Read Batak Karo BILANGEN 11 Bible Online

BILANGEN 11 - Batak Karo bible

BILANGEN 11

¹Bangsa Israel mulai jungut-jungut man TUHAN kerna kesusahen-kesusahenna. Tupung ibegi TUHAN si e, nembeh ateNa jenari ipesusurNa api ku bangsa e. Api e gara i tengah-tengahna janah meseng ibahanna tepi ingan erkemah e.

²E maka nderkuh bangsa e mindo penampat man Musa; ertoto ia man TUHAN jenari minter nimpet api ndai.

³Erkite-kiteken si e ingan ndai ibahan gelarna Taberah, sabap i bas ingan e gara api TUHAN i tengah-tengah bangsa Israel.

⁴Lit piga-piga kalak asing ikut i bas perdalanen ras bangsa Israel e. Lanai kal lang-lang rincuhna ia man daging, janah bangsa Israel jine pe enggo mulai jungut-jungut nina, “Lit kin min daging man panganta!

⁵Adi i Mesir biasa kita rate-ate man nurung, janah la nukur pe. Ma siinget denga kin biasa lit i bas kita cimen, mandike, pere, pia, lasuna?

⁶Tapi genduari enggo kote kita kerina. Kai kal pe la lit man panganen, kai pe la lit seakatan manna enda saja tep-tep wari!” (

⁷Manna seri ras buah jera, rupana mbentar megersing. [12†]

⁸[8-9] Manna e ndabuh i bas ingan erkemah e berngi radu ras remang. Pepagina bangsa Israel lawes pepulungsa, igilingna ntah pe itutuna jadi tepung, jenari itasakkenna, ibahanna jadi roti si menipes. Nanamna bali ras nanam roti si ipanggang ras minak saitun.) [13†]

¹⁰Ibegi Musa kerina kalak ndai jungut-jungut janah tedis pulung-pulung i bas dalan bengket ku bas kemahna. Lesek kal ate Musa sabap nembeh ate TUHAN man kalak ndai kerina.

¹¹E maka nina Musa man TUHAN, “Engkai maka bage la ulina perbahanenNdu man bangku? Engkai maka la ateNdu keleng man bangku? Engkai maka isuruhNdu aku ertanggung jawab kerna kerina bangsa enda?

¹²Labo aku si njadiken ia ntah pe si mupus ia! Engkai maka isuruhNdu aku ngerawat ia ras ngangkip-ngangkip ia desken anak-anak, terus ku bas taneh si ipadankenNdu ras nini-ninina?

¹³I ja nge terbuat aku daging cukup man kalak enda kerina? Denge-denge ia lalap mindo daging.

¹⁴I ja nge terurus aku ia kerina! Mberatsa kuakap bage!

¹⁵Adi bagenda kin perbahanenNdu man bangku, mekuahlah ateNdu, bunuh lah aku, gelah lanai padah kugengken perbahanenNdu si kejam e.”

¹⁶Nina TUHAN man Musa, “Pepulunglah pitu puluh kalak dilaki si ihamati kalak selaku peminpin-peminpin bangsa e. Baba ia kerina ngadap man bangKu i bas Kemah Perjumpan e, janah suruh ia kerina tedis i deherndu.

¹⁷Nusur Aku ku je, jenari ngerana Aku ras kam, janah Kubuat deba kuasa si enggo Kubereken man bandu jenari Kubereken man bana kerina. Kenca bage enggo banci isampatina kam ngepkep bangsa enda, janah lanai kam saja ngenca mersan tanggung jawab e.

¹⁸Genduari kataken lah man bangsa e kerina, nindu, ‘Bersihken lah dirindu guna si pepagi, sabap pepagi kam daten daging si man panganndu. TUHAN enggo megi kam denge-denge alu ngataken maka merincuh kam ndat daging, janah maka nindu sikapen iakapndu i Mesir. E maka ate TUHAN mereken daging man bandu, janah arus ipanndu e.

¹⁹Labo sada ntah dua wari saja ngenca arus ipanndu e, ntah pe lima, sepuluh, ntah pe dua puluh wari,

²⁰tapi dem sada bulan, seh ndaraten arah cupingndu, seh mutah kam ibahanna. Enda jadi erkite-kiteken enggo itulakndu TUHAN si ringan i jenda i tengah-tengahndu, janah enggo kam jungut-jungut man baNa alu ngataken, maka erkadiola kam nadingken Mesir.’ ”

²¹Nina Musa man TUHAN, “Kalak si kupinpin enda lit teremna 600.000 kalak, janah nindu iberekenNdu man bana daging cukup sada bulan dekahna?

²²Banci kin lit cukup lembu ras biri-biri igeleh mesuri ia? Kerina gia ikan i lawit cukup kin man bana?”

²³“Lit kin sibarna gegehKu?” nina TUHAN erjabap. “Idahndu me kai si Kukataken e tuhu-tuhu jadi ntah lang!”

²⁴E maka lawes Musa ndarat janah iturikenna man bangsa e kai si enggo ikataken TUHAN. Ipepulungna pitu puluh peminpin, jenari isuruhna ia kerina tedis i sekelewet Kemah e.

²⁵Kenca bage reh TUHAN ku teruh i bas embun jenari ngerana ia man Musa. Ibuatna deba kesah si enggo iberekenNa man Musa, jenari iberekenNa man peminpin-peminpin si pitu puluh kalak e. Tupung kesah ndai reh man kalak ndai, minter ia ngerana kerina alu sora si megang desken nabi-nabi, tapi i bas paksa e ngenca.

²⁶Dua i bas peminpin si pitu puluh kalak e, Eldat ras Medat, tading ia i bas ingan erkemah e, janah la ia ndarat ku Kemah Perjumpan e. E maka reh me kesah ndai ku ia duana i bas ingan erkemah e, jenari ia pe minter ngerana alu sora si megang bagi nabi-nabi.

²⁷Sekalak anak perana minter kiam ndarat ngatakenca man Musa kai sangana ibahan Eldat ras Medat.

²⁸Kenca bage Josua anak Nun, si enggo jadi pembantu Musa mulai anak peranana nari, ngerana man Musa nina, “O bapa, laranglah ia!”

²⁹Erjabap Musa nina, “Cemburu kin kam erkiteken aku? Adi banci merincuh aku maka ibereken TUHAN min kesahNa man kerina bangsaNa gelah banci ngerana bagi nabi-nabi!”

³⁰Kenca bage Musa ras peminpin-peminpin bangsa Israel si pitu puluh e mulihken ku ingan erkemah.

³¹Jenari ibahan TUHAN me angin rembus. Ibaba angin e leto i lawit nari, ergun-gun seh sada meter ganjangna i babo taneh. Cinep ia kerina i bas ingan erkemah e ras i sekelewetna seh piga-piga kilometer ku tep-tep penjuru.

³²E maka i bas gedang-gedang wari e, gedang-gedang berngi, terus ku bas wari si pepagina, kalak Israel kuskas nangkap leto. La lit sekalak pe si pepulungsa kurang seribu kilo. Ierapkenna i sekelewet ingan erkemah e guna ngkerahkenca.

³³Tupung melala denga daging si man panganna, merawa TUHAN man bangsa e, janah ipeturahNa penakit ngkenai nterem jelma i tengah-tengah bangsa e.

³⁴Ingan ndai igelari “Kuburen Kalak Rangap”, sabap i bas ingan e ikuburkenna kalak si rangap man daging.

³⁵I bas ingan e nari bangsa e miser ku Haserot, janah i je ibahanna inganna erkemah.