Read Batak Karo BILANGEN 14 Bible Online

BILANGEN 14 - Batak Karo bible

BILANGEN 14

¹Gedang-gedang berngi tangis bangsa e perban lesekna atena.

²Ijunguti kalak e si Musa ras Harun nina, “Ulin min mbarenda mate i Mesir ntah i bas taneh mesawang enda!

³Engkai maka ibaba TUHAN kami ku negeri e? Nandangi mate me kami i bas peperangen, jenari ndehara kami ras anak-anak kami itaban. Ma ulin kami mulih ku Mesir?”

⁴E maka nina sapih-sapih ia, “Marilah sipilih sekalak peminpin jenari mulih kita ku Mesir!”

⁵Kenca bage erjimpuh Musa ras Harun i lebe-lebe bangsa e kerina, ayona seh ku taneh.

⁶Janah Josua anak Nun ras Kalep anak Jepune, dua kalak i bas mata-mata e, ncaingken uisna perban cedana atena.

⁷Jenari nina man bangsa e, “Negeri si iselidiki kami tuhu-tuhu sada negeri si seh kal ulina.

⁸Adi ngena ate TUHAN man banta, la banci la ibabaNa kita ku je, jenari iberekenNa man banta negeri si mehuli ras si mehumur e.

⁹Ola lawan TUHAN janah ola mbiar man kalak si ringan i bas negeri e. La banci la sukah siakap naluken ia. TUHAN kap ras kita janah enggo italukenNa dibata-dibata si ngkawali ia kerina; e maka ola mbiar.” [17†]

¹⁰Kerina perpulungen e ngancam Josua ras Kalep. Ibenterina atena alu batu. Tapi rempet idah bangsa e sinalsal terang kerehen TUHAN mbincar i babo Kemah Perjumpan e.

¹¹Nina TUHAN man Musa, “Asa kai nari dekahna bangsa enda nulak Aku? Asa kai nari dekahna la ia nggit tek man bangKu, aminna gia enggo Kubahan melala tanda kuasa i tengah-tengahna?

¹²Erkiteken si e la banci lang Kutamaken sada penakit gelah kernep ia, tapi Kubahan kam jadi bapa sada bangsa si belinen janah gegehen asa ia!”

¹³Tapi nina Musa man TUHAN, “IbabaNdu bangsa enda ndarat i Mesir nari alu gegehNdu. Adi ibegi kalak Mesir pagi kai si enggo ibahanNdu man bangsaNdu, [18†]

¹⁴tentu iturikenna e man bangsa si ringan i bas taneh enda. Bangsa-bangsa si i jenda enggo megi maka Kam, o TUHAN, ras kami kap; enggo pe ibegina maka Kam tangkas teridah tupung embunNdu ngadi i babo kami, janah Kam erdalan arah lebe kami suari i bas tiang embun janah berngi i bas tiang api.

¹⁵Genduari adi ibunuhNdu kin kerina bangsaNdu, bangsa-bangsa si enggo megi berita kerna kiniulinNdu e tentu ngataken,

¹⁶maka ibunuhNdu bangsaNdu i bas taneh si mesawang, e me erkite-kiteken la ngasup Kam maba ia bengket ku bas taneh si enggo ipadankenNdu man bana.

¹⁷E maka TUHAN, ertoto aku man baNdu, cidahkenlah man kami gegehNdu janah bahanlah bagi si enggo ipadankenNdu tupung niNdu,

¹⁸‘Aku, TUHAN, la sukah merawa, mbelin kekelengenKu, setia, ras dem pengalemi dosa ras kesalahen. Tapi la banci la Kuukum anak ras kempu-kempu seh ku bas kesusuren si peteluken ras si peempatken erkite-kiteken salah orang tuana.’ [19†]

¹⁹E maka genduari, TUHAN, sue ras kekelengenNdu si mbelin, si tetap, mindo kal aku, gelah ialemiNdu min dosa bangsa enda, bagi enggo ialemiNdu ia mulai kin tupung itadingkenna negeri Mesir.”

²⁰Nina TUHAN erjabap, “Kualemi ia, sue ras pemindonndu.

²¹Tapi erpadan Aku maka la banci lang, bagi Aku nggeluh janah kemulianKu la banci la ndemi doni enda, [20†]

²²sada pe la lit kalak enda bengket ku bas negeri e. Enggo idahna sinalsalKu ras tanda-tanda kuasa si Kubahan i Mesir ras i bas taneh mesawang, tapi la erngadi-ngadi iujina kesabarenKu janah la ia nggit erkemalangen man bangKu.

