Read Batak Karo BILANGEN 19 Bible Online

BILANGEN 19 - Batak Karo bible

BILANGEN 19

¹Iperentahken TUHAN man Musa ras Harun

²gelah iberekenna man bangsa Israel peraturen-peraturen bagi si tersurat arah teruh enda. Babalah sada lembu si megara si la lit cacatna janah si la enggo pernah itenggalaken ntah igeretaken,

³jenari berekenlah man Imam Eleasar. Lembu e arus ibaba ku darat ingan erkemah jenari igeleh i lebe-lebena.

⁴Kenca bage arus ibuat Eleasar darehna e sitik, jenari alu jari-jarina ipirpirkenna pitu kali kempak Kemah.

⁵Lembu e itutung kerinana i lebe-lebe imam subuk kulitna, dagingna, darehna ras isi beltekna.

⁶Kenca bage arus ibuatna kayu tusam, sada tangke hisop ras benang megara, jenari benterken ku bas api e.

⁷Kenca enggo dung si enda kerina, arus icucina pakenna ras iperidina bana alu lau, janah kenca si e enggo banci ia bengket ku bas ingan erkemah; tapi ia tetap denga nge langa bersih rikutken peraturen agama seh karaben.

⁸Kalak si nutung lembu ndai pe arus ka nge ncuci uisna ras iperidina bana alu lau, tapi ia pe tetap nge langa bersih seh karaben.

⁹Kenca bage sekalak si bersih rikutken peraturen agama arus ipepulungna abam lembu ndai jenari itamakenna i bas ingan si bersih i darat ingan erkemah. Abam lembu e isimpan i je guna ipake perpulungen kalak Israel i bas nikapken lau pemurihi kalak si la bersih rikutken peraturen agama. Acara enda ibahan guna nangtangi dosa. [31†]

¹⁰Kalak si pepulung abam lembu e arus ncuci pakenna, tapi ia tetap langa bersih seh karaben. Enda me peraturen si tetap rasa lalap man Israel ras kalak asing si ringan i tengah-tengahna.

¹¹Ise pe si ndadap mait, la ia bersih rikutken peraturen agama pitu wari dekahna.

¹²La banci la ibersihkenna dirina alu lau pemurihi i bas wari si peteluken ras pepituken, janah kenca e ia enggo bersih. Tapi adi la ibersihkenna bana i bas wari si peteluken ras si pepituken e, ia tetap langa bersih.

¹³Ise si ndadap mait janah la ibersihkenna man bana, ia tetap la bersih, sabap lau pemurihi e langa icurcurken man bana. Ibahanna maka Kemah TUHAN lanai badia, janah ia lanai nari ianggap bangsa Dibata.

¹⁴Adi lit sekalak jelma si mate i bas sada kemah, e maka kerina kalak si lit i bas kemah e tupung kematen ndai ntah pe kalak si bengket ku je jadi la bersih rikutken peraturen agama pitu wari dekahna.

¹⁵Tep-tep guci ntah pe kudin i bas kemah e la itutupi, e pe jadi lanai bersih.

¹⁶Ise si ndadap kalak mate erkite-kiteken ibunuh ntah pe mate secara biasa i darat kemah, ntah pe adi lit kalak si ndadap tulan-tulan manusia ntah kuburen, ia lanai bersih pitu wari dekahna.

¹⁷Guna mbersihkenca mulihken, abam lembu megara si enggo itutung guna ngalemi dosa arus ibuat jenari itamaken i bas sada kudin janah itambahken lau meciho ku je.

¹⁸I bas kejadin si pemena, sekalak si bersih rikutken peraturen agama muat sada dahan hisop. Dahan hisop e igedapkenna ku bas lau ndai, jenari ipirpirina kemah e ras kerina isina, bage pe kerina kalak si lit i je. I bas kejadin si peduaken, sekalak si bersih rikutken peraturen agama arus mirpirken lau e ku kalak si njemak tulan-tulan manusia ntah mait ntah pe kuburen.

¹⁹I bas wari si peteluken ras si pepituken kalak si bersih ndai arus mirpirken lau e kempak kalak si la bersih ndai. I bas wari si pepituken arus ipebadiaken ia; kalak si la bersih ndai, kenca icucina pakenna ras icurcurina bana alu lau pemurihi e, enggo bersih tupung matawari enggo sundut.

²⁰Kalak si lanai bersih rikutken peraturen agama, adi la ibersihkenna dirina, ia tetap la bersih, sabap lau pemurihi e langa icurcurken kempak ia. Ia erbahanca maka Kemah TUHAN keliamen janah ia lanai nari ikira bangsa Dibata.

²¹Peraturen enda arus iperdiatekenndu i bas kerina paksa-paksa si reh enda. Kalak si mirpirken lau pemurihi e pe arus ncuci pakenna; ise si njemak lau e ia enggo lanai bersih seh karaben.

²²Kai pe si ijemak kalak si la bersih enggo jadi la bersih, janah adi ijemak kalak si deban ka e, ia pe lanai bersih seh karaben.