Read Batak Karo BILANGEN 30 Bible Online

BILANGEN 30 - Batak Karo bible

BILANGEN 30

¹Ibereken Musa pedah si tersinget arah teruh enda man peminpin-peminpin suku-suku bangsa Israel.

²Adi lit sekalak jelma erpadan mereken sada-sada barang man TUHAN ntah pe erpadan mantangken sada-sada barang, la banci ilanggarna padan e, tapi arus itepatina sue ras si ipadankenna. [58†]

³Adi sekalak singuda-nguda si ringan denga i bas rumah bapana erbahan sada padan mereken sada-sada barang man TUHAN ntah pe erpadan mantangken sada-sada barang,

⁴la banci la itepatina kerina si ipadankenna, pala ikataken bapana kin keberatenna asum ibegina kerna si e.

⁵Tapi adi ilarang bapana ia la iarusken ia nepatisa. TUHAN ngalemi ia, sabap la ibere bapana ia nehken padanna e.

⁶Adi sekalak diberu si langa sereh erbahan sada padan mereken sada-sada barang man TUHAN, alu tutus ntah pe alu mekarus ntah pe erpadan mantangken sada-sada barang, jenari sereh ia,

⁷la banci la itepatina kerina si ipadankenna e, pala ikataken perbulangenna keberatenna asum ibegina kerna si e.

⁸Tapi adi ilarang perbulangenna ia nehken padanna e asum ibegikenna kerna si e, ia la iarusken nepatisa. TUHAN ngalemi ia.

⁹Sekalak diberu si enggo mbalu ntah si enggo mulih i bas perbulangenna nari arus mereken kerina si enggo ipadankenna man TUHAN ras mantangken barang si enggo ipadankenna maka ipantangkenna.

¹⁰Adi sekalak diberu si enggo erjabu erbahan sada padan mereken sada-sada barang,

¹¹la banci la itepatina kerina padanna e, pala perbulangenna ngataken keberatenna asum ibegina kerna si e.

¹²Tapi adi ilarang perbulangenna ia nehken padanna e asum ibegina kerna si e, ia la iarusken nepatisa. TUHAN ngalemi ia, sabap la ibere perbulangenna ia nehken padanna e.

¹³Lit hak perbulangenna ngesahken ntah pe nulak tep-tep padan si ibahanna.

¹⁴Tapi adi kenca ibegina padan e, la ikatakenna keberatenna i bas wari e, la banci la itepatina kerina si enggo ipadankenna. Padan e enggo isahken perbulangenna alu la ngataken keberatenna i bas wari ia megi kerna si e.

¹⁵Tapi adi arah pudi ibatalken perbulangenna padan e, maka perbulangenna e jine arus nanggung ukumenna.

¹⁶Enda me peraturen-peraturen si ibereken TUHAN man Musa kerna padan si ibahan diberu si langa sereh si ringan i bas rumah bapana ntah pe si ibahan diberu si enggo erjabu.