Read Batak Karo HABAKUK 2 Bible Online

HABAKUK 2 - Batak Karo bible

HABAKUK 2

¹Kunangkihi menara penjaganku jenari kutimai kai isuruh TUHAN si man katankenku ras jabapNa kerna jungut-jungutku e.

²Bagenda me jabap TUHAN man bangku, “Suratkenlah alu terang i bas papan batu kai si Kupetangkas man bandu, gelah iher kiam pe murah ngogesa.

³Suratken e, sabap langa seh paksana si e jadi. Tapi pedas me seh paksana, janah kai si Kucidahken man bandu e la banci lang jadi. Tempa-tempa melawen ia reh, tapi timailah; labo banci la jadi, janah labo ipedekah-dekah. [3†]

⁴Janah enda me berita e: Kalak jahat labo pulah, tapi kalak bujur la banci lang nggeluh erkiteken tetap ia ernalem man Dibata.” [4†]

⁵Kebayaken penipu kap. Kalak rangap meganjang ukurna dingen la pernah teneng; bali ras doni kematen, la pernah puas akapna; em sabapna maka italukenna bangsa-bangsa alu la ermedu-medu guna dirina jine.

⁶Bangsa si italuken e la banci lang naling-naling bangsa si ngayak ia, nina, “Ibuatndu si la sikerajangenndu, e maka bene me kam! Asa kai nari dekahna kam pebayak bandu alu maksa kalak si rutang nggalar utangna alu barang jaminen si enggo ipepulungndu?”

⁷Ope denga ietehndu, kam jine si enggo naluken kalak si la banci lang rutang, janah ipaksa nggalar bungana. Nandangi reh me musuh-musuhndu, janah nggirgir kam ibahanna. Irampasina me kam!

⁸Enggo melala negeri si irampasindu pendudukna, tapi kalak si tading denga la banci lang ngerampasi kam, erkite-kiteken kam enggo munuhi janah mesangat pencedakenndu bangsa-bangsa ras kuta-kuta i doni enda.

⁹Cilaka me kam! Enggo ipebayakndu keluargandu alu erta si irampasndu alu gegeh, janah enggo icubakenndu mahan rumahndu aman dingen la kena bahaya.

¹⁰Tapi rencananndu e mahanca keluargandu mela; alu engkernepken melala bangsa, ibabandu kap kecedan man dirindu jine.

¹¹Sabap batu i bas tembok nderkuh me janah rusuk-rusuk i bas tarum erlolingen ngaloisa.

¹²Cilaka me kam! Ipajekkenndu kuta i babo kejahaten, ras dareh.

¹³Bangsa-bangsa si italukenndu ngelatih bana alu pendahin si sia-sia, janah kerina si enggo ipajekkenna masap ipan api. TUHAN si Mada Kuasa kap si mahan si enda.

¹⁴Tapi doni enda dem me alu penandai kerna kemulian TUHAN bali ras lawit dem alu lau. [5†]

¹⁵Cilaka me kam! I bas rawaNdu si mesangat ibahanndu mela akap kalak si sibalengen ras kam. Kote ia ibahanndu, tempa-tempa mabuk ibahan anggur.

¹⁶Tapi kam jine pe nandangi mela me akapndu, labo kemulian idatndu. Kam pe nandangi minem me, jenari mbewat-mbewat. TUHAN kap si mahanca kam minem tare calung ukumenndu, janah kehaganndu salih jadi kemelan.

¹⁷Enggo irabindu kerangen Libanon; genduari kam me irabi. Ibunuhindu rubia-rubiana, genduari gentar me kam ibahan rubia-rubia. Si enda jadi erkiteken kam enggo munuhi janah enggo mesangat pencedaindu bangsa-bangsa ras kuta-kuta i doni enda.

¹⁸Kai kin gunana gana-gana? Gana-gana la lebih asangken bahan-bahanen tan manusia, janah la lit kai pe si iajarkenna seakatan guak. Kai kin untungna man kalak si mahan gana-gana e adi ernalem gia ia man bana? Ngerana pe ia labo banci.

¹⁹Cilaka me kam! Ikatakenndu man sempenggel kayu, “Medakken!” Man sengkibul batu si pekak ikatakenna, “Kekeken!” Ngasup kin gana-gana mereken ketangkasen man bandu? Aminna ilapisi gia gana-gana e alu pirak tah emas, labo lit kegeluhen i je.

²⁰ TUHAN lit i bas RumahNa si Badia; kerina doni siniklah i adep-adepenNa.