Read Batak Karo BILANGEN 27 Bible Online

BILANGEN 27 - Batak Karo bible

BILANGEN 27

¹Mahlah, Nuah, Hogelah, Milkah, ras Tirsah e me anak-anak si diberu i bas Selapehat anak Heper, anak Gileat, anak Mahir, anak Manase, anak Jusup.

²Lawes ia ngadap Musa, Imam Eleasar, peminpin-peminpin Israel, ras kerina perpulungen e i bas dalan bengket ku bas Kemah Perjumpan, jenari nina,

³“Bapa kami enggo mate i bas taneh si mesawang alu la nadingken anak dilaki sada pe. Ia labo nai pengikut Korah, si nimbak TUHAN; ia mate erkite-kiteken dosana jine.

⁴Adi erkite-kiteken la lit anakna dilaki nge, ngkai maka gelar bapa kami arus masap i bas Israel nari? Berekenlah man kami taneh i bas bagin kade-kade bapa kami.”

⁵Persoalan enda isehken Musa man TUHAN,

⁶jenari nina TUHAN man bana,

⁷“Payo nge pemindon anak-anak si diberu Selapehat; berekenlah man bana taneh i bas bagin kade-kade bapana. Berelah erta-erta tenading bapana nusur man bana kerina. [46†]

⁸Kataken man bangsa Israel maka adi lit sekalak dilaki mate alu la nadingken anak dilaki, anakna si diberu arus ngaloken erta-erta tenadingna.

⁹Adi anakna si diberu pe la lit, senina-seninana si ngalokenca.

¹⁰Adi senina-seninana pe la lit, senina bapana si ngaloken tading-tadingen e.

¹¹Adi la lit seninana ntah pe senina bapana, e maka kade-kadena si ndeherna si ngaloken tading-tadingenna e, janah njemaksa bagi ertana jine.” Bangsa Israel arus ngaloken si enda jadi sada ketetapen undang-undang sue ras si enggo ipedahken TUHAN man Musa.

¹²Nina TUHAN man Musa, “Nangkihlah Deleng Abarim jenari tataplah taneh si Kubereken ateKu man bangsa Israel. [47†]

¹³Kenca idahndu e, kam pe mate, bagi seninandu Harun,

¹⁴sabap duana kam nimbak pedahKu i bas taneh si mesawang Sin. Asum kerina perpulungen e jungut-jungut man bangKu i Meriba, la kam nggit ngakui kuasangKu si badia i lebe-lebena.” (Meriba e me kap sada ulu lau i Kades i bas taneh si mesawang Sin.)

¹⁵Ertoto Musa nina,

¹⁶“TUHAN Dibata, sumbul kerina kegeluhen, ertoto aku gelah iangkatNdu min sekalak si ngasup minpin bangsa e,

¹⁷janah ngasup mereken perentah man bana i bas peperangen, gelah perpulungenndu ola pagi bagi biri-biri si la erpermakan.” [48†]

¹⁸Nina TUHAN man Musa, “Buatlah Josua anak Nun, sekalak si megegeh, jenari tangkuhken lah ia. [49†]

¹⁹Suruh ia tedis i lebe-lebe Imam Eleasar ras kerina perpulungen e, jenari i lebe-lebena kerina, momoken maka ia me si jadi gancihndu.

²⁰Bereken man bana kuasandu e deba, gelah kerina perpulungen Israel erkemalangen man bana.

²¹Ia la banci la rusur nungkun man Imam Eleasar, si banci meteh sura-surangKu alu make Urim ras Tumim. Alu dalan si enda Eleasar banci mabai Josua ras kerina perpulungen Israel i bas kerina persoalenna.” [50†]

²²Minter ibahan Musa sue ras si ipedahken TUHAN man bana. Isuruhna Josua tedis i lebe-lebe Imam Eleasar ras kerina perpulungen e.

²³Bagi si enggo ipedahken TUHAN, itangkuhken Musa Josua, jenari imomokenna Josua jadi gancihna. [51†]