Read Batak Karo BILANGEN 32 Bible Online

BILANGEN 32 - Batak Karo bible

BILANGEN 32

¹Suku Ruben ras Gat mbue kal lembuna. Asum iidahna kuga cocokna taneh Jaser ras Gileat jadi ingan erlembu,

²idahina Musa, Eleasar, ras kerina peminpin-peminpin perpulungen e, jenari nina,

³[3-4] “Daerah enda, si enggo iingani bangsanta bekas penampat TUHAN, e me kap kuta-kuta Atarot, Dibon, Jaser, Nimras, Hesbon, Eleale, Sipma, Nebo, ras Beon, tuhu-tuhu mehuli man ingan ngasuhi lembu, janah kami melala lembu kami.

⁵Adi banci, berelah taneh enda jadi sikerajangen kami, janah ola kami suruh ngepari Lau Jordan, janah ringan i jah.”

⁶Erjabap Musa nina, “Uga? Atendu ringan tetap i jenda sedang senina-seninandu lawes erperang?

⁷Engkai maka iurakindu semangat bangsa Israel ngepari Lau Jordan ku bas taneh si enggo ibereken TUHAN man bana?

⁸Bagenda me perbahanen bapa-bapandu pe asum kusuruh ia i Kades-Barnea nari gelah iselidikina taneh e. [60†]

⁹Lawes ia seh ku berneh Eskol janah idahna taneh e, tapi kenca ia mulih, ipebiar-biarna bangsa e gelah ola mengketi taneh si enggo ibereken TUHAN man bana.

¹⁰I bas wari e merawa TUHAN, jenari ibahanNa sada padan, nina, [61†]

¹¹‘Ersumpah Aku maka erkite-kiteken la kalak enda tetap erkemalangen man bangKu, la lit sada pe si umurna dua puluh tahun ntah pe lebih si ndarat i Mesir nari banci ngidah taneh si enggo Kupadanken man Abraham, Isak, ras Jakup,’

¹²seakatan Kalep anak Jepune, terpuk Kenis, ras Josua anak Nun; ia duana tetap ngikutken TUHAN alu bulat ukur.

¹³TUHAN merawa man bangsa e jenari ibahanNa maka mampa-mampa ia i taneh si mesawang empat puluh tahun dekahna, seh maka kalak si erbahanca Ia nembeh ndai enggo mate kerina.

¹⁴Janah genduari perbahanenndu enggo ka bali ras bapa-bapandu ndai, o kam kesusuren manusia si perdosa, si erbahanca maka gara ka mulihken pernembeh ate TUHAN man Israel.

¹⁵Adi kam suku Ruben ras Gat la nggit ngikutken ia genduari, la banci la itadingkenNa ka mulihken bangsa enda kerina mampa-mampa i bas taneh si mesawang, janah erkite-kiteken kam maka ia bene kerina.”

¹⁶Tapi meseksek pemindon kalak e man Musa nina, “Berelah min kami lebe erbahan karang biri-biri kami i bas batu nari ras erbahan benteng kuta-kuta man ingan tading ndehara ras anak-anak kami i jenda.

¹⁷Kenca dung si e kami enggo banci lawes erperang ras senina-senina kami kalak Israel, janah kami gia arah lebe, seh enggo ipetetap kami inganna i bas taneh si jadi sikerajangenna. Tupung si e, ndehara ras anak-anak kami banci ringan i jenda i bas kuta-kuta si erbenteng, aman i bas ganggun kalak si ringan i bas taneh enda nari.

¹⁸La kami mulih ku rumah kami seh kerina bangsa Israel si debanna enggo ndat baginna i bas taneh si enggo itentuken man bana.

¹⁹Taneh si arah lepar Lau Jordan si man bana e la sitik pe ibuat kami jadi sikerajangen kami, sabap enggo ialoken kami bagin kami i jenda arah Timur Lau Jordan.”

