Read Batak Karo BILANGEN 20 Bible Online

BILANGEN 20 - Batak Karo bible

BILANGEN 20

¹I bas bulan si pemena kerina perpulungen Israel seh i bas taneh si mesawang, Sin gelarna, jenari ibahanna inganna erkemah i Kades. I je me Miriam mate ras ikuburken.

²La lit lau i bas inganna erkemah e, e maka pulung bangsa e ngkeleweti Musa ras Harun. [32†]

³Janahna jungut-jungut nina, “Ulin kin min mbarenda kami mate i lebe-lebe Kemah TUHAN radu ras teman-teman kami kalak Israel.

⁴Engkai maka kami ndarat ku taneh si mesawang enda? Ntah gelah kami mate ras asuh-asuhen kami kin atendu?

⁵Engkai maka ibabandu kami ndarat i Mesir nari ku bas ingan si mesera enda? Kai pe la lit turah i jenda. La lit gandum, la lit buah ara, la lit buah anggur, la lit buah galiman. Lebih asa si e, lau pe la lit man inemen!”

⁶Lawes Musa ras Harun i bas jelma si nterem e nari, jenari tedis ia i bas dalan bengket ku Kemah e. Erjimpuh ia duana, ayona seh ku taneh, jenari sinalsal terang TUHAN teridah man bana.

⁷Nina TUHAN man Musa,

⁸“Buatlah ciken si lit i lebe-lebe Peti Perpadanen, jenari pepulung kam ras Harun bangsa e kerina. I lebe-lebena kerina ngeranalah kam kempak batu si ah, gelah reh lau ergeruhguh i bas nari. Alu dalan si enda iberekenndu lau man bangsa e i bas batu nari, man inemenna ras man asuh-asuhenna.”

⁹Lawes Musa, ibuatna ciken ndai sue ras si enggo ikataken TUHAN.

¹⁰Ipepulung Musa ras Harun kerina perpulungen i lebe-lebe batu e, jenari nina Musa, “Begiken, o kam si tukang berontak! Terpaksa kin ipedarat kami man bandu lau i bas batu enda nari?”

¹¹Kenca bage iangkat Musa ciken ndai, ipaluna batu e dua kali alu ciken e, jenari mbincar me lau mbelin ergeruhguh ndarat, e maka kerina bangsa e ras asuh-asuhen minem.

¹²Tapi irawai TUHAN Musa ras Harun nina, “Erkite-kiteken la cukup kinitekenndu ernalem i bas kuasangKu si badia i lebe-lebe bangsa Israel, e maka la banci babandu ia bengket ku negeri si enggo Kupadanken e.”

¹³Enda jadi i Meriba, ingan kalak Israel jungut-jungut man TUHAN, i je icidahkenNa man bangsa e maka Ia badia.

¹⁴Isuruh Musa piga-piga kalak persuruhen i Kades nari njumpai raja Edom. Nina persuruhen ndai, “Berita enda e me i bas kade-kadendu nari, i bas suku-suku kalak Israel. Enggo itehndu kuga kiniseran si enggo inanami kami,

¹⁵kuga nini-nini kami lawes ku Mesir, i ja kami ndekah tading. Seh kal jahatna perbahanen kalak Mesir man nini-nini kami bage pe man kami.

¹⁶E maka nderkuh kami man TUHAN mindo penampat. IdengkehkenNa penderkuh kami jenari isuruhNa sada malekat si maba kami ndarat i bas Mesir nari. Genduari kami i Kades, sada kuta i bas perbalengen daerahndu.

¹⁷Ngarap kami gelah iberendu kami mentas arah tanehndu. Kami ras asuh-asuhen kami labo pagi nilah i bas dalan e nari ntah pe lawes ku bas jumandu ntah ku bas peken anggurndu, janah labo inem kami lau sumurndu. Kami tetap i bas dalan si mbelin seh kami enggo ndarat i bas daerahndu nari.”

¹⁸Tapi erjabap kalak Edom nina, “La ibere kami kam mentas arah negeri kami. Adi icubakenndu kin, la banci la reh kami ndarat, maka iserang kami kam.”

¹⁹Nina bangsa Israel, “Tetap nge kami arah dalan si mbelin, janah adi iinem kami, ntah iinem asuh-asuhen kami laundu, igalari kami gia pagi. Mentas saja ngenca ate kami.”

²⁰Iulihi kalak Edom sekali nari nina, “La ibere kami!” Jenari ndarat ia alu tentera si megegeh, guna merang kalak Israel.

²¹Erkite-kiteken la ibere kalak Edom kalak Israel mentas arah daerahna, nilah kalak Israel jenari lawes ia arah dalan si deban.

²²Kerina perpulungen Israel berkat i Kades nari jenari seh ia i Deleng Hor,

²³i perbalengen Edom. I je nina TUHAN man Musa ras Harun.

²⁴“Harun labo bengket ku bas negeri si enggo Kupadanken merekenca man bangsa Israel; mate ia sabap duana kam ngelawan perentahKu i Meriba.

²⁵Babalah Harun ras anakna Eleasar nangkih ku Deleng Hor,

²⁶jenari tangtangilah jubah-jubah keimamen Harun i je, pakeken kempak Eleasar. I je me Harun mate.”

²⁷Ibahan Musa bagi si enggo iperentahken TUHAN. Lawes ia teluna ku das Deleng Hor, janah kerina perpulungen e natapsa.

²⁸E maka itangtangi Musa kerina jubah-jubah keimamen Harun, jenari ipakekenna kempak Eleasar. I das deleng e mate Harun, jenari Musa ras Eleasar mulihken ku teruh. [33†]

²⁹Kenca iteh perpulungen e kerina maka Harun enggo mate, itangisina ia telu puluh wari dekahna.