Read Batak Karo BILANGEN 9 Bible Online

BILANGEN 9 - Batak Karo bible

BILANGEN 9

¹ TUHAN ngerana man Musa i gurun pasir Sinai i bas bulan si pemena tahun si peduaken kenca bangsa Israel enggo nadingken Mesir. Nina, [9†]

²[2-3] “I bas wari pesepuluh empatken bulan enda, kenca matawari sundut, bangsa Israel arus mperingeti wari Paskah rikutken kerina peraturen ras cara-cara guna si e.”

⁴E maka isuruh Musa bangsa e mperingeti Paskah,

⁵jenari i bas berngi wari pesepuluh empatken bulan si pemena, ibahanna me bage i gurun pasir Sinai. Kerina idalanken Israel payo kal bagi si ipedahken TUHAN man Musa.

⁶Tapi lit i je piga-piga kalak si la bersih rikutken peraturen agama sabap enggo idadapna mait, janah la banci iperingetina Paskah i bas wari e. E maka lawes ia ndahi Musa ras Harun

⁷janah nina, “Kami la bersih sabap enggo idadap kami mait, tapi ngkai maka kami la iatanken nehken persembahen man TUHAN radu ras kalak Israel si debanna?”

⁸Nina Musa erjabap, “Timai lebe seh aku ngaloken pedah i bas TUHAN nari.”

⁹ TUHAN nuruh Musa,

¹⁰ngataken man kalak Israel nina, “Ise i bas kam ntah pe kesusurenndu si la bersih erkite-kiteken njemak mait ntah pe sangana i bas perdalanen, tapi merincuh ia mperingeti Paskah e,

¹¹banci iperingetindu sada bulan kenca si e, i bas berngi wari pesepuluh empatken bulan si peduaken. Rayakenlah e alu roti si la tama ragi ras gule-gulen si pagit.

¹²Ola tadingken sitik pe pangan e seh erpagi-pagina janah ola penggelken sada pe tulan asuh-asuhen e. Peringetilah Paskah e sue ras kerina peraturen-peraturenna. [10†]

¹³Tapi ise pe si bersih rikutken peraturen agama janah la ia i bas perdalanen si ndauh, adi la iperingetina Paskah e, lanai ikira bangsangKu, sabap la isehkenna persembahen man bangKu i bas paksa si enggo itentuken. Ia la banci lang ngenanami kiniseran erkiteken dosana e.

¹⁴Adi sekalak asing si ringan i tengah-tengahndu merincuh mperingeti Paskah e, arus idalankenna sue ras kerina peraturen ras cara-carana. Undang-undangna seri man tep-tep kalak, bali man kalak Israel asli ntah kalak asing.”

¹⁵ [15-16] Kenca Kemah Perjumpan e enggo pajek, i bas wari e reh sada embun nutupisa. Tep-tep berngi, embun e teridah bagi api.

¹⁷Adi nangkih kenca embun e, bangsa Israel nadingken inganna erkemah, jenari ipajekkenna ka kemahna i bas ingan embun e nusur ku teruh.

¹⁸Bangsa e nadingken inganna erkemah rikutken perentah TUHAN, janah arah perentahNa ka ia majekken kemahna. Kidekah embun e ringan denga i babo Kemah e, bangsa Israel tetap ringan i je.

¹⁹Adi embun e ndekah ringan i babo Kemah e, ipatuhina TUHAN, la ia pindah ku ingan si deban.

²⁰Maun-maun embun e ringan i babo Kemah e piga-piga wari saja ngenca; aminna kuga gia, ia tetap ringan i bas inganna erkemah e ntah pindah sue ras perentah TUHAN.

²¹Maun-maun embun e ringan i je karaben nari seh erpagi-pagi ngenca, janah minter kalak e pindah enggo kenca embun e nangkih. Adi nangkih kenca embun e, minter kalak e pindah.

²²Aminna gia dua wari, sada bulan, sada tahun ntah pe dekahen asa e, adi embun e ringan denga i babo Kemah e, bangsa Israel la pindah, tapi adi nangkih kenca, pindah ia minter.

²³Ipajekkenna, ntah pe ipindahkenna kemahna alu patuh nandangi perentah si ibereken TUHAN arah Musa.