²⁰Ngaloi Musa nina, “Adi payo kin i bas ukurndu nari si ikatakenndu e, i jenda, i lebe-lebe TUHAN, ersikap dage kam guna lawes ku bas peperangen.

²¹Kerina dilaki i bas kam si ngasup erperang arus ngepari Lau Jordan, janah i teruh perentah TUHAN arus iserang musuh-musuhta seh italuken TUHAN kerina musuh e,

²²janah ibuatNa negeri e. Kenca si e, banci kam mulih, sabap enggo isehkenndu tanggung jawabndu man TUHAN ras man senina-seninandu bangsa Israel. Jenari taneh enda si arah Timur Lau Jordan iakui TUHAN man sikerajangenndu.

²³Tapi adi la itepatindu padanndu, kupersingeti man bandu maka erdosa kam man TUHAN. Ola tipu bandu, sabap la banci la kam iukum erkite-kiteken dosandu.

²⁴E maka bahanlah dage benteng kuta-kutandu ras karang biri-birindu, tapi bahanlah kai si enggo ipadankenndu!”

²⁵Nina dilaki-dilaki i bas merga Gat ras Ruben, “Sue ras perentahndu, bage me ibahan kami.

²⁶Ndehara ras anak-anak kami bage pe lembu ras biri-biri kami tading i jenda i bas kuta-kuta Gileat.

²⁷Tapi kerina kami enggo sikap lawes erperang i teruh perentah TUHAN. Ikepari kami Lau Jordan guna erperang, sue ras si enggo ikatakenndu.”

²⁸E maka ibereken Musa perentah-perentah enda man Eleasar, Josua, ras peminpin-peminpin suku-suku Israel nina, [62†]

²⁹“Adi ikepari kalak Gat ras Ruben Lau Jordan janah nggit ia erperang i teruh perentah TUHAN, jenari adi arah penampatna ngasup kam engkuasai taneh e, e maka berekenlah man bana taneh Gileat jadi sikerajangenna.

³⁰Tapi adi la ikeparina Lau Jordan janah la ia nggit lawes ras kam erperang, ia la banci lang ngaloken taneh baginna i bas taneh Kanaan, bali ras kam.”

³¹Nina kalak Gat ras Ruben erjabap, “Sue ras si enggo iperentahken TUHAN, bage me ibahan kami.

³²I teruh perentahNa nggit kami ngepar ku taneh Kanaan janah erperang, gelah taneh si arah Timur Lau Jordan enda banci jadi sikerajangen kami.”

³³E maka ibereken Musa man suku Gat ras Ruben bage pe man setengah i bas suku Manase kerina daerah Raja Sihon, kalak Amori e, ras daerah Raja Og i Basan nari, subuk kuta-kuta ras taneh si lit i sekelewetna.

³⁴Ibangun suku Gat mulihken kuta-kuta si ibentasi, e me: Dibon, Atarot, Aroer,

³⁵Atarot-Sopan, Jaser, Jokbeha,

³⁶Bet-Nimra ras Bet-Haran.

³⁷Kuta-kuta si ibangun merga Ruben mulihken, e me: Hesbon, Eleale, Kiriataim,

³⁸Nebo, Baal Meon (gelar kuta si enda isambari), ras Sipma. Ibahanna gelar si mbaru man kuta-kuta si ibangun e mulihken.

³⁹Terpuk Mahir anak Manase iserangna taneh Gileat, iinganina taneh e, jenari ipelawesna kalak Amori si ringan i je.

⁴⁰E maka ibereken Musa taneh Gileat man terpuk Mahir, janah i je me ia ringan.

⁴¹Jair, i bas suku Manase nari, iserangna ras ikuasaina piga-piga kuta jenari igelarina kuta-kuta e “Kuta-kuta Jair”.

⁴²Nobah, iserang ras ikuasaina Kenat ras kuta-kutana, jenari isambarina gelar kuta e jadi Nobah, sue ras gelarna jine.