Read Batak Karo BILANGEN 31 Bible Online

BILANGEN 31 - Batak Karo bible

BILANGEN 31

²“Ukumlah bangsa Midian erkite-kiteken kai si enggo ibahanna man bangsa Israel. Kenca ibahanndu e, mate kam.”

³E maka ikataken Musa man bangsa Israel nina, “Ersikaplah guna erperang, gelah banci iperangndu bangsa Midian lako ngukum ia erkite-kiteken kai si enggo ibahanna man TUHAN.

⁴I bas tep-tep suku Israel nari suruhlah seribu kalak dilaki erperang.”

⁵E maka ipilih me seribu kalak i bas tep-tep suku nari, janah jumlahna kerina sepuluh dua ribu kalak sikap guna erperang.

⁶Isuruh Musa ia kerina erperang ipinpin Pinehas anak Imam Eleasar, si ertugas ngurus barang-barang si badia ras terompet-terompet guna mereken tanda.

⁷Sue ras si iperentahken TUHAN man Musa, iserangna bangsa Midian, ibunuhna kerina dilaki,

⁸subuk lima kalak raja-raja Midian, e me: Epi, Rekem, Sur, Hur, ras Reba. Bilham anak Beor pe ibunuhna.

⁹Itaban bangsa Israel diberu-diberu bangsa Midian bage pe anak-anak, ibuatna lembuna ras biri-birina, irampasna kerina erta-ertana,

¹⁰janah icilukna kerina kuta-kutana ras inganna erkemah.

¹¹Ibuatna kerina barang-barang rampasen si enggo idatca e, subuk kalak si enggo itaban ras asuh-asuhen,

¹²jenari ibabana man Musa ras Eleasar bage pe man perpulungen bangsa Israel, si sangana i bas ingan erkemah i bas kendit Moap, i kepar-kepar Lau Jordan petingtang ras Jeriho.

¹³Musa, Eleasar, ras kerina peminpin-peminpin perpulungen e si deban lawes ndarat i bas ingan erkemah e nari ngalo-ngalo tentera e.

¹⁴Irawai Musa panglima-panglima tentera e -- panglima-panglima seribu, panglima-panglima seratus -- si enggo mulih i bas peperangen e nari.

¹⁵Isungkunina ia kerina nina, “Engkai maka ipelepasndu kerina diberu-diberu e nggeluh?

¹⁶Inget maka diberu-diberu e nge si enggo iajar-ajari Bilham janah mabai bangsa enda lanai setia man TUHAN i Peor. E me si enggo maba penakit si ngkenai nterem jelma i bas bangsa TUHAN. [59†]

¹⁷E maka genduari bunuhlah tep-tep anak dilaki ras diberu si enggo ersada kula.

¹⁸Tapi pelepaslah nggeluh man sikerajangenndu kerina anak diberu ras kerina diberu-diberu si langa pernah ersada kula.

¹⁹Genduari kerina kam si enggo munuh ntah pe si enggo ndadap mait arus tading i darat ingan erkemah pitu wari dekahna. I bas wari si peteluken ras pepituken bersihkenlah man bandu ras diberu-diberu si enggo itabanndu e.

²⁰Bersihkenlah kerina paken ras barang-barang si ibahan i bas kulit, mbulu kambing ras i bas kayu nari.”

²¹Ikataken Eleasar man kerina dilaki si enggo mulih i bas peperangen nari, “Enda me peraturen-peraturen si enggo ibereken TUHAN man Musa.

²²[22-23] Tep-tep barang si la banci meseng, umpamana emas, pirak, tembaga, besi, timah-putih, ras timah-hitam, arus ibersihken arah api. Tapi barang si deban arus ibersihken alu lau pemurihi.

²³

²⁴I bas wari si pepituken la banci la icucindu uisndu; kenca bage e maka kam enggo bersih rikutken peraturen agama jenari enggo banci kam bengket ku bas ingan erkemah e.”

²⁵Nina TUHAN man Musa,

²⁶“Kam ras Eleasar bage pe ras peminpin-peminpin perpulungen e si deban, arus ngkira kerina si enggo itaban, ikut pe manusia ras asuh-asuhen.

²⁷Bagiken kai si enggo ibuat e jadi dua bagin si seri, sada bagin man tentera e janah sada bagin man kerina perpulungen.

²⁸I bas bagin sikerajangen tentera e nari buatlah jadi cuke man TUHAN sada i bas tep-tep lima ratus manusia tabanen janah bage ka pe bagin si man buaten i bas lembu, kelede, biri-biri, ras kambing.

²⁹Berekenlah si e kerina man Imam Eleasar jadi sada pemere khusus man TUHAN.

³⁰I bas bagin si ibereken man perpulungen e, buatlah sada i bas tep-tep lima puluh manusia tabanen nari janah bage ka pe bagin si man buaten i bas lembu, kelede, biri-biri, ras kambing. Berekenlah e man kalak Lewi si ertugas ngurus Kemah TUHAN.”

³¹Iikutken Musa ras Eleasar kai si ipedahken TUHAN man bana.

³² [32-35] Si tersurat arah teruh enda e me kap surat rampasen si itaban tentera-tentera e, tambah-tambah kai si ibuatna man sikerajangenna: 675.000 biri-biri ras kambing, 72.000 lembu, 61.000 kelede, ras 32.000 singuda-nguda.

³³

³⁴

³⁵

³⁶[36-40] Si setengah jadi sikerajangen tentera e, e me 337.500 biri-biri ras kambing, janah beligai si jadi sikerajangen TUHAN e me 675; 36.000 lembu man tentera e, i bas si e nari pitu puluh dua man TUHAN; 30.500 kelede man tentera e, i bas si e nari enem puluh sada man TUHAN; 16.000 singuda-nguda man tentera e, i bas si e nari telu puluh dua man TUHAN.

³⁷

³⁸

³⁹

⁴⁰

⁴¹E maka ibereken Musa man Eleasar cuke e jadi sada pemere khusus man TUHAN, bagi si enggo ipedahken TUHAN.

⁴² [42-46] Bagin sikerajangen perpulungen e bali ras si man tentera e: 337.500 biri-biri ras kambing, 36.000 lembu, 30.500 kelede, ras 16.000 singuda-nguda.

⁴³

⁴⁴

⁴⁵

⁴⁶

⁴⁷I bas bagin enda nari ibuat Musa sada i bas tep-tep lima puluh manusia tabanen ras asuh-asuhen, janah bagi si enggo ipedahken TUHAN, iberekenna si e kerina man kalak Lewi si ertugas ngurus Kemah TUHAN.

⁴⁸Kenca bage komendan-komendan si enggo minpin tentera e lawes ndahi Musa.

⁴⁹Ngelapor ia nina, “O bapa, kerina tentera si ipinpin kami enggo ikira kami, janah sada pe la lit bene.

⁵⁰E maka ibaba kami perhiasen-perhiasen emas, gelang nahe, gelang tan, cincin, anting-anting, ras bura si idat kami sekalak-sekalak. Si enda kerina ipersembahken kami man TUHAN jadi tebus kesah kami, gelah kami tetap ikawaliNa.”

⁵¹Musa ras Eleasar ngaloken emas e, si kerina i bas bentuk perhiasen.

⁵²Jumlah berat pemere komendan-komendan e menam dua ratus kilo.

⁵³Kalak si labo komendan, barang rampasen si idatna isimpanna saja man sikerajangenna.

⁵⁴E maka ibaba Musa ras Eleasar emas e ku bas Kemah e, gelah ikawali TUHAN bangsa Israel.