Read Batak Karo BILANGEN 28 Bible Online

BILANGEN 28 - Batak Karo bible

BILANGEN 28

¹ TUHAN nuruh Musa

²ngajari bangsa Israel nehken persembahenna man Dibata i bas paksa-paksa si enggo itentuken, e me kap persembahen pangan si ngena ate Dibata.

³Enda me persembahen-persembahen pangan si arus ipersembahken man TUHAN: guna persembahen tutungen si tep-tep wari, dua anak biri-biri bajarna umur sada tahun, si la erpandangen.

⁴Sada ipersembahken pagi-pagi, janah sada nari karaben.

⁵Radu ras tep-tep anak biri-biri e ikut ipersembahken persembahen buah gandum, e me sada kilo tepung icampur ras sada liter minak saitun si mejilena.

⁶Enda me persembahen tep-tep wari si arus keri itutung. Persembahen enda mulai ibahan i Deleng Sinai jadi sada persembahen pangan si merim bauna iakap TUHAN.

⁷Guna persembahen anggur ras anak biri-biri si pemena, curcurkenlah i bas batar-batar sada liter anggur.

⁸Karaben persembahken ka anak biri-biri si peduaken; carana seri ras persembahen si erpagi-pagi, radu ras persembahen anggur. Enda pe sada persembahen pangan, si merim bauna iakap TUHAN.

⁹I bas wari Sabat persembahken dua anak biri-biri bajarna umur sada tahun si la erpandangen, dua kilo tepung icampur ras minak saitun jadi persembahen buah gandum, bage pe persembahen anggur. [52†]

¹⁰Persembahen tutungen enda arus ipersembahken tep-tep wari Sabat jadi tambahen persembahen si tep-tep wari ras persembahen anggurna.

¹¹Bahan persembahen tutungen man TUHAN i bas wari si pemena tep-tep bulan: dua jenggi lembu si nguda denga, sada bajar biri-biri, pitu anak biri-biri bajarna umur sada tahun, kerina si la lit man pandangen.

¹²Guna persembahen buah gandum, persembahen tepung si icampur ras minak saitun: ras tep-tep jenggi lembu, telu kilo tepung; ras bajar biri-biri dua kilo tepung;

¹³janah ras tep-tep anak biri-biri sada kilo tepung. Persembahen tutungen enda, e me persembahen pangan, si merim bauna iakap TUHAN.

¹⁴Persembahen anggur si payo e me kap dua liter ras tep-tep jenggi lembu, sada setengah liter ras bajar biri-biri, janah sada liter ras tep-tep anak biri-biri. Enda me peraturenna guna persembahen tutungen i bas wari si pemena tep-tep bulan i bas gedang-gedang tahun.

¹⁵Tambah-tambah persembahen tutungen si tep-tep wari bage pe ras persembahen anggurna, persembahken ka pe sada bajar kambing jadi persembahen pengalemi dosa.

¹⁶Wari Raya Paskah pehaga TUHAN arus ibahan i bas wari pesepuluh empatken bulan si pemena. [53†]

¹⁷I bas wari si pesepuluh limaken ibenaken sada perayan agama, dekahna pitu wari. Kidekah perayan e, roti si la itama ragi ngenca banci ipan. [54†]

¹⁸I bas wari si pemena e kam arus pulung erbahan kebaktin, janah la banci erdahin.

¹⁹Bahan sada persembahen tutungen jadi persembahen pangan man TUHAN: dua jenggi lembu si nguda denga, sada bajar biri-biri, ras pitu anak biri-biri umur sada tahun, kerina si la lit man pandangen.

²⁰Bahan persembahen buah gandum si payo i bas tepung nari, si icampur ras minak saitun: telu kilo ras tep-tep jenggi lembu, dua kilo ras bajar biri-biri,

²¹janah sada kilo ras tep-tep anak biri-biri.

²²Tole persembahken pe sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e.

²³Persembahen enda ibahan jadi tambahen persembahen tutungen biasa si erpagi-pagi.

²⁴Alu cara si seri, persembahken man TUHAN persembahen pangan pitu wari dekahna, si merim iakapNa bauna. Bahanlah persembahen enda jadi tambahen persembahen tutungen si tep-tep wari dingen persembahen anggur.

²⁵I bas wari si pepituken arus kam pulung erbahan kebaktin, janah ola kam erdahin.

²⁶I bas wari si pemena asum Kerja Rani e, asum iendeskenndu persembahen gandum si mbaru iperani man TUHAN, arus kam pulung erbahan kebaktin, janah la banci erdahin. [55†]

²⁷Bahan sada persembahen tutungen jadi sada bau si merim iakap TUHAN: dua jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit man pandangen.

²⁸Bahan persembahen buah gandum si payo i bas tepung nari icampur ras minak saitun: telu kilo ras tep-tep jenggi lembu, dua kilo ras bajar biri-biri.

²⁹Janah sada kilo ras tep-tep anak biri-biri.

³⁰Tole persembahken pe sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e.

³¹Bahanlah persembahen enda ras persembahen anggur jadi tambahen persembahen tutungen ras persembahen buah gandum si tep-tep wari.