Read Batak Karo BILANGEN 23 Bible Online

BILANGEN 23 - Batak Karo bible

BILANGEN 23

¹Nina Bilham man Balak, “Pajekkenlah pitu batar-batar i jenda man bangku, jenari bereken man bangku pitu jenggi lembu ras pitu bajar biri-biri.”

²Minter ibahan Balak bagi si ikataken Bilham man bana, jenari ia ras Bilham erbahan persembahen sada jenggi lembu ras sada bajar biri-biri i bas tep-tep batar-batar.

³Jenari nina Bilham man Balak, “Tedislah i jenda deherken persembahen tutungenndu, janah aku lawes lebe ngenehenca ntah ijumpai TUHAN aku ntah lang. Kuturiken kari man bandu kerina si ipetangkasNa man bangku.” E maka lawes ia sisada ku das sada uruk-uruk,

⁴jenari ijumpai Dibata ia. Nina Bilham man baNa, “Enggo kupajekken batar-batar si pitu e ras kupersembahken sada jenggi lembu ras sada bajar biri-biri i bas tep-tep batar-batar.”

⁵Ituriken TUHAN man Bilham kai si man katanken jenari isuruhNa ia mulihken ndahi Balak nehken tenahna e.

⁶E maka lawes ia mulihken janah idahna Balak tedis denga deherken persembahen tutungenna, ras kerina peminpin-peminpin Moap.

⁷E maka ibelasken Bilham me nubuat enda, “Balak raja Moap, enggo maba aku i Siria nari, i bas deleng-deleng si arah kenjulu nari. ‘Mari, janah ngeranalah kam guna aku,’ nina. ‘Sumpahilah bangsa Israel.’

⁸Uga ningku numpahisa si la isumpahi Dibata, ntah pe ngataken, ‘Kernep me kam,’ adi la bage nina TUHAN?

⁹I das batu si meganjang nari banci kuidah bangsa e, banci kutatap ia idas uruk-uruk nari. Ia me kap sada bangsa si nggeluh sada-sada; itehna maka ia ipasu-pasu lebih asa bangsa si deban.

¹⁰Kesusuren Israel nterem desken abu, lanai terbeligai perban teremna. Adi mate pagi aku, mate bagi bangsa Dibata min; mate i bas dame bagi kalak si benar.”

¹¹Kenca bage nina Balak man Bilham, “Kai si enggo ibahanndu man bangku e? Kubaba kam ku jenda gelah isumpahindu musuhku, tapi ipasu-pasundu kepeken ia.”

¹²Nina Bilham erjabap, “Kai si isuruh TUHAN, e ngenca aku ngasup ngatakenca.”

¹³Kenca bage nina Balak man Bilham, “Mari ras kita ku ingan si deban. I jenari sada bagin si kitik i bas kalak Israel ngenca banci idahndu. Sumpahilah ia i jenari.”

¹⁴Ibabana ia ku mbalmbal Sopim idas Deleng Pisga. I je ipajekkenna pitu batar-batar jenari ipersembahkenna sada jenggi lembu ras sada bajar biri-biri i bas tep-tep batar-batar.

¹⁵Nina Bilham man Balak, “Tedislah kam i jenda deherken persembahen tutungenndu, enta kujumpai lebe Dibata i jah.”

¹⁶Ijumpai TUHAN me Bilham, iturikenNa man Bilham kai si man katanken, jenari isuruhNa ia mulihken ndahi Balak nehken tenahNa.

¹⁷E maka mulih me ia, idapetina Balak tedis denga deherken persembahen tutungenna, ras peminpin-peminpin Moap. Isungkuni Balak minter kai si enggo ikataken TUHAN,

¹⁸jenari ibelasken Bilham me nubuat enda, “Marilah, o Balak anak Sipor, begikenlah kai si arus kukataken.

¹⁹Dibata labo bagi manusia, si perguak; Ia labo manusia si sambar-sambar ukurna. Kai pe si ipadankenNa, pasti isehkenNa; ngerana Ia, e maka jadi me bagi si ikatakenNa e.

²⁰Aku enggo isuruh masu-masu, janah adi Dibata si masu-masuna, la aku ngasup muat pasu-pasu e mulihken.

²¹Kerna kegeluhen Israel pagin, enggo kuidah genduari nari. La banci reh man bana keguluten ntah pe kesusahen.

²² TUHAN, Dibatana ras kap ia; ipebetehkenna kujapa pe maka Ia me rajana. Enggo ibaba Dibata ia ndarat i Mesir nari; Ia jine erperang guna bangsa e desken sada banteng si merawa.

²³La lit guna-guna, bage pe kinigurun, si banci ipake guna ngelawan bangsa Israel. Genduari ikataken kalak kerna Israel, ‘Nehenlah kai si enggo ibahan Dibata!’

²⁴Bangsa Israel desken sada singa si merawa, la ia medem adi langa kin icaing-caingna ras itelenna, adi langa iinemna dareh kalak si enggo ibunuhna.”

²⁵Kenca bage ngerana Balak man Bilham, “Adi la kam nggit numpahi bangsa Israel, ola ka ipasu-pasundu!”

²⁶Nina Bilham erjabap, “Ma kin enggo ku kataken man bandu maka arus kulakoken kerina si ikataken TUHAN man bangku?”

²⁷Nina Balak, “Mari ras kita, gelah kubaba kam ku ingan si deban, ntah nggit maun Dibata mere kam numpahi bangsa e guna aku i jenari.”

²⁸E maka ibabaina Bilham ku das Deleng Peor. I jenari teridah gurun pasir.

²⁹Nina Bilham man bana, “Pajekkenlah pitu batar-batar man bangku jenari bereken man bangku pitu jenggi lembu ras pitu bajar biri-biri.”

³⁰Minter ibahan Balak bagi si ikataken man bana. Jenari ipersembahkenna sada jenggi lembu ras sada bajar biri-biri i bas tep-tep batar-batar.