Read Batak Karo MIHA 7 Bible Online

MIHA 7 - Batak Karo bible

MIHA 7

¹Cilaka kal tuhu! Aku desken sekalak si kelihen si la ndat buah pangan i bas kayu tah pe buah anggur i bas batangna. Kerina buah anggur ras buah ara si entebu enggo iperani.

²Lanai lit sekalak pe si bujur i bas negeri e, la lit si erkemalangen man Dibata. Sekalak-sekalak nimai kesempaten lako munuh. Sekalak-sekalak ngelis-ngelis seninana si sada bangsa.

³Kerina ia cerdik ngelakoken kejahaten. Pegawai-pegawai ras hakim-hakim mindo sogok. Kalak si erkuasa nuriken sura-surana man bana, e maka ras-ras ia erbahan pertakin.

⁴Subuk si mehulina ras si bujurna kal pe i bas ia bali la terpakena ras peren si erduri. Warina enggo reh Dibata ngukum bangsa e, sue ras si enggo persingetiNa arah nabi-nabi. Genduari gulut akapna kerina.

⁵Ola kam tek man temanndu sibalengen, ola kam ernalem man temanndu. Metenget kam kerna kai si ikatakenndu subuk man ndeharandu pe.

⁶Anak dilaki, motu akapna bapana, anak diberu isimbakna nandena, permain rubat ras bibina; musuhna e me si sada jabu ras ia. [11†]

⁷Tapi adi aku kuperdiateken TUHAN; alu ukur tetap kutimai si ngkelini aku. Ibegiken Dibatangku nge aku.

⁸O musuh-musuh kami, ola kam ermeriah ukur ngenehen nasip kami. Tuhu enggo jongkang kami, tapi keke ka nge kami mulihi. Genduari kami i bas gelap, tapi ibereken TUHAN ka nge pagi man kami terang.

⁹Enggo kami erdosa man TUHAN, e maka genduari arus igengken kami pernembeh ateNa kentisik. Tapi kedungenna ibelaNa nge kami, dingen iberekenNa keadilen man kami. IbabaNa kami ku bas terang; iidah kami me kuga pengkelengiNa kami.

¹⁰Kenca bage iidah musuh-musuh kami me si e, e maka mela iakapna, musuh si ngatakenca mbarenda nina, “I ja kin TUHAN Dibatandu?” Iidah kami me ia italuken, iperjaki desken kubang i bas dalan.

¹¹O kalak Jerusalem, reh me paksana majekken tembokndu mulihi. Tupung paksa e pagi daerahndu ipebelangi.

¹²Bangsandu mulih pagi ku kam i ja nari pe; i Assur nari arah Timur, i Mesir nari i Selatan, i bas daerah-daerah Lau Eprat nari, i lepar lawit nari ras i deleng-deleng nari.

¹³Tapi doni jadi gurun pasir pagi erkite-kiteken kejahaten kalak si ringan i je.

¹⁴Permakanilah bangsaNdu, o TUHAN, bangsa si enggo ipilihNdu, si ringan serap-serap i bas kerangen, i tengah-tengah taneh si mehumur. Berelah ia nggagat i Basan ras i Gileat, bali ras si nai.

¹⁵Cidahkenlah tanda kuasaNdu man kami, o TUHAN, bagi si ibahanNdu tupung itaruhkenNdu kami ndarat i Mesir nari.

¹⁶Bangsa-bangsa ngidahsa, janah mela iakapna, aminna pe ia megegeh. Itutupna babahna alu tanna, dingen pasek cupingna.

¹⁷Njoler ia i bas abu desken nipe, reh ia i bas benteng-bentengna nari alu nggirgir dingen mbiar. Alu gentar reh ia ndahi TUHAN Dibatanta.

¹⁸La lit dibata si deban bagi Kam, o TUHAN; ialeminNdu dosa-dosa bangsaNdu si tading denga. La Kam nembeh rasa lalap, tapi meriah ukurNdu encidahken kekelengenNdu si tetap man kami.

¹⁹Mekuah ka ateNdu mulihi kempak kami. Dosa-dosa kami iperjakiNdu, jenari iambekkenNdu ku teruh lawit si mbages!

²⁰IcidahkenNdu kekelengenNdu si tetap ras ukurNdu si la mobah-obah man bangsaNdu, kesusuren Abraham ras kesusuren Jakup, sue ras si enggo ipadankenNdu alu sumpah i bas paksa si nai nari.