Read Batak Karo BILANGEN 16 Bible Online

BILANGEN 16 - Batak Karo bible

BILANGEN 16

¹ [1-2] Korah anak Isar, i bas kalak Lewi terpuk Kohat nari, berontak ngelawan Musa. Ikut pe ras ia telu kalak i bas suku Ruben nari, e me Datan ras Abiram anak Eliap, ras On anak Pelet, ras bage pe dua ratus lima puluh kalak Israel si deban, peminpin-peminpin si terberita si ipilih perpulungen. [27†]

³Pulung ia kerina i lebe-lebe Musa ras Harun jenari nina, “Enggo lebihsa perbahanenndu e! Kerina anggota perpulungen enda TUHAN empuna, janah TUHAN rembak ras kita kerina. Engkai dage, o Musa, maka ipeganjangkenndu man bandu i babo perpulungen TUHAN?”

⁴Tupung ibegi Musa enda, minter idampeskenna bana ku taneh jenari ertoto ia.

⁵Kenca bage nina man Korah ras kerina pengikutna, “Erpagi-pagi e pagi ituduhken TUHAN man banta ise kin sikerajangenNa; kalak sikerajangenNa, ntah pe kalak si enggo ipilihNa, ipelepasNa ndeheri Ia i bas batar-batar.

⁶[6-7] Pagi erpagi-pagi, kam ras kerina pengikutndu muat talam ingan api, tamaken rara arang ras rempah-rempah si merim i je, jenari baba ku batar-batar. Kenca bage siidah me ise i bas kita si enggo ipilih TUHAN. Kam nge, o kalak Lewi, si enggo lebihsa perbahanenndu!”

⁷

⁸Tole nina Musa man Korah, “Begiken lah, o kalak Lewi!

⁹Akapndu kin soal kitik e adi kam enggo ipeserap Dibata bangsa Israel i bas kerina perpulungen e nari, gelah banci ideherindu ia, ndalanken tugasndu i bas Kemah TUHAN, janah mereken penampat man perpulungen e guna pekena-kenasa?

¹⁰Enggo iberekenNa man bandu ras man kalak Lewi si debanna kehormaten si enda, janah genduari atendu icubakenndu ka muat dahin keimamen!

¹¹Adi jungut-jungut kam man Harun, si tuhuna nandangi TUHAN nge kam ras pengikut-pengikutndu berontak.”

¹²Kenca bage isuruh Musa gelah Datan ras Abiram reh ndahi ia, tapi nina duana, “La kami nggit reh!

¹³La kin enggo cukup maka enggo ibabandu kami ndarat i bas taneh Mesir si mehumur e nari gelah munuh kami i bas taneh mesawang enda? Engkai maka ibahanndu dirindu jadi tuan kami?

¹⁴Seh asa genduari langa kami ibabandu ku negeri si mehumur, ntah pe mereken juma ras peken anggur man kami. Genduari icubakenndu nipu kami. La kami nggit reh!”

¹⁵Merawa kal ate Musa jenari nina man TUHAN, “Ola aloken persembahen kai pe si ibaba kalak enda. Kai pe langa lit kubahan salah man bana kerina; kadena pe langa bo lit kupindo, keledena pe lang.”

¹⁶Jenari nina Musa man Korah, “Pagi, kam ras pengikutndu si dua ratus lima puluh kalak la banci la reh ku Kemah Perjumpan; Harun pe i je.

¹⁷Sekalak-sekalak kam muat talam ingan api, tamaken rempah-rempah si merim i je, jenari persembahkenlah i babo batar-batar.”

¹⁸E maka sekalak-sekalak muat talam ingan api, itamakenna ras arang si merara denga rempah-rempah si merim i je, jenari tedis ia i bas dalan bengket ku bas Kemah e bage pe Musa ras Harun.

¹⁹Kenca bage ipepulung Korah kerina perpulungen e, jenari tedis ia kerina petala-tala ras Musa bage pe Harun i bas dalan bengket ku bas Kemah e. Sinalsal TUHAN rempet teridah man perpulungen e kerina,

²⁰janah nina TUHAN man Musa ras Harun,

²¹“Surutlah kam i bas kalak e nari kerina, gelah Kukernepken ia minter.”

²²Tapi Musa ras Harun minter mungkuk ersembah, ayona seh ku taneh, janah nina, “O Dibata, kam kap sumbul kerina kegeluhen. Adi sekalak jelma erdosa, kerina kin itembehindu perpulungen e?”

²³Nina TUHAN man Musa,

²⁴“Suruhlah jelma si nterem nadingken kemah Korah, Datan, ras Abiram.”

²⁵Kenca bage, Musa, itemani peminpin-peminpin Israel, lawes njumpai Datan ras Abiram.

²⁶Ikatakenna man bangsa e kerina nina, “Ola kam tedis deherken kemah kalak si jahat e janah ola dadapndu kai pe sikerajangenna. Adi ideherindu, kam pe ikernepken ras ia erkite-kiteken kerina dosana!”