²³E maka la banci ia ngidah negeri si enggo Kupadanken man nini-ninina. La lit sada pe si enggo nulak Aku banci ngidah negeri e.

²⁴Tapi erkite-kiteken suruh-suruhenKu Kalep la seri ukurna ras kalak si deban janah ia tetap setia man bangKu, Kubaba ia bengket ku bas negeri si enggo iselidikina e, janah kesusurenna la banci la dat taneh e, [21†]

²⁵i ja genduari kalak Amalek ras kalak Kanaan sangana ringan i bas berneh-bernehna. Mulihlah pagi jenari laweslah ku taneh si mesawang kempak arah Teluk Akaba.”

²⁶Nina TUHAN man Musa ras Harun,

²⁷“Asa kai nari dekahna bangsa si jahat enda jungut-jungut man bangKu? Enggo leja aku megi sorana jungut-jungut!

²⁸Genduari pesehlah kata enda man bana, ‘Ersumpah Aku maka la banci lang, bagi Aku nggeluh, Kusehken man bandu bagi si ikatakenndu. Aku kap si ngerana, e me TUHAN.

²⁹La banci la kam mate janah mait-maitndu merap i belang-belang taneh mesawang. Sabap enggo kam jungut-jungut man bangKu, la lit sada pe kam si umurna lebih dua puluh tahun banci bengket ku bas negeri e. [22†]

³⁰Tuhu enggo erpadan Aku maka Kubere kam ringan i je, tapi genduari sada pe lanai Kubere, seakatan Kalep ras Josua.

³¹Ikatakenndu maka anak-anakndu la banci la itaban musuh, tapi Kubaba ia bengket ku bas negeri si itulakndu e, janah e me pagi jadi inganna erkuta.

³²Kam la banci la mate i bas taneh si mesawang enda.

³³Anak-anakndu mampa-mampa i bas taneh si mesawang empat puluh tahun dekahna, ngenanami kiniseran erkite-kiteken kam la setia man bangKu, seh kerina kam enggo mate pagi. [23†]

³⁴Empat puluh wari dekahna iselidikindu taneh e; tep-tep wari ikira sada tahun, jadi empat puluh tahun; e maka kam pe la banci la ngenanami kiniseran empat puluh tahun dekahna perban dosandu e. Itehndu me kai ertina adi Aku jadi imbangndu!

³⁵Ersumpah Aku maka enda la banci la Kusehken man bandu, kam kalak jahat si ersada ukur guna ngelawan Aku. I jenda, i bas taneh mesawang enda, sekalak-sekalak kam la banci la mate. Aku kap si ngerana, e me TUHAN.’ ”

³⁶ [36-37] Kalak si enggo isuruh Musa nelidiki taneh e ngataken si la tuhu si erbahanca bangsa e jungut-jungut man TUHAN. Janah erkite-kiteken si e ikenai TUHAN ia alu sada penakit, e maka mate ia.

³⁸I bas mata-mata si sepuluh dua kalak e, Josua ras Kalep ngenca tading.

³⁹Tupung ituriken Musa man bangsa Israel kai si enggo ikataken TUHAN, ceda kal atena kerina.

⁴⁰Pepagina lampas berkat ia merang daerah uruk-uruk e, sabap nina, “Genduari enggo sikap kami lawes ku bas ingan si enggo ituriken TUHAN man kami. Iakui kami maka kami enggo erdosa.”

⁴¹Tapi nina Musa, “Dage ngkai maka isimbakndu TUHAN genduari? Labo banci kam menang!

⁴²La padah kam lawes. TUHAN la ras kam, e maka ugapa pe italuken musuhndu nge kam.

⁴³Adi ijumpaindu kalak Amalek ras kalak Kanaan, tentu mate kam i bas peperangen e; ugapa pe TUHAN labo ras kam, sabap la kam nggit ngikutken Ia.”

⁴⁴Bage gia pang denga kang ia lawes nangkeng ku daerah uruk-uruk e, aminna gia Peti Perpadanen TUHAN ras Musa tetap tading i bas ingan erkemah.

⁴⁵Kenca bage reh me kalak Amalek ras kalak Kanaan si ngiani daerah e, iserangna ras italukenna kalak ndai, janah iayak-ayakna pe seh ku Horma.