Read Batak Karo BILANGEN 36 Bible Online

BILANGEN 36 - Batak Karo bible

BILANGEN 36

¹Kepala-kepala keluarga i bas terpuk Gileat anak Mahir ntah pe kempu Manase anak Jusup, lawes njumpai Musa ras peminpin-peminpin si deban.

²Nina, “TUHAN enggo nuruh kam magiken taneh man bangsa Israel alu erbahan tikam tanduk. Tole enggo ipedahkenNa pe man bandu mereken taneh kade-kade kami Selapehat man anak-anakna si diberu. [71†]

³Tapi cuba perdiateken, adi erjabu ia ras dilaki i bas suku si deban nari, tanehna e tentu enggo salih jadi sikerajangen suku si deban ndai, janah belang taneh si enggo itentuken man kami enggo erkurang.

⁴I bas Tahun Pemulihen, asum kerina taneh si enggo idayaken iulihken man empuna si mula-mula, taneh anak-anak si diberu Selapehat secara tetap enggo itambahken man suku inganna sereh janah suku kami enggo kebenen taneh e.”

⁵E maka ibereken Musa man bangsa Israel pedah si tersurat arah teruh enda si rehna i bas TUHAN nari. Nina, “Payo nge kai si ikataken suku Manase,

⁶janah erkite-kiteken si e TUHAN ngataken maka anak-anak si diberu Selapehat banci erjabu ras ise pe rikutken sura-surana tapi i bas sukuna e ngenca.

⁷Taneh tep-tep kalak Israel arus tetap i bas sukuna.

⁸Tep-tep diberu si ngaloken taneh tading-tadingen i bas suku kalak Israel arus erjabu ras dilaki si sada suku ras ia. Alu bage tep-tep kalak Israel ngaloken taneh tading-tadingen nini-ninina.

⁹Janah taneh e la banci pindah i bas sada suku ku suku si deban. Taneh tep-tep suku la banci la tetap jadi sikerajangen suku e jine.”

¹⁰ [10-11] E maka, Mahlah, Tirsah, Hogelah, Milkah, ras Nuah, anak-anak si diberu Selapehat, ndalanken bagi si ipedahken TUHAN man Musa, erjabu ia ras anak-anak si dilaki senina-senina bapana.

¹²Erjabu ia i bas terpuk-terpuk suku Manase anak Jusup, e maka tanehna e tetap tading i bas kalak si sada suku ras bapana.

¹³Enda me peraturen-peraturen ras pedah si ibereken TUHAN man bangsa Israel arah Musa i Kendit Moap i kepar-kepar Lau Jordan petingtang ras Jeriho.