²⁷E maka miser ia kerina nadingken kemah Korah, Datan, ras Abiram. Datan ras Abiram enggo ndarat jenari tedis ia i lebe-lebe pintu kemahna, ikut pe ndeharana ras anak-anakna.

²⁸Ikataken Musa man bangsa e nina, “Gelah itehndu maka TUHAN nge si enggo nuruh aku erbahan si enda kerina janah labo erkite-kiteken bekasku milih maka kulakoken.

²⁹Adi kalak enda kari mate bagi biasa alu la lit ukumen i bas Dibata nari, e tandana maka la TUHAN nuruh aku.

³⁰Tapi adi TUHAN erbahan si la enggo pernah ibegi, janah taneh erbelah jenari itelenna ia ras kerina sikerajangenna, seh maka ia lawes kempak doni kematen alu geluh-geluhen, i je maka itehndu kalak enda enggo nulak TUHAN.”

³¹Kenca Musa dung ngerana, minter erbelah dingen talang taneh si idedeh Datan ras Abiram.

³²Jenari itelenna ia kerina ras keluargana, bage pe kerina pengikut Korah rikut ras ertana.

³³E maka nusur ia kerina ku teruh geluh-geluhen ku bas doni kematen rikut ras kerina erta-ertana. Taneh tertutup mulihken i babona, masap ia kerina.

³⁴Kerina kalak Israel si lit i bas ingan e lompaten tupung ibegina sora kalak ndai nderkuh. Serko ia kerina nina, “Kiamken! Itelen taneh enda ka kita kari!”

³⁵Kenca bage ipesusur TUHAN api si gara seh keri ipanganina si dua ratus lima puluh kalak si mpersembahken rempah-rempah si merim ndai.

³⁶Kenca bage nina TUHAN man Musa,

³⁷“Suruh Eleasar anak Imam Harun mindahken talam-talam tembaga ingan api e i bas mait kalak si enggo meseng e nari, jenari amburkenlah arang si lit i bas talam-talam ingan api e ku ingan si deban, sabap talam-talam ingan api e badia kap.

³⁸Si e kerina jadi badia erkite-kiteken enggo ipersembahken i lebe-lebe batar-batar TUHAN. E maka buatlah talam-talam kalak si enggo ibunuh erkite-kiteken dosana e, tepa seh menipes, jenari bahanlah e jadi tutup batar-batar e. Si enda ibahan gelah jadi sada pertenget man bangsa Israel.”

³⁹Ibuat Imam Eleasar talam-talam ingan api e jenari isuruhna gelah itepa seh menipes guna ibahan jadi lapis batar-batar.

⁴⁰Enda jadi sada pertenget man bangsa Israel maka ise pe si la kesusuren Harun la banci reh ku batar-batar nutung rempah-rempah si merim man TUHAN. Adi bage ibahanna la banci la ia ikernepken bagi Korah ras pengikut-pengikutna. Kerina enda ibahan sue ras si enggo iperentahken TUHAN man Eleasar arah Musa.

⁴¹Pepagina kerina perpulungen e jungut-jungut man Musa ras Harun nina, “Enggo ibunuhndu piga-piga kalak bangsa TUHAN.”

⁴²Kenca enggo pulung ia kerina nehken keberatenna man Musa ras Harun, itulihkenna kempak Kemah Perjumpan jenari iidahna maka embun nutupisa janah sinalsal TUHAN mbincar.

⁴³Berkat minter Musa ras Harun jenari tedis ia i lebe-lebe Kemah e.

⁴⁴Nina TUHAN man Musa,

⁴⁵“Surutlah kam i bas kalak enda nari, gelah Kukernepken ia minter kerina i jenda!” Mungkuk ia duana, ayona seh ku taneh,

⁴⁶jenari nina Musa man Harun, “Buatlah talamndu, tamaken arang si merara i bas batar-batar nari i je, kenca bage tamaken rempah-rempah si merim i babo arang e. Kenca bage pedasken baba e ku jelma si nterem, bahan acara pembersihen man bana. To, pedasken! Enggo mulai gara rawa TUHAN janah penakit enggo mulai ngkenai nterem jelma.”

⁴⁷Minter lawes Harun, ibuatna talam ingan api, jenari kiam ia ku tengah-tengah jelma si nterem si sangana pulung e. Kenca idahna maka penakit e enggo mulai ngkenai kalak Israel, itamakenna rempah-rempah si merim e i babo arang e jenari ibahanna acara pembersihen man bangsa e.

⁴⁸Erkiteken si enda, ngadi minter penakit ndai. Harun teridah sangana tedis kelang-kelang kalak si enggo mate ras si nggeluh denga.

⁴⁹Teremna si mate lit 14.700 kalak langa ikira kalak si mate i bas pemberontaken Korah.

⁵⁰Kenca penakit e enggo ngadi, mulih Harun ndahi Musa i bas dalan bengket ku bas Kemah e.