Read Batak Karo MIHA 6 Bible Online

MIHA 6 - Batak Karo bible

MIHA 6

¹Begikenlah pengadun TUHAN kerna Israel. Tedisken, o TUHAN, turiken pengadunNdu; berelah deleng-deleng ras uruk-uruk ndengkehken kai si ikatakenNdu.

²O deleng-deleng, o palas doni si paguh, begikenlah pengadun TUHAN! Lit pengadun TUHAN kerna bangsaNa. Atena erpekara ras Israel.

³Nina TUHAN, “O bangsangKu, kai kin si enggo Kubahan man bandu? Kuga maka Aku jadi babanndu si mberat? Jabaplah Aku.

⁴Kubaba kam ndarat i Mesir nari; Kupulahi kam i bas perbudaken nari; Kusuruh Musa, Harun, ras Miriam naruhken kam. [7†]

⁵O bangsangKu, ingetlah kai sura-sura Balak, raja Moap, man bandu, janah kuga Bilham anak Beor njabapsa. Ingetlah kai sijadi i bas perdalanenndu mulai i Sitim nari seh ku Gilgal. Adi iingetndu kerina si e, tentu iangkandu maka kerina perbahanenKu e me lako engkelini kam.” [8†]

⁶Kai ndia kubaba man TUHAN, Dibata nu langit, adi reh aku nembah man baNa? Kubaba ndia lembu si mejilena jadi persembahen tutungen.

⁷Meriah nge ndia ukur TUHAN adi kupersembahken man baNa meribu-ribu biri-biri tah pe minak saitun si maler la erpeltep-peltep desken sepuluh ribu lau belin? Entahsa kupersembahken ndia anakku sintua dilaki jadi penebus dosa-dosangku?

⁸Lang! TUHAN enggo nuriken man banta kai si mehuli. Si ipindo Dibata i bas kita nari e me kap, ngelakoken kai si bujur, encidahken kekelengen si tetap, dingen nggeluh alu ukur meteruk rembak ras Dibatanta.

⁹Kalak pentar kap si mbiar man TUHAN. Erlebuh TUHAN man kuta e, “Begiken, o kam si pulung i bas kuta!

¹⁰I bas rumah kalak jahat pulung erta-erta si idatca alu dalan si la bujur. Ipakena sibar-sibar palsu, barang si ciga ateKu.

¹¹Kuga banci Kualemi kalak si make timbangen palsu ras anak timbangen si la payo?

¹²Kalak bayak nindih kalak musil, janah kerina kam perguak janah penipu.

¹³Dage enggo Kubenaken ngeradasken ras engkernepken kam erkite-kiteken dosandu.

¹⁴Aminna man pe kam lalap kam la besur; janah melihe denga nge kam. Iangkutndu barang-barangndu, tapi labo kam ngasup engkelinisa; kasa kai si enggo isimpanndu Kukernepken i bas perang.

¹⁵Merdang kam, tapi la kam si peranisa. Iperehindu gia buah saitun muat minakna, tapi la ndigan pe terpakendu. Ibahanndu anggur, tapi la ndigan pe iinemndu.

¹⁶Si enda jadi erkiteken iusihndu kejahaten si ilakoken Raja Omri ras anakna Raja Ahap. Perukurenna iteruskenndu, e maka Kubaba kam kempak kebenen, janah kerina kalak megombang man bandu. Kerina bangsa i japa pe mecekurak man bandu.” [9†] [10†]