Read Batak Karo MIHA 5 Bible Online

MIHA 5 - Batak Karo bible

MIHA 5

¹O kalak Jerusalem, pepulunglah tenterandu! Kita enggo terkepung! Peminpin Israel pe enggo iserangna!

²Nina TUHAN, “O Betlehem i Eprata, aminna i Juda kam kuta si kitikna, tapi i bas kam nari Kupekeke sekalak si ngerajai Israel, si asalna i bas adi-adi nari, i bas paksa si nuria nari.” [5†]

³Dage itadingken TUHAN me bangsaNa seh paksa diberu si nandangi mupus e mupusken anakna. Kenca bage kerina senina-seninana si lit i bas pembuangen ersada mulihken ras bangsana jine.

⁴Kenca ia reh, irajaina me rayatna alu gegeh si reh i bas TUHAN nari dingen alu kemulian TUHAN Dibata jine. Rayatna nggeluh alu senang erkite-kiteken kerina bangsa i doni enda ngergaken ia tuhu-tuhu,

⁵janah ia maba dame. Adi reh kalak Assur merangi negerinta janah iperjatina istananta, sibuat piga-piga kalak peminpinta si mbisana lako ngelawanca.

⁶Alu gegeh senjata italukenna Assur, janah ikelinina kita adi kalak Assur e reh nerang tanehta. [6†]

⁷Kalak Israel si tading denga bali kap ras lau malem si ibereken TUHAN man melala bangsa, desken udan man sinuan-sinuan. Ernalem ia man Dibata labo man manusia.

⁸Kalak Israel si tading i tengah bangsa-bangsa, bali kap pagi ras singa si ndarami pangan i tengah kerangen ras i mbalmbal: lawes ia ku tengah-tengah rarasen biri-biri, ijerngemna, jenari icaing-caingna; janah lanai lit arapen pulah.

⁹Italuken Israel me musuh-musuhna, janah ikernepkenna kerina.

¹⁰Nina TUHAN, “I bas paksa e pagi Kubuat kerina kudandu, janah gereta perangndu Kukernepken kerina.

¹¹Kukernepken kuta-kuta si lit i bas negerindu, janah Kuradasken benteng pertahanenndu.

¹²Kulesapken kerina perkakas kinigurun si ipakendu, dingen guru-guru pertendung Kumasapken i bas kam nari.

¹³Gana-ganandu ras batu sembah-sembahenndu Kukernepken; e maka lanai banci kam nembah man barang-barang si ibahanndu jine.

¹⁴Kubulakken gana-gana dewi Asera si lit i bas negerindu dingen kuta-kutandu Kuradasken.

¹⁵Janah i bas pernembeh ateKu si gara erbalas Aku man kerina bangsa-bangsa si la megiken Aku.”