Read Batak Karo BILANGEN 3 Bible Online

BILANGEN 3 - Batak Karo bible

BILANGEN 3

¹Enda me keluarga Harun ras Musa tupung TUHAN ngerana man Musa i Deleng Sinai.

²Lit empat anak Harun: Nadap, sintua, Abihu, Eleasar, ras Itamar. [1†]

³Kerina anak-anakna enda iminaki ras itangkuhken jadi imam,

⁴tapi Nadap ras Abihu mate tupung ipersembahkenna api si la badia man TUHAN i gurun pasir Sinai. Anak si dua kalak enda la lit, e maka Eleasar ras Itamar jadi imam tupung Harun nggeluh denga. [2†]

⁵Nina TUHAN man Musa,

⁶“Babalah suku Lewi ngadap janah tugaskenlah ia nampati Imam Harun.

⁷Dahinna e me ndahiken dahin-dahin si iperluken i bas Kemah Perjumpan ras ndalanken tugasna guna imam-imam ras guna perpulungen e kerina.

⁸Ia arus ngurus kerina alat-alat si lit i bas KemahKu ras ndalanken tugasna guna kalak Israel si debanna.

⁹Ia ertanggung jawab nampati Harun ras anak-anakna saja ngenca.

¹⁰Harun ras anak-anakna arus itugaskenndu ndahiken dahin-dahin keimamen. Kalak si deban si ncubakenca ndahiken dahin e arus ibunuh.”

¹¹Nina TUHAN man Musa,

¹²[12-13] “Genduari kalak Lewi enggo jadi sikerajangenKu. Tupung Kubunuh kerina anak sintua kalak Mesir, enggo Kupeserap jadi sikerajangenKu anak sintua i bas kerina keluarga kalak Israel ras anak si pemena i bas kerina asuh-asuhen. Genduari, suku Lewi enggo Kubahan jadi ganti anak sintua bangsa Israel jadi sikerajangenKu; suku Lewi Aku empuna. Aku kap TUHAN.” [3†]

¹³

¹⁴I gurun pasir Sinai iperentahken TUHAN man Musa

¹⁵guna nuratken suku Lewi rikutken si ersenina sada nini bage pe si sada keluarga. Si isuratken e me kap kerina dilaki, mulai i bas umur sada bulan ku das,

¹⁶janah bage me ibahan Musa.

¹⁷[17-20] Lit telu kalak anak Lewi: Gerson, Kohat, ras Merari. Enda gelar-gelar nini-ninina si sada merga. Gerson lit dua kalak anakna: Lipni ras Simei; Kohat, empat kalak anakna: Amram, Isar, Hebron, ras Usiel, janah Merari lit dua kalak anakna: Mahli ras Musi. Enda me nini-ninina sada keluarga si sada suku.

¹⁸

¹⁹

²⁰

²¹Si bengket ku bas terpuk Gerson e me kap keluarga-keluarga Lipni ras Simei.

²²Teremna dilaki si umurna sada bulan ntah pe lebih si isuratken e me 7.500 kalak.

²³Terpuk si enda erkemah arah bagin Barat i pudi Kemah e,

²⁴janah si jadi kepala terpuk e, e me kap Eliasap anak Lael.

²⁵Terpuk enda ertanggung jawab kerna Kemah e, tarumna si arah bas ras si arah darat kire-kire guna dalan bengket,

²⁶kire-kire si jadi bide kesain i sekelewet Kemah e ras batar-batar, bage pe kire-kire dalan bengket ku bas kesainna. Terpuk enda ertanggung jawab ngurus kerina dahin si lit hubungenna ras barang-barang enda.

²⁷Si bengket ku bas terpuk Kohat e me kap keluarga-keluarga Amram, Isar, Hebron ras Usiel.

²⁸Teremna dilaki si umurna sada bulan ntah pe lebih si isuratken e me 8.600 kalak.

²⁹Terpuk si enda erkemah arah bagin Selatan Kemah e,

³⁰janah si jadi kepala terpukna e me kap Elisapan anak Usiel.

³¹Terpuk enda ertanggung jawab kerna Peti Perpadanen, meja, nahe lampu, batar-batar, perkakas si ipake imam-imam i bas Ingan si Badia, ras kire-kire si i bas dalan bengket ku bas Ingan si Badiana kal. Kalak enda ertanggung jawab ngurus kerina dahin si lit hubungenna ras barang-barang enda.

³²Kepala suku Lewi kerina e me Eleasar anak Imam Harun. Ia ertanggung jawab ngawasi kerina kalak si ertugas i bas Ingan si Badia.

³³Si bengket ku bas terpuk Merari e me kap keluarga-keluarga Mahli ras Musi.

³⁴Teremna dilaki si umurna sada bulan ntah pe lebih si isuratken e me 6.200 kalak.

³⁵Terpuk si enda erkemah arah Utara Kemah, janah kepala terpuk enda e me Suriel anak Abihail.

³⁶Kalak enda itugasken ertanggung jawab kerna papan dingding Kemah e, beloti-belotina, tiang-tiangna, alasna ras kerina perkakas Kemah e. Ia ertanggung jawab ngurus kerina dahin si lit hubungenna ras barang-barang enda.

³⁷Tambah si enda terpuk enda pe ertanggung jawab kerna tiang-tiang bide kesain si arah darat, alasna, pantuk-pantukna, ras tinalina.

³⁸Musa ras Harun bage pe anak-anakna erkemah i lebe-lebe Kemah e arah Timur. Kalak enda ertanggung jawab ndahiken dahin-dahin si lit i bas ingan si badia guna bangsa Israel. Kalak si deban si ncubakenca ndahiken dahin i bas ingan e arus ibunuh.

³⁹Teremna kalak Lewi dilaki si umurna sada bulan ntah pe lebih si isuratken Musa rikutken terpuk-terpukna alu perentah TUHAN e me 22.000 kalak.

⁴⁰ [40-41] Nina TUHAN man Musa, “Kerina anak sintua bangsa Israel Aku empuna. E maka suratkenlah gelar kerina anak sintua si dilaki i bas bangsa Israel si umurna sada bulan ntah pe lebih. Tapi jadi gantina Kubuat kalak Lewi jadi sikerajangenKu! Aku kap TUHAN. Bage pe Kubuat asuh-asuhen suku Lewi jadi ganti kerina anak si pemena i bas kerina asuh-asuhen.”

⁴¹

⁴²Iikutken Musa kata TUHAN, e maka isuratkenna kerina anak sintua dilaki,

⁴³si umurna sada bulan ntah pe lebih, jumlahna kerina lit 22.273 kalak.

⁴⁴Nina TUHAN man Musa,

⁴⁵“Genduari endeskenlah suku Lewi jadi sikerajangenKu nggantiken kerina anak sintua dilaki bangsa Israel, janah endesken pe asuh-asuhen suku Lewi nggantiken anak si pemena i bas asuh-asuhen bangsa Israel.

⁴⁶Erkiteken anak sintua bangsa Israel buen 273 kalak asa kalak Lewi, e maka arus itebusindu anak-anak si lebih enda.

⁴⁷Guna tep-tep anak arus itebusindu alu lima duit pirak sue ras ukuren si nitetapken,

⁴⁸jenari bereken duit enda man Harun ras anak-anakna.”

⁴⁹Ipatuhi Musa kata TUHAN,

⁵⁰e maka ibuatna duit pirak, buena 1.365,

⁵¹jenari iberekenna man Harun ras anak-anakna.