Read Batak Karo BILANGEN 6 Bible Online

BILANGEN 6 - Batak Karo bible

BILANGEN 6

¹ TUHAN nuruh Musa,

²mereken pengajaren si tersurat i jenda man bangsa Israel. Tep-tep dilaki ntah diberu si erbulawan ras TUHAN gelah ia jadi sekalak nasir, janah ipeserapna dirina man TUHAN,

³arus ipantangkenna anggur ras bir. La banci inemna inemen kai pe si ibahan i bas buah anggur nari ntah man buah anggur si mbaru denga ntah pe si enggo kerah. [5†]

⁴Sedekah ia sekalak nasir denga, la banci ipanna kai pe si rehna i bas batang anggur nari; biji anggur ntah kulit buah anggur pe la banci.

⁵Kidekah ia i teruh padan nasir denga, la banci iguntingna bukna ntah pe ercukur. Ia teriket man padan e asa dekahna ia ipeserap man TUHAN, janah arus ipelepasna bukna ras janggutna turah.

⁶[6-7] Bukna jadi sada tanda maka iserapkenna dirina man Dibata, e maka la banci ibahanna dirina keliamen alu lawes ndeheri mait, aminna gia mait e bapana jine ntah pe nandena, seninana ntah pe turangna.

⁸Sedekah ia sekalak nasir denga, ia ipebadiaken guna TUHAN.

⁹Adi bukna si ipebadiaken e keliamen erkite-kiteken ia kundul rembak ras sekalak jelma si mate rempet, arus itimaina pitu wari, janah kenca e icukurna bukna ras janggutna; alu bage ia enggo jadi bersih rikutken peraturen agama.

¹⁰I bas wari si pewaluhken arus ibabana dua ndukur ntah pe dua nderapati man imam i bas dalan bengket ku bas Kemah Perjumpan.

¹¹Sada arus ipersembahken imam jadi persembahen pengalemi dosa, janah si debanna jadi persembahen tutungen, guna erbahan acara pembersihen man bana sabap enggo ia pedeges ras mait. I bas wari e kang arus ipebadiakenna ka mulihken bukna.

¹²Janah ipersembahkenna mulihken man TUHAN waktuna jadi sekalak nasir. Waktu si arah lebe lanai ikira, sabap bukna si enggo ipebadiaken e enggo keliamen. Guna persembahen tebusen arus ibabana sada anak biri-biri umur sada tahun.

¹³Adi sekalak Nasir enggo ndungi padan si enggo ibahanna, arus ilakokenna acara enda. Lawes lah ia ku dalan bengket ku bas Kemah e [6†]

¹⁴janah ipersembahkenna man TUHAN telu asuh-asuhen si la lit sitik pe man pandangen. Asuh-asuhen e, e me kap: sada anak biri-biri bajarna umur sada tahun guna persembahen tutungen, sada anak biri-biri beru-beru umur sada tahun guna persembahen kerna dosa, ras sada bajar biri-biri guna persembahen persadan.

¹⁵Tambah si e arus pe ipersembahkenna sada raga roti si la tama ragi, e me: roti si mekapal si ibahan i bas tepung nari icampur ras minak saitun ras roti si menipes si icalehken ku bas minak saitun. Janah tambah si e gandum ras anggur asa arusna.

¹⁶Kerina si enda arus iendesken imam man TUHAN bage pe persembahen kerna dosa ras persembahen tutungen arus ipersembahkenna.

¹⁷Bajar biri-biri e arus igelehna jadi persembahen man TUHAN jadi sada persembahen persadan, janah ipersembahkenna e ras roti si i bas raga ndai. Gandum ras anggur pe arus ka ipersembahkenna.

¹⁸Kalak nasir ndai arus ncukur bukna i bas dalan bengket ku bas Kemah e, jenari itamakenna bukna ku bas api ingan nutung persembahen persadan ndai.

¹⁹Kenca bage, tupung paha si arah lebe bajar biri-biri ndai enggo itasakken, arus ibuat imam, jenari itamakenna radu ras sada roti si mekapal ras sada roti si menipes si i bas keranjang ndai ku bas tan kalak nasir ndai.

²⁰Seterusna, imam arus ngendesken si enda kerina jadi sada persembahen si khusus man TUHAN; enda kerina jadi sada persembahen si badia man imam, tambah-tambah tenten ras nahe biri-biri e si kin sikerajangen imam rikutken undang-undang. Kenca si enda kerina, kalak Nasir ndai banci minem anggur.

²¹Enda me peraturen-peraturen man kalak Nasir; tapi adi sekalak Nasir erbulawan mereken persembahen lebih asa persembahen si iperluken rikutken peraturen, arus maka ipersembahkenna sue ras isi bulawanna e.

²² TUHAN nuruh Musa,

²³gelah ikatakenna man Harun ras anak-anakna guna make kata-kata si tersurat arah teruh enda i bas ia masu-masu bangsa Israel:

²⁴Ipasu-pasu janah ikawali Dibata kam;

²⁵siang ayo Dibata ersinalsal ibabondu; janah melias ateNa man bandu

²⁶itatap Dibata ku kam, janah malem atendu ibahanNa.

²⁷Janah nina TUHAN, “Adi ibelaskenna gelarKu i bas pemasu-masun man bangsa Israel, e maka Kupasu-pasu ia.”