari. Embun e seh i bas sada ingan si la ingani jelma, Paran gelarna, janah ngadi ia i je.

¹³Kenca reh perentah TUHAN arah Musa, mulai me kalak Israel erdalan.

¹⁴Janah tep-tep kali ia pindah uruten si erdalan tetap seri. Kalak si i teruh bendera perpulungen si ipinpin suku Juda erdalan arah lebe, erterpuk-terpuk. Si minpinsa e me kap Nahason anak Aminadap.

¹⁵Netanel anak Suar minpin suku Isakar,

¹⁶janah Eliap anak Helon minpin suku Sebulon.

¹⁷Kenca bage Kemah e ibongkar, jenari terpuk Gerson ras Merari, si maba Kemah e, mulai berkat.

¹⁸Kenca bage, kalak si i teruh bendera perpulungen si ipinpin suku Ruben mulai ka berkat erterpuk-terpuk. Si minpinsa e me kap Elisar anak Sedeur.

¹⁹Selumiel anak Surisaddai minpin suku Simeon,

²⁰janah Eliasap anak Rehuel minpin suku Gat.

²¹Kenca bage suku Lewi i bas terpuk Kohat berkat maba barang-barang si badia e, janah adi enggo seh ia i bas ingan erkemah si mbaru, Kemah enggo dung ipajekken.

²²Seterusna, kalak si i teruh bendera perpulungen si ipinpin suku Eperaim mulai ka berkat erterpuk-terpuk. Si minpinsa e me kap Elisama anak Ammihut.

²³Gamaliel anak Pedasur minpin suku Manase,

²⁴janah Abidan anak Gideoni minpin suku Benyamin.

²⁵Kedungenna, kalak si i teruh bendera perpulungen suku Dan, si ertugas njagai perpulungen e kerina arah pudi, mulai ka berkat erterpuk-terpuk. Si minpinca e me kap Ahieser anak Ammisaddai.

²⁶Pagiel anak Ohran minpin suku Aser,

²⁷janah Ahira anak Enan minpin suku Naptali.

²⁸Bagenda me dage uruten perdalanen, erterpuk-terpuk, adi berkat kenca bangsa Israel mindahken inganna erkemah.

²⁹Ikataken Musa man silihna, Hobap anak Jetero, kalak Midian, nina, “Ate kami berkat ku ingan si ikataken TUHAN si ateNa iberekenNa man kami. Enggo Ia erpadan erbahan si mehuli man Israel, e maka marilah ras kita, janah banci irasken kami kebayaken kami e ras kam.”

³⁰Erjabap Hobap nina, “Aku mulih saja gia ku kutangku.”

³¹“Ola min itadingkenndu kami,” nina Musa. “Kam itehndu i ja kami banci erkemah i bas taneh si mesawang e, janah banci kam si nuduhken dalan man kami.

³²Adi nggit kam berkat ras kami, ibereken kami pagi baginndu i bas kerina pasu-pasu si ibereken TUHAN man kami.”

³³Tupung bangsa e nadingken Sinai, deleng TUHAN e, erdalan ia telu wari dekahna. Peti Perpadanen TUHAN tetap leben asa kalak ndai guna ndatken sada ingan erkemah man bana kerina.

³⁴Adi pindah ia i bas tep-tep ingan erkemah nari, embun TUHAN tetap i babona suari.

³⁵Tupung Peti Perpadanen e ipeberkat, e maka nina Musa, “Tedis lah, o TUHAN, kerapken imbang-imbangNdu janah bahan lah maka lompaten kerina kalak siernembeh ate man baNdu!” [11†]

³⁶Janah adi ngadi kenca Peti e nina Musa, “Mulihlah, TUHAN, ku Israel si meribu-ribu keluarga teremna.”