Read Batak Karo HABAKUK 1 Bible Online

HABAKUK 1 - Batak Karo bible

HABAKUK 1

¹Enda me berita si ipetangkas TUHAN man Nabi Habakuk arah pengenehenen.

²Enggo ndekah aku erlebuh mindo penampat man baNdu TUHAN, tapi uga maka lalap la ibegikenNdu? Nderkuh aku man baNdu, tapi uga maka la ipulahiNdu kami i bas kejahaten kalak e nari? Asa kai kin dekahna aku arus erlebuh man baNdu?

³Engkai maka ipediatNdu kuidah kejahaten? Uga maka ngasup Kam natap-natap kelepaken si bage kelekna? Encedai, sigegeh-gegeh kerina i sekelewetku; perubaten ras perjengilen i japa pe.

⁴Undang-undang la ergegeh, la erguna, janah keadilen la pernah idalanken. Ketamburen kalak bujur ibahan kalak jahat, e maka keadilen enggo iputar-balikken.

⁵Kenca bage ikataken TUHAN man bangsaNa, “Pernehenlah bangsa-bangsa sekelewetndu, janah perdiatekenlah, tentu sengget kam pagi erkiteken kai si iidahndu. AteKu ngelakoken sada perbahanen si rejin seh maka la kam tek adi ibegindu e. [1†]

⁶Kupekeke me bangsa Babilon jadi si erkuasa, bangsa si merawa dingen la banci kem. Isiarna me ku belang-belang doni enda naluken negeri-negeri si deban. [2†]

⁷Ku ja pe ia lawes gentar janah mbiar kalak kerina. Alu meganjang ukur ia nentuken undang-undang bagi ate-atena.

⁸Kudana pedasen kiam asa arimo, rawan asa serigala. Si ngersaksa rehen i negeri-negeri si ndauh nari, ngerattuh i babo taneh. Pedas-pedas ia reh, desken rajawali nangkis panganna.

⁹Tenterana reh engkuasai alu gegehna, janah kerina kalak mbiar tupung ideherina. Tabanen si ibuatna bali buena ras kersik.

¹⁰Raja-raja igombang-gombangina, dingen kalak si erpangkat meganjang iuru-uruna. La lit benteng si banci ngambatisa -- ipegun-gunna taneh jenari irebutna benteng e.

¹¹Kenca bage mentas ia desken angin kaba-kaba jenari terus lawes. Bage me bangsa e, si erdibataken gegehna jine.”

¹² TUHAN, bena-benana nari pe Kam kap Dibata. Kam kap Dibatangku si Badia si tetap asa lalap. O TUHAN, Dibatangku ras si kawalku, enggo ipilihNdu bangsa Babilon janah ibahanNdu ia jadi megegeh gelah banci iukumna kami.

¹³Tapi uga maka tahan Kam ngidah kalak penipu dingen jahat enda? Si tuhuna mataNdu si badia labo ngasup ngidah kejahaten, janah labo ternehenNdu kalak si ngelakoken kesalahen. Dage ngkai maka Kam sinik saja tupung ikernepkenna bangsa si bujuren asangken ia?

¹⁴Kuga maka bagi nurung tempa perbanNdu manusia e tah pe bagi perkis si la erpengulu?

¹⁵Kalak Babilon e nangkap jelma alu kawil, tempa-tempa nurung manusia e. Isaren-sarenna kalak tare jalana, janah ersurak kal ia alu meriah ngidah kalak si kena jalana.

¹⁶Terlebih-lebih ka pe isembahna kap jalana e janah ipersembahkenna persembahen man bana, erkite-kiteken jalana e mereken kebayaken ras rejeki ertambah-tambah man bana.

¹⁷Rasa lalap kin ia make pedangna e dingen la erngadi-ngadi ngkernepken bangsa-bangsa alu la meteh mekuah?