Read Batak Karo BILANGEN 13 Bible Online

BILANGEN 13 - Batak Karo bible

BILANGEN 13

¹Nina TUHAN man Musa,

²“Pilihlah sekalak i bas peminpin-peminpin tep-tep merga si sepuluh dua e, jenari suruhlah ia jadi mata-mata ku taneh Kanaan gelah iselidikina taneh, si ateKu Kubereken man bangsa Israel.”

³ [3-15] Ipatuhi Musa perentah TUHAN, e maka i bas taneh mesawang Paran e nari isuruhna peminpin-peminpin si tersurat arah teruh enda: [Suku:] — [Gelar peminpin e:] Ruben — Sammua anak Sakur Simeon — Sapat anak Hori Juda — Kalep anak Jepune Isakar — Igal anak Jusup Eperaim — Hosea anak Nun Benyamin — Palti anak Rapu Sebulon — Gaddiel anak Sodi Manase — Gaddi anak Susi Dan — Ammiel anak Gemalli Aser — Setur anak Mikael Naptali — Nahbi anak Wopsi Gat — Geuel anak Maki

¹⁶Enda me mata-mata si isuruh Musa gelah iselidikina negeri e. Isambarina gelar Hosea anak Nun jadi Josua.

¹⁷Tupung isuruh Musa ia lawes nina man bana kerina, “Lawes lah kam ku Utara i bas ingan enda nari ku bagin Selatan taneh Kanaan janah kenca e terus ku daerah si lit uruk-urukna.

¹⁸Pepayo, ntah taneh si kuga e, nterem ntah lang pendudukna, janah kuga gegehna.

¹⁹Pepayo taneh e mehuli ntah lang, ntah kalak si i je nggeluh i bas kuta-kuta si la erbenteng ntah i bas kuta-kuta si erbenteng.

²⁰Pepayo ntah taneh e mehumur dingen melala i je turah batang-batang kayu. Janah ola kam lupa maba buah pangan si turah i je.” (Tupung e sangana musim buah anggur mulai tasak.)

²¹E maka lawes kalak ndai kerina ku Utara, jenari iselidikina taneh e mulai i bas taneh si mesawang Sin arah Selatan terus ku Rehop, deherken sada dalan, Hamat gelarna, arah Utara.

²²Mula-mula lawes ia ku bagin Selatan taneh e janah seh ia ku Hebron i ja ringan kalak Ahiman, Sesai, ras Talmai, e me kesusuren sada bangsa manusia raksasa si igelari kalak Enak. (Hebron ipajekken leben pitu tahun asa Soan i Mesir.)

²³Seh ia ku Baluren Eskol, janah i je ikeretna sada tandan buah anggur. Bage beratna buah anggur si sada tandan e seh maka dua kalak ngelanjasa maka terbaba. Tambah si e ibabana pe mulih buah galiman ras buah ara. (

²⁴Ingan e igelari Baluren Eskol sabap i je me buah anggur si ikeret kalak Israel.)

²⁵Kenca iselidikina negeri e empat puluh wari dekahna, mulih mata-mata ndai

²⁶ndahi Musa ras Harun, ras kerina perpulungen bangsa Israel i Kades i bas taneh mesawang Paran. Iturikenna kerina kai si enggo idahna janah icidahkenna pe buah pangan si ibabana.

²⁷Nina kalak ndai man Musa, “Iselidiki kami taneh e janah enggo iteh kami maka taneh e tuhu-tuhu mehuli ras mehumur; enda kap deba buah sinuan-sinuanna.

²⁸Tapi kalak si ringan i je tuhu-tuhu megegeh, janah kuta-kutana mbelin janah ibentengi alu mehuli. Si cilakana idah kami i je kesusuren manusia raksasa.

²⁹Kalak Amalek ringan arah bagin Selatan taneh e; kalak Heti, Jebusi ras Amori ringan i daerah si melala uruk-urukna; janah kalak Kanaan ringan i tepi Lawit Tengah ras i gedang-gedang Lau Jordan.”

³⁰Ipesinik Kalep kalak si sangana jungut-jungut man Musa, janah nina, “Arus maka siserang ia genduari janah sikuasai taneh e; kita cukup megegeh guna ngkuasaisa.”

³¹Tapi nina kalak si lawes ras Kalep ndai, “Lang, gegehta la cukup lako merang ia; kalak si i je gegehen asa kita.”

³²E maka ipebelangna berita palsu i tengah-tengah bangsa Israel kerna taneh si enggo iselidikina e. Nina, “Asil taneh e la cukup mere man kalak si ringan i je pe. Kerina kalak si idah kami nggedang mbelin kal,

³³janah idah kami pe manusia raksasa i je, e me kesusuren Enak. Bagi labang e nari ngenca iakap kami man kami, janah bagem pengidah kami kerna ia.” [16†]