Read Batak Karo BILANGEN 29 Bible Online

BILANGEN 29 - Batak Karo bible

BILANGEN 29

¹I bas wari si pemena bulan si pepituken kam arus pulung erbahan kebaktin, janah la banci erdahin. I bas wari e terompet-terompet arus iembus.

²Endesken sada persembahen tutungen man TUHAN, si merim iakapNa bauna: sada jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit man pandangen.

³Bahan persembahen buah gandum si payo i bas tepung nari si icampur ras minak saitun: telu kilo tepung ras jenggi lembu e, dua kilo ras bajar biri-biri,

⁴janah sada kilo ras tep-tep anak biri-biri.

⁵Tole persembahken sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e.

⁶Persembahkenlah si enda kerina jadi tambahen persembahen tutungen si biasa ibahan i bas wari si pemena tep-tep bulan ras persembahen anggurna, bage pe persembahen tutungen si tep-tep wari ras persembahen buah gandum ras persembahen anggurna. Persembahen-persembahen enda merim bauna iakap TUHAN.

⁷Pulunglah erbahan kebaktin i bas wari pesepuluhken bulan si pepituken; i bas wari e kai pe la banci ipanndu janah ola erdahin. [56†]

⁸Bahan persembahen tutungen man TUHAN, si merim iakapNa bauna: sada jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit sitik pe man pandangen.

⁹Bahan persembahen buah gandum si payo i bas tepung nari icampur ras minak saitun: telu kilo tepung ras jenggi lembu e, dua kilo ras bajar biri-biri,

¹⁰janah sada kilo ras tep-tep anak biri-biri.

¹¹Tole persembahken sada bajar kambing jadi persembahen pengalemi dosa, tambah-tambah kambing si ipersembahken i bas acara pembersihen dosa man bangsa e, ras persembahen tutungen si tep-tep wari bage pe persembahen buah gandum ras anggurna.

¹²Pulunglah erbahan kebaktin i bas wari pesepuluh limaken bulan si pepituken. Pestakenlah perayan enda guna mereken kemulian man TUHAN pitu wari dekahna, janah ola erdahin. [57†]

¹³I bas wari si pemena enda persembahken persembahen pangan man TUHAN, si merim iakapna bauna: sepuluh telu jenggi lembu nguda denga, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen.

¹⁴Bahan persembahen buah gandum si payo i bas tepung nari icampur ras minak saitun: telu kilo tepung ras tep-tep jenggi lembu, dua kilo ras tep-tep bajar biri-biri,

¹⁵dingen sada kilo ras tep-tep anak biri-biri.

¹⁶Tole persembahken sada bajar kambing jadi sada persembahen pengalemi dosa. Persembahkenlah enda kerina jadi tambahen persembahen tutungen si tep-tep wari bage pe persembahen buah gandum ras persembahen anggurna.

¹⁷I bas wari si peduaken persembahken sepuluh dua jenggi lembu si nguda denga, dua bajar biri-biri, ras sepuluh empat anak biri-biri bajarna umur sada tahun, kerina si la lit man pandangenna.

¹⁸[18-19] Radu ras si e, persembahken pe kerina persembahen-persembahen si deban si iperluken i bas wari si pemena.

²⁰I bas wari si peteluken persembahken sepuluh sada jenggi lembu si nguda denga, dua bajar biri-biri ras sepuluh empat anak biri-biri bajarna umur sada tahun, kerina si la lit sitik pe man pandangen.

²¹[21-22] Radu ras si e persembahken pe kerina persembahen si deban si iperluken i bas wari si pemena.

²³I bas wari peempatken persembahken sepuluh jenggi lembu nguda, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen.

²⁴[24-25] Radu ras si e, persembahken pe kerina persembahen si deban si iperluken i bas wari si pemena.

²⁶I bas wari si pelimaken persembahken siwah jenggi lembu si nguda, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen.

²⁷[27-28] Radu ras si e, persembahken pe kerina persembahen si deban si iperluken i bas wari si pemena.

²⁹I bas wari peenemken persembahken waluh jenggi lembu nguda, dua bajar biri-biri, ras sepuluh empat anak biri-biri bajarna umur sada tahun, kerina si la lit sitik pe man pandangen.

³⁰[30-31] Radu ras si e, persembahken pe kerina persembahen-persembahen si deban si iperluken i bas wari si pemena.

³²I bas wari si pepituken persembahken pitu jenggi lembu nguda, dua bajar biri-biri, ras sepuluh empat anak biri-biri bajarna umur sada tahun.

³³[33-34] Radu ras si e, persembahken pe kerina persembahen-persembahen si deban si iperluken i bas wari si pemena.

³⁵I bas wari pewaluhken pulung lah erbahan kebaktin janah la banci erdahin.

³⁶Bahan persembahen tutungen jadi sada persembahen pangan man TUHAN, si merim iakapNa bauna: sada jenggi lembu nguda, sada bajar biri-biri, ras pitu anak biri-biri bajarna umur sada tahun, kerina si la lit sitik pe man pandangen.

³⁷[37-38] Radu ras si e, persembahken pe kerina persembahen si iperluken i bas wari si pemena.

³⁹Enda me peraturen kerna persembahen tutungen, persembahen buah gandum, persembahen anggur, ras persembahen persadan si arus ibahanndu man TUHAN i bas perayan-perayanndu si enggo itentuken. Si enda kerina e me tambahen persembahen-persembahen si iberekenndu i bas nehken padan si ibahanndu man TUHAN ntah pe persembahen-persembahen riah ukur.

⁴⁰E maka ituriken Musa man bangsa Israel kerina si enggo ipedahken TUHAN man bana.