Read Batak Karo MIHA 1 Bible Online

MIHA 1 - Batak Karo bible

MIHA 1

¹Tupung paksa Jotam, Ahas, ras Hiskia jadi raja-raja Juda, reh kata TUHAN man Miha; anak kuta Moreset. Man bana arah pengenehenen ipetangkas TUHAN kerina perkara-perkara kerna Samaria ras Jerusalem. [1†]

²Begikenlah, o kerina bangsa-bangsa, dengkehkenlah, o doni ras kerina isina. TUHAN si Erdolat jadi saksi ngelawan kam kerina. Begiken! Ia ngerana i bas rumahNa si badia nari i Surga.

³Nehenlah, reh me TUHAN i bas inganNa nari; nusur Ia, jenari erdalan i babo deleng-deleng i doni.

⁴Deleng-deleng melebur iperjatNa, bali ras lilin idiang api si gara. Maler ku baluren-baluren, bali ras lau maler arah rebe-reben.

⁵Kerina si enda jadi erkiteken bangsa Israel enggo erdosa dingen ilawanNa Dibata. Ise mabaisa maka Israel ngelawan Dibata? Ma Samaria kin? Ise mabaisa maka Juda erdosa? Ma Jerusalem kin?

⁶Erkiteken si e nina TUHAN, “Kuruntuhken me Samaria jadi gun-gunen batu i tengah mbalmbal, jadi sada ingan nuanken anggur. Batu kuta e Kugulangken ku bas baluren, dingen palas kuta e Kubongkar kerina.

⁷Kerina sembah-sembahenna si meherga Kuripukken, kasa kai barang-barang si ibereken man diberu perlua-lua i bas rumah pertoton ikernepken alu api, janah kerina gana-ganana ibahan jadi gun-gunen batu si terulang. Sabap Samaria ndatken barang-barang enda ndai kerina i bas upah perlua-lua nari, e maka iangkut musuh-musuhna me si e kerina jadi upah perlua-lua ka.”

⁸Kenca bage nina Miha, “Erkite-kiteken si e ceda ateku iherku ngandung. Guna encidahken ateku ceda, erdalan aku alu nahe ras daging manjang-anjang. Erbaung aku desken serigala, dingen nderkuh bagi perik unta.

⁹Luka Samaria lanai terpepalem, janah Juda pe bage ka; kecedan enggo seh i bas pintu gerbang Jerusalem, ingan bangsangku.”

¹⁰Ola turiken man musuh-musuh kami i Gat kerna ketalun kami; ola pelepas idahna kam tangis. O anak kuta Bet-Leapra, guling-gulinglah bandu i abu taneh!

¹¹O anak kuta Sapir, laweskenlah ku pembuangen manjang-anjang, tuhu mela kal akapndu. Kalak si ringan i Saanan, la pang ndarat i bas kuta e nari. Adi ibegindu anak kuta Bet-Esel ngandung, ietehndu me maka i je la lit ingan cebuni.

¹²Anak kuta Marot nima-nima penampat alu ate aru, erkiteken TUHAN enggo maba cilaka ku pintu gerbang Jerusalem.

¹³O kam si ringan i Lahis, pasanglah kuda ku gereta perang. Iusih-usihndu dosa-dosa Israel, janah erkiteken si e erdosa ibahanndu Jerusalem.

¹⁴Genduari, o kalak Juda, bahanlah persirang-sirangen ras kuta Moreset Gat. Raja-raja Israel labo dat penampat i bas kuta Aksip nari.

¹⁵O anak kuta Maresa, iendesken TUHAN me kam kempak musuhndu, si reh engkuasai kutandu. Peminpin-peminpin Israel si mulia, lawes me cebuni i bas gua Adullam.

¹⁶O kalak Juda, cukurlah bukndu seh takal tabu, perban ceda atendu kerna anak-anak si ikelengindu. Melinang bahan takalndu bali ras takal perik nasar, sabap ibuat me anak-anakndu i bas kam nari ku pembuangen.