Read Batak Karo BILANGEN 12 Bible Online

BILANGEN 12 - Batak Karo bible

BILANGEN 12

¹Iempoi Musa sekalak diberu bangsa Kus, e maka isalahken Miriam ras Harun ia erkiteken si e.

²“Arah Musa saja kin ngenca TUHAN ngerana? Ma arah kita pe enggo me ia ngerana?” nina. Ibegi TUHAN kai si ikatakenna e. (

³Musa e me sekalak si meteruk rukur; ukurna si meterukna i bas kerina manusia i bas doni enda.)

⁴Kenca si e, minterikataken TUHAN man Musa, Harun ras Miriam nina, “Reh kam teluna ku Kemah Perjumpan.” Berkat ia teluna,

⁵jenari reh TUHAN ku teruh i bas tiang embun, tedis i bas dalan bengket ku bas Kemah e. Erlebuh ia nina, “Harun! Miriam!” Ku lebe ia duana,

⁶jenari nina TUHAN, “Genduari begiken lah katangKu! Tupung lit nabi-nabi i tengah-tengahndu, Kucidahken diringKu man bana i bas pengenehenen ras ngerana Aku man bana i bas nipina.

⁷Tapi adi ngerana Aku ras Musa suruh-suruhenKu, la bage; ia terteki i bas kerina dahinKu. [14†]

⁸E maka Aku ras ia ngerana petalatala, alu terus terang, janah la alu anding-andingen; rupangKu pe enggo idahna! Engkai maka bage pangna kam ngerana ngelawan Musa, suruh-suruhenKu e?”

⁹Merawa TUHAN man bana duana; e maka tupung TUHAN lawes,

¹⁰janah embun ndai nadingken Kemah e, daging Miriam rempet enggo dem alu penakit kulit janah rupana enggo salih jadi mbentar bagi kapas. Tupung inen Harun ku Miriam janah idahna maka ia enggo kena penakit kulit,

¹¹nina man Musa, “Ngarap kal aku maka ola min kami ikenai ukumen si mberat enda erkite-kiteken dosa kami ras kebodohen kami.

¹²Ola min ipelepasndu ia desken sekalak anak si enggo mate tupung tubuhna, sebap setengah dagingna e enggo macik.”

¹³E maka erlebuh Musa man TUHAN nina, “O Dibata, pepalem min ia!”

¹⁴Nina TUHAN erjabap, “Adi iciduri bapana ayona, ma mela akapna pitu wari dekahna? E maka pedarat lah ia i bas ingan erkemah e nari sada minggu dekahna, janah kenca si e banci ia ibaba mulihken ku bas.” [15†]

¹⁵E maka Miriam ipedarat i bas ingan erkemah e nari pitu wari dekahna, janah bangsa e la nerusken perdalanenna seh Miriam ibaba mulihken ku bas ingan erkemah.

¹⁶Kenca e itadingkenna Haserot jenari ipajekkenna kemahna i taneh mesawang, Paran.