Read Batak Karo BILANGEN 8 Bible Online

BILANGEN 8 - Batak Karo bible

BILANGEN 8

¹Nina TUHAN man Musa, [7†]

²“Kataken man Harun gelah adi itamakenna lampu si pitu i bas nahe lampu e, arus iaturna gelah terang lampu e ersinalsal ku lebe.”

³Ipatuhi Harun kata TUHAN e maka itamakenna lampu-lampu ngala ku lebe-lebe nahe lampu e.

⁴Nahe lampu e itepa i bas emas nari mulai datas nari terus ku teruh, sue ras usihen si icidahken TUHAN man Musa.

⁵Nina TUHAN man Musa,

⁶“Peseraplah kalak Lewi i bas kalak Israel si debanna nari, jenari bersihken lah ia kerina,

⁷alu dalan si bagenda: pirpirken ku ia lau pembersihen e jenari suruh ia ncukur kerina badanna e ras ncuci pakenna. Kenca bage ia enggo bersih rikutken peraturen agama.

⁸Kenca bage arus ibuatna sada jenggi lembu si nguda denga ras persembahen buah gandum si iperluken si ibahan i bas tepung campur minak saitun, janah kam arus muat sada jenggi lembu guna persembahen pengalemi dosa.

⁹Kenca bage pepulung kerina perpulungen kalak Israel janah suruh kalak Lewi tedis i lebe-lebe Kemah Perjumpan.

¹⁰Bangsa Israel arus namaken tanna ku takal Lewi,

¹¹janah kenca e Harun arus nangkuhken kalak Lewi jadi sada pemere si khusus man bangKu i bas bangsa Israel nari, gelah banci idahina dahinKu.

¹²Kalak Lewi pe, kenca si e arus namaken tanna ku takal jenggi lembu si dua e; sada ipersembahken guna persembahen pengalemi dosa janah sada nari jadi persembahen tutungen, guna ngelakoken acara pembersihen man kalak Lewi.

¹³Tangkuhken kalak Lewi jadi sada pemere si khusus man bangKu, janah suruh Harun ras anak-anakna ngaturkenca.

¹⁴Peseraplah kalak Lewi alu dalan si e i bas kerina kalak Israel si debanna e nari, gelah ia jadi sikerajangenKu.

¹⁵Kenca enggo ibersihken ras itangkuhkenndu kalak Lewi, enggo banci ia erdahin i bas Kemah e.

¹⁶Ia enggo Kupindo nggantiken kerina anak sintua i bas bangsa Israel, janah Aku saja empuna ia.

¹⁷Tupung Kubunuh kerina anak sintua i Mesir, Kupebadiaken jadi sikerajangenKu anak sintua i bas tep-tep keluarga bangsa Israel, ras anak si pemena i bas tep-tep asuh-asuhen. [8†]

¹⁸Genduari Kubuat kalak Lewi nggantiken kerina anak sintua i bas bangsa Israel,

¹⁹janah Kutugasken kalak Lewi man Harun ras anak-anakna, jadi sada pemere i bas bangsa Israel nari lako erdahin i bas Kemah e jadi si kawal bangsa Israel gelah ola ia kena mara adi ndehersa ia ku Ingan si Badia e.”

²⁰E maka Musa, Harun, ras kerina bangsa Israel nangkuhken kalak Lewi, bagi si ipedahken TUHAN man Musa.

²¹Ibersihken kalak Lewi dirina, ras icucina pakenna, jenari itangkuhken Harun ia jadi sada pemere si khusus man TUHAN. Harun ka pe erbahan acara perdamen man bana kerina.

²²Kalak Israel ndalanken kerina si enggo ipedahken TUHAN man Musa kerna kalak Lewi. Erkite-kiteken si e kalak Lewi enggo banci erdahin i bas Kemah i teruh pengawasen Harun ras anak-anakna.

²³Nina TUHAN man Musa,

²⁴“I bas umur dua puluh lima tahun tep-tep kalak Lewi arus ndalanken tugasna i bas Kemah Perjumpan e,

²⁵janah i bas umur lima puluh tahun ia arus ngadi.

²⁶Kenca si e, ia banci nampati temanna kalak Lewi si deban i bas ndalanken tugas i bas Kemah e, tapi la banci ia ndahiken dahin kai pe adi ia saja ngenca ndahisa. Bagenda me arus iatur tugas-tugas kalak Lewi.”