Read Batak Karo NAHUM 3 Bible Online

NAHUM 3 - Batak Karo bible

NAHUM 3

¹Cilakalah kuta pemunuh si perguak e, dem alu erta rampasen ras rampoken!

²Begikenlah! cambuk si erdepar roda si erderak-derik, sora kuda ranjak-anjak sora gereta perang lompat-lompat.

³Kalak si erkuda reh nerang, pedang erbinar, lembing erndilap-ndilap. Bangke ergun-gun, kalak mate la terbeligai nterem kalak tertuktuk kuje tertuktuk kempak kalak mate, la ieteh beliganna!

⁴Niniwe si perlua-lua e enggo iukum, Niniwe erbahan leket ukur, dem i bassa permanis si erbahanca keke kerincuhen, bangsa-bangsa ipukona jadi budakna.

⁵Nina TUHAN si Erdolat, “O Niniwe, la banci lang Kuukum kam! Kubahan maka kam manjang-anjang, maka bangsa-bangsa ngidahsa kerina si man kemelankenndu.

⁶Kubahan maka kam iisak-isakken kalak, Kutamburi kam alu si melket, ciga ate kalak ngenehen kam.

⁷Kerina kalak si ngidah kam megamang akapna. Nina, ‘Enggo rontas Niniwe! Ise rate mekuah tare ia? Ise si ngapuli ia?’ ”

⁸O Niniwe, ulin kin kam asangken Tebes ibu kuta Mesir? Ia lit lau mbelin si ngkawali ia desken tembok. Lau Nil pertahanenna.

⁹Sudan ras Mesir iperentahna, gegehna la kap lit sibarna. Libia kap temanna.

¹⁰Tapi kalak Tebes pe iangkut ku pembuangen. I bas tep-tep suki pasar anakna idampesken seh mate. Peminpin-peminpin iangkut tergari janah itikam-tandukken.

¹¹Kam pe la banci lang mabuk dingen mbulen o Niniwe. Icubakenndu mulahi dirindu i bas imbang-imbangndu nari.

¹²Kerina benteng-bentengndu bali ras batang ara, sibuahna lampas tasak: iugur batangna, nartaren kerina buahna ndabuh ku bas babahndu.

¹³Tenterandu bali ras diberu-diberu. Negerindu lanai terpertahanken i bas imbang-imbangndu nari. Api ncedaken eruk-eruk pintun gerbangndu.

¹⁴Ingan njaruki lau guna persikapen ikepung, janah peteguhilah benteng-bentengndu. Dedehi taneh dah guna erbahan batu bata, pesikap ginuhurndu pe.

¹⁵Aminna kai pe ibahanndu, la banci la kam iciluk gelah mate ntah ibunuh i bas perang. La banci la radas kam bali ras peranin si ipangani labang. Kam nterem desken labang!

¹⁶Ipebuendu perbinagandu buen asangken bintang-bintang i langit! Tapi genduari enggo bene kerina desken labang kabang.

¹⁷Pegawaindu bali ras labang si ergun-gun i bas tembok tupung wari perudan. Tapi tupung pultak matawari kabang ia kerina janah ise pe la metehsa ku ja ia lawes!

¹⁸O Raja Assur, kerina gubernurndu enggo mate. Kerina bangsandu enggo tunduh rasa lalap! Rayatndu enggo ikerapken ku deleng-deleng. Ise pe la lit maba ia mulihken.

¹⁹La lit tambar man lukandu, ugahndu lanai banci malem. Kerina kalak ertepuk megi berita maka kam enggo kernep. Lit kin kalak pulah i bas kekejamenndu si la peltep e?