Read Batak Karo BILANGEN 17 Bible Online

BILANGEN 17 - Batak Karo bible

BILANGEN 17

¹Nina TUHAN man Musa,

²“Suruh bangsa Israel mereken sepuluh dua ciken man bandu, sada i bas tep-tep peminpin suku nari. Suratken gelarna sekalak-sekalak i bas cikenna,

³jenari suratken gelar Harun i bas ciken suku Lewi. Tep-tep peminpin suku, sada cikenna.

⁴Babalah ciken e kerina ku bas Kemah Perjumpan, jenari tamaken i lebe-lebe Peti Perpadanen, i ja Aku jumpa ras kam.

⁵I je kari, ciken kalak si Kupilih tentu ertunas. Alu dalan si enda ateKu Kubahan gelah bangsa Israel olanai jungut-jungut nandangi kam.”

⁶Ngerana Musa man bangsa e, e maka sekalak-sekalak peminpinna mereken sada ciken man bana, sada guna tep-tep suku. Kerinana sepuluh dua, jenari ciken Harun ipersada ras ciken ndai kerina.

⁷Kenca bage itamaken Musa kerina ciken e i bas Kemah i lebe-lebe Peti Perpadanen TUHAN.

⁸Pepagina, tupung Musa lawes ku bas Kemah e, idahna maka ciken Harun, si jadi wakil suku Lewi, enggo ertunas. Ciken e enggo erbunga ras buahna enggo tasak, e me buah kahoa! [28†]

⁹Ibuat Musa kerina ciken e jenari icidahkenna man kalak Israel. Idahna kai si enggo jadi, jenari tep-tep peminpin muat cikenna ndai mulihken.

¹⁰Nina TUHAN man Musa, “Tamaken ciken Harun mulihken ku lebe-lebe Peti Perpadanen e; ciken e arus isimpan guna jadi sada pertenget man bangsa Israel si berontak maka ia la banci la mate adi la kin ia ngadi jungut-jungut.”

¹¹Ibahan Musa bagi si ipedahken TUHAN.

¹²Nina bangsa Israel man Musa, “Adi bage kin enggo kita dung!

¹³Adi mate kin tep-tep kalak si ndeheri Kemah e, e bali nge kita ras kalak si enggo mate e!”