Read Batak Karo NAHUM 2 Bible Online

NAHUM 2 - Batak Karo bible

NAHUM 2

¹Niniwe, kam sangana iperang. Kuasa si engkernepken kam enggo reh. Pesikap bentengndu! Jagai pasar-pasarndu! Erbenting kibullah lako erperang! (

²Iulihken TUHAN kap ateNa kemulian Israel, bali ras tupung imbang-imbangna langa ngerampasi ia.)

³Tentera musuh maba ampang-ampang megara, ipakena seragam megara. Enggo sikap ia nerangsa! Gereta perangna erndilap bagi api! Kudana mengkat-engkat!

⁴Gereta perangna meter perdalanna i bas pasar-pasar, si ayak-ayaken i babo taneh lapang. Harhar bagi obor gara, si lebe-leben desken kilap sumagan.

⁵Tentera si mbisa idilondu, tupung ia reh ngasak tertuktuk ia. Kalak si nerang kiam kempak tembok kuta, enggo ipajekken i je perkakas ngeruntuhken tembok.

⁶Pintu gerbang deherken lau mbelin enggo talang, istana enggo guntar.

⁷Kemberahen enggo ibaba tertaban, tangis ngandung dayang-dayangna, bali ras nderapati si ndengep, itemtemina tentenna, ceda kal atena.

⁸Bali ras lau sampuren mburtas, bage me perkiam kalak i Niniwe nari. “Ngadi! Ngadi!” nina kalak si erlebuh. Tapi la lit si nulihkenca.

⁹Rampokilah pirak! Rampasilah emas! Kuta e dem alu erta-erta!

¹⁰Niniwe enggo kernep, jadi taneh melungen si terulang. Picet kal ukur, perban mbiar, tiwen nggirgir, gegeh bene, ayo jadi mbulan.

¹¹I ja genduari kuta e? Si nai bali ras ingan singa, jadi ingan anak singa ibere nakan, ingan singa ras beruna erdalan-dalan, ingan anak singa nggeluh alu teneng.

¹²Singa njerngem si man panganna, jenari icaing-caingna man beruna ras anak-anakna, idemina liangna alu daging si enggo ijerngemna.

¹³“Aku kap imbangndu!” nina TUHAN si Mada Kuasa. “Kuciluk gereta perangndu. Tenterandu maten i bas perang jenari Kubuat kerina si ibuatndu i bas kalak si deban nari. Kuasandu i doni enda lanai terbegi